Bawipa Kan Umpi Ko

Kan Laitlang te kha rili in pe thong ruk a sannak ah a um i thlichia le tilet in kan him ngaingai. Thingthei tisik annhnah kan eimi hna kha an thawt pinah vitamen a tha tukmi an si. Khua maw caan ah sa kan ei kho i a thawt tuk pinah voi tampi kan rak ei khawh lomi kha kan pum caah a tha tuk. Lai nun phung, lai holh tein khua kan sa hna i a nuam tuk ka ti. Laitlang tluk hi um hnga maw kan ti. Sahrang 666 uknak tang kan um ruangah zawfah caan kan i tlop kho lo. Fimcawnnak ah kan bau. Sifah nih a kan den. Culaklai ah canghnia rawltam bantuk ralkap a kan thlahhnawh i kan hmun cia ah thah le nawn dih an kan zalh. Bawipa kan umpi ko, kan rak ti.

Lai nusal, Lai pasal tampi nih India le Malay ah hmun hma kan van khuar. Rian tete zong kan van tlai. Khat le khat kan i bawm. Cacawng kho zong kan van karh. Lailei zong rilcat kan hei peh khawh hna. Nun siarem deuh kan si kan hun ti. Phone thatha kan thawng ve cang. Dawr sangsang kan kai ve cang. Computer le internet cu kal pah hnur ko khi an lo ve cang. Malay tluk hi a um hnga maw kan ti. Hmaifa ruangah mitkuh siaremlo caan bel a tam ngai. Cunakin a poi deuhmi um hoi.  Palik maw an hrang deuh hnga kawlram MI kha dek. Minung si ve lo bang i thuh zungzal hauh. Ui fir bang khui demduam in tlawn. India kala pawl le Indonesia pawl i duh paoh in deh coh ton lengmang. Mawtaw nih pah i zamtak awk men in maw kan caan hi a dih ko ne lai. Bawipa kan umpi ko, kan rak ti.

A tu cu ram thumnak US ah kan um cang. Vawlei cung ram thawngbik. Ralkap hriamnam tha bik ngei tu. Zalonnak le luatnak ram. Sifak mi hna bawmtu ram. Tuan kho deuh nih tam deuh hmuhnak ram. Tuan lo zongah cozah nih bomhnak ram. Ngan damnak le cacawnnak ah a tha bik ram. Zeibantuk harnak ton paoh bawmtu palik timhcia in umnak ram. Kan hna a ngam cang ne kan ti cang. Hi hlei ram tha um ti lo kan ti. Mah belte  palik hi mineng an thla pa ve tawn kan ti. Cu pinah US hi mah le mah i thahnak ram a si rua. Mawtaw in a thimi hi kum khat ah thong 40 deng lengmang kan si. Meithal in ai kapmi hi thong 32 tluk an si. Mah kut tein ai thatmi zong vairangzat an si. Mah that ko zong zong pawngkam midang nih pah khawh kah khawh kan si. Culak US ram pumpi cu thlichia le tilet nih thirthir phang in a tuah. Atu May thla chung Oklahoma lawngah mi 51 thlichia nih a thah hna. Bomh paoh hmangmi Muslim an khat fawn. Bawipa kan um pi ko.

Categories: Theological paper

Leave a Reply