Bawipa Thangtthat Usih

Sink chungah kheng ttawl ding a tam tuk tikah na ing a puang men lai. Na chungle nih khim cicek tein rawl nan ei khawh timi na ruah bel ahcun na lawm tthan lai. Rawl ei awk ngeih lo khawh a si. Ttawl dingmi kheng ngeih lo khawh a si. Rawl a um ko zong ah ei khawh lo caan a um. Nan a hnawmh tuk tikah na ing a puang men lai. Hnawmh dingmi inn le thenh dingmi umnak inn na ngeih kha na ruah ahcun nai lawm tthan lai. Umnak ngeih loin hlei tangah ih khawh a si. Robert Dawson nih, na duh vialte le na ngeihmi zat lawng na ruah paoh ahcun nai lawm bal lai lo. Sihmanhsehlaw naa phutmi le na hmuhmi vialte kong na ruah paoh ahcun nai lawm peng ko lai, a ti. Kum 1789 lioah American president a hmasabik a rak ttuanmi George Washington nih, Thanksgving zarh ahhin kan miphun dihlak nih a lianngan tukmi kan Pathian i a kan tuahpiakmi kong hi hngalh i a nawl kan zulh ding a si. Hmailei a kan huhphenhnak ding le a vel kan co khawhnak ding kha kan kawl awk a si, a rak ti.

Voi khat cu Brad timi hnakchia pa le a pa kha rawl ei an i tim. A pa nih rawl ei lai ah thla a cam. Brad nihcun zei caahdah grocery dawr in a ra komi rawl caah cun thla na cam, tiah a hal. A pa nih changreu palhat kha a lak i, mah hi khoi in a rat tiah a hal. Brad nih cun dawr in a ti. Dawr nihcun khoika ahdah an lak a ti. Brad nih, changvut an emmi a si, a ti. A pa nih changvut cu khoika in a rat, a ti tthan. Brad nih lo tuahmi pawl sinin a ti. A pa nih lo tuahmi nih cun zeitindah an lak a hun tti tthan. A ci an cin tiah Brad nih a hun leh. Cu a ci cu Pathian sermi a si caah ka ei lai i lawmhnak bia ka chimmi a si tiah a pa nih cun a bia a donghter. Zeizong vialte i a hram cu Pathian a si. Kan dihlak caah a raung tein ni a tlanter. Ruah a surter. Khua a muihter i a ceuter tthan. Minung kan nunnak caah kan herhmi vialte a khang tu kan Pathian A min thangtthat si ko seh!

Cathiang nih mi vialte hi misual kan si (Rome 3) i sual man cu thihnak a si (Rome 6:23), a ti. Sual i puhrun in nun a har. Taksa thihnak he thlarau thihnak a ing ding kan si. Sihmanhsehlaw Khrih Jesuh thawng Pathian nih kan sualnak vialte a kan ngaithiam dih. Nan sualnak cu khuadawm bantukin ka chem dih cang. Ka sinah ra kir u, nanmah an khamhtu hna cu keimah ka si … Keimah cu Bawipa, nanmah an sertu hna le an khamhtu hna ka si. Keimah cu zeizong vialte a sertu Bawipa ka si.
Keimah lawnglawng nih van cu ka samh hna; vawlei ka rak ser ah hin ahohmanh nih an ka bawm lo,” a ti (Isaih 44:22-24). Pathian nih a kan ngaihthiam caah kan nung. Kan rian ngan bik Amah thangtthat le lomh biachim hi a si. 1Maw ka nunnak, Bawipa cu thangṭhat tuah! Ka sining vialte, a min thiang cu thangṭhat tuah u! Maw ka nunnak, Bawipa cu thangṭhat law zeitluk in dah zaangfahnak a ngeih kha philh hlah (Psalm 103).

Related posts:

Mi Pakhat Min Pali
Tih A Nungmi Thlennak
Thawhthannak Na Lunghrinh Maw?
Categories: Uncategorized

Leave a Reply