Bethlehem le Christmas

Naute Jesuh a chuahnak Bethlehem khua hi Jerusalem thlanglei meng sarih tluk ah a ummi a si. Mah khua hi khua hmete a si. Tukhul tlawmpal, lotlo tlawmpal le chawlet chawhrawl pah in khual a tlawngmi tlawmpal umnak hmun a si. Khua hmete a sinain a min thannak cu Israel sinagpahrang David a chuahkehnak khua a si caah a si. Mary le Joseph Nazareth in Bethlehem an ratnak suallam cu milurel a um caah a si. Mah lioah Judah mi cu Rome kut tangah an um. Rome ralbawi Caesar Augustus nih milurelnak a tuah. Judah mi vialte nih tax an pek nak hnga an min cazin khawm dih hna uh a ti. Cucaah David hrinsor Judah pa a simi paoh an pupa khua a simi Bethlehem ah an chungkhar he an kal dih. Cu lio caan cu Mary nau a kennak zarh 35 leng a si cang. US ram vanlawng ah nau a poi i thla 35 a si cangmi cu sibawi lehhmah lawngin khualtlawn khawh a si. Mary cu rang ai cit i khingrit ngaiin Bethlehem a phan.

Bethlehem an phan cang nain khoiahdah kan riah lai ti an thei lo. Khualriahbuk hi a biapi ngaingai. Mah lio chan ah mifir le damiah an tam. Lam le riak buk ah damiah an teih tawn hna. Bethlehem cu chim lo Rome ram pumpaluk ah atu US i kan hmanmi Holiday Inn, Super 8 bantuk a thami pakhat hman a rak um lo. Bethlehem i khual riah buk hi inn leng ah rang le kalauk hren i a chung tuawng ah rilh sawhsawhmi khi a si. Riakbuk cawngtu nih Joseph a theih lo ruangah maw, Joseph neihmi phaisa nih a zat lo ruangah maw, mi an khah dih cang caah maw cu fiang tein kan thei lo nain tluninn cu an rak awnh hna lo. Satil an chiahnak cawthlam tu ah cathiang nih a rakchim chungmi cu a hung tling cuahmah: Sihmanhsehlaw Bethlehem Efrath, nangmah cu Judah ram chungah a hme bik khua hna lakah naa tel ve nain, Nangmah chungin Israel uktu a chuak lai. Amah a hram cu kan hnuleipi caan, a luan cangmi caan chungah khan a um cangmi a si (Micah 5:2).

Zeiruangahdah Pathian nih a fapa hi hi tluk a niamnak hmun ah a chuahter hnga? Cawrawl kuang celngel ah a chuahter hna? Phungchim le catial thiam Ray Pritchard nih a ruang pathum a chimmi hi ruah a phu. 1) A niam bikmi minung sinak ai thiam cu mizeipaoh nih kan ngamh i kan fuhpanh khawhnak ding caah a si. 2) Sifakmi le mi nih zeirel lomi hna zong nih komh awk thami Pathian a sinak a langhter. 3) Amah bantukin ai tordormi hna kha Pathian pennak kauhter ding ah a kan sawm. France uktu le ralbawi minthang Napoleon nih a thih lai thong chungah hitihin a chim: Kan nih vawlei raltuk thawng pawl cu vawlei hi thawnnak power in uk kan timh i zultu tampi kha power in kan hruai hna. Sihmanhsehlaw kan thih laiah mi an i lawm i kan chiatnak lawng mi nih an i cin ken lai. Jesuh cu vawlei a nun chungah toidornak le dawtnak i mi a hruai hna. A raltu vialte kha lehrul a cham hna lo. A donghnak ah vailam ah an thah. Sinain a thih hnuah million rel cawk lo nih a hnu an zulh. Bethlehem muisam ai dawhnak bik cu tordoinak a si. Tu kum kan Christmas cu kanmah le kanmah ithumhnak in hmang cio hna usih.

Categories: Artical

Leave a Reply