Value in life

Fig Tree for people (Mi Vialte Caah Theipi Kung)

• By Chan Lian
• 27 January, 2013
• 2 Comments

Ni kum ah kan rak hrawn tawnmi theipi kung kha kan philh bal lo. Kan ruh tawnmmi ngafuan zong kan i chinchiah. Kan hmuh tawnmi bonus zong tu kum ah kan hngah hlang than.Tax kan file tawnmi zong a nikhua te kan i chin chiah i nithla kan rel tawn. Zeithil paoh nih anmah an caan cio ah anmah le an theipar an neih cio tikah an sunglawi i mipi nih hngah hlang an si tawn. Ni kum kan hrawnmi tuaihmawng nih tu kum ah a kan hmawn piak ti lo ahcun kan tha  a chia ngaingai. Mah tuaihmawng kung cu a zeidah ti hnga, tiin kan phun zai. Mah chuntlung cu ziah patlung a chuah ti hnga lo kan ti. Ziah mah tiva ahhin nga na fuan ti hnga lo kan ti. Mah theipi kung cu a phang a chia cang ai, kan ti. Zeiruangahdah theipar tha kan tlai khawh camcin cio hnga lo?

Minung zong nikum ah theitha a thlai ngai ko nain tu kum ah a tlai kho ti lomi kan um theu. A ruang pakhat cu kan i thar chuah lo ruangah a si. Ph D degree a hmumi nu/pa nih a hmuh ni in ca a rel ti lo ahcun a degree san a tlaihnak a um lo ti a si. Sibawi pakhat nih thlakhat ah siai lei capar 120 a rel lo ahcun sibawi sinak a peh zul kho lo ti a si. Ralkap pakhat nih nitin training a tuah than lengmang lo ahcun ral a tu kho lo. University ca chim pawl nih ni kum an hmnami cauk pinah cauk a chuak thar an hman chap lo ahcun cachim rian an tuan kho lo. Zumtu pakhat zong nih ni kum ah khamnak thawng tha a cohlan i tu kum ah khamnak thawngtha i a tang peng rih ahcun zumtu tha a si kho lo. Pathian nawl ngaihnak le a duhnak tuahnak leiah kar a hlan peng a hau. Ni kum ah thil tha cu vial kha vial ka tuah cang i a za cang ti a um kho lo, tu kum ah mahnak tam ka tuah rih lai timi lung put in i thar chuah hna usih.

Ni kum i a thei tha tein a tlai komi theipi kung cu tu kum ah a pang a chia. A ruang cu a thei a rak ei tu pawl nih a nge an rak cik dih. Cun a hawngkha kha an rak ziah, nam in a kung an pemh i a tling cu khaicek ah an hman. A pawng i an i dinh caan ah theipi kung cu lung cheh zuamnak ah an hman. Ahodah a hmual a dik bik, an i ti. A celt ve ti lomi theipi kung cu a pang a hung chia i tlawmpal ah a hung ro, a hung car, a hung pur ruangmang. Cangvat sumnak caah a hnah kan herh caan hmanh ah lawh awk a um ti lo. Laimi khrihfa ai timi tampi hna ahhin midang thei tha an tlai chinnak bawmtu siloin theitha a tlai cuahmah komi lung dong lakin a tuahtu zong tampi kan um ve. A theipar kan ei cuahmah liomi hna i an nge, an kung, an hawng ziah dih kan timh tawn hna. Dum cawngtu tha nihcun a thei a tlei lomi theipi kung hmanh kha a hram tuat i nawn toih i theitha tlaiter ding ai zuam. Pakhat le pakhat thazang i pek le  i sia herh hi kan i dawtnak nganbik a si ko.Theitha a tlaimi khrihfa kan si khawhnak dingah kan zumhnak, kan hngalhnak, kan thiamnak, kan lungput kan thar chuah lengmang a hau. Biasiphainak, lungdonghnak bia chim, mi khoihvirhnak hna nih midang zong an tha a derter khawh hna bantukin kanmah lila sin zong ah a kan kir hnawh khawh. Pakhat le pakhat nawn tha ai toihmi tu si i zuam hna usih. Theitha tlai cu kan chuah hnawh chan a si.