Khamhnak le Tuahnak

Khrihfa kan sinak ah thil pahnih kong kan i fiang lo ngai. Cu hna cu: 1) Zungzal nunnak (khamhnak) hi thil tha tuahnak in kan hmuhmi a si le si lo, 2) Khrih kan zumh cang hnuah khamhnak a tlau le tlau lo hna an si. A hmasa pawl nih anmah khamhnak caah thil ttha an tuah hrimhrim a hau tiin an zumh. Vancung kai ding na si le si lo cu nitin nan nunnak nih a langhter awk a si an ti. Duhmi thil paoh tuah i ngaihthiamnak lawng a hal pengmi khrihfacu lam kam halvak he an i khat tiah George Bernard Shaw nih a chim. Keimah sual man cu keimah tein in ding a si ko. Thil ttha ka tuah man lawng in khamhnak co khawh a si timi zumhnak a si. Ruah awk a um vemi cu khamhnak kan co khawhnak ding tiang taktak hin minung nih thil ttha kan tuah kho hnga maw? Kanmah kan i dawt bantukin kan innpa kan daw kho taktak hnga maw? Lih a chim bal lomi kan m hna maw? Mi tling kan si ahcun khamh kan hau hnga maw? Rome 3 ah mi vialte mi sual kan sinak ai ttial.

A pahnihnak pawl nih an zumh vemi cu Jesuh na zumh phawt hnu paoh ahcun khamhnak cu nangmah ta a si cang. Zeibantuk na tuahsernak paoh a poi ti lo tiah an zumh ve. Khrih vel thawng in khamh kan sinak cu a tlau kho ti lo. Zeizat sualnak kan tuah tthan zong ah ngaihthiam kan si peng an ti. A cheu hoi nihcun mi nupi cung in kan sual cuahmah lioah thi hmanhninglaw ka thlataru cu khamh a si tthiam ti tiang in an chim. Ngaihthiam hal ta tthan hmanh a hau ti lo an ti. Pumpak khamnak kha an zuar. Khamhmi le khamh lomi tiin mipi kha an tthen hna. Zei hi dah khamhmi nun cu a si ti a fiang ti lo. Khamhmi nun ah an cuanter mi muisam cu Haleluiah, Amen, lam, tluk tbt khi a van si tik ah mibu he khuasak ttinak, Pathian pennak kauhternak vialte a lang kho ti lo. Mah diriamhnak men a si tawn ko lo maw?

Kan Bible hi a hram in a dongh tiang zoh kep tikah zumhnak in Pathian lungton hmasa a si zungzal ko. Abraham, Moses, le Noah nun ah a lang. Cu zumhnak cu tuahsernak nih a zulh zungzal fawn. Cucaah Hebrews 11 ah zumhnak thawng tuahnak nih thil liangngan tampi a chuahternak kong a ttial. Tuahsernak ai tel lomi zumhnak cu a thi tiah James 2:17 ah kan hmuh. A fiang ko mi cu kan zumhnak ruangah khamhnak  kan co. Khamnak a co kho takmi zumhnak nih Pathian nawl zulh ai zuam. Mi thiang Paul zong nih tinhmi ngei tein a nunnak kong, laksawng tampi hmuh awk ah kawltung leiah a tliknak kong le, cu kawltung a phak khawhnak ding caah a nun ai hremnak kong a chim ( 2 Kor.9:26f). Khrih khamhnak a ting co takmi kan si ahcun kan lu a simi Khrih leiah a lam kipin kan tthan awk a si (Efesa 4:15). Mi he kan i dawt awk a si. Mibu khamhnak ah kan i pek deuh awk a si. Rem lomi tam deuh deuh na ngeih ahcun, ee pennak chung in kai chuah cuahmah ti kha philh hlah (Rev. James Biak Peng).

Categories: Uncategorized

Leave a Reply