Value in life

Khrih A Thothan Tak Hnga Maw?

• By Chan Lian
• 20 June, 2014
• No Comments

Jesuh hi tho than bak hlah seh, ti a duhmi an um. A thawhthan sual hmanh ah mi nih zum hna hlah seh, ti a duhmi an um. Cu hna pawl nih cun thawhthannak a si khawh lonak kha a phunphun in an chim. 1) Jesuh Khrih thawhthannak hi ttawn chawmmi a si timi an um 2) A ruak an fir timi an um. 3) Nu hna nih thlan an i palh timi an um. 4) Zultu hna nih a thla an i hmuh hlauh timi an um. 5) Thlan chungah ai hrim le a nung than a timi an um. An chim bantukin thawhthannak hi um tak hlah sehlaw Khrihfa biaknak cu lihin dirhmi, biaknak thalobik , mi thinlung, taksa le thlarau a thahtu  biaknak a si hnga. Frank Morrison timi pa hi Jesuh a tho than hrimhrim lo, ti tette piah a duhmi a rak si. Khrih an vuinak le thlanmual le lungkhar le a cawngtu kong vialte cu tha tein a hlat cicek tikah Khrihfa tu ah ai cang. Ahonihdah thlan khar lung a hawn, timi cauk zong a tial i a nungmi Pathian a thangthat. Khrih thawhthannak kong ahhin bia hal ding na nei ve maw? Lungawitawm in teh na um maw?

Vawlei tuanbia ah Jesuh vailam i an thahnak cu el awk tha lomi a si. An thah hlan kum thong lio tein a thihnak ding le thawhthannak ding cu Isiah le Daniel ah tial cia a si. Amah lawng siloin in a zultu Peter, Simon, Andrew, le Philip zong vailam ah an thah hna ti kan hmuh. Khrih an vui ahhin a ruak hi puan in fek tein an reh, pound 100 tluk a ritmi lung in a thlan kuang an khuh, a thlan innkhar lung hi pound thongli tluk a rit lai an ti. Cu hnu ah thlankhar lung cu tawh in an hrenh i a thawngmi ralkap 16 nih an cawngh. Ai hrim chommi nih mah tein chuahkhawhnak lam a um lo. Zultu pawl nih ziknawh chom in fir hna sehlaw, a thothan lomi Jesuh caah an nunnak an pe ngam hnga maw? Zultu pahleihnih chungah pahra nih Khrih caah an nun an pek, pakhat cu sal ah an hruai. Pakhat tu cu Khrih a thih hlan ah hri in ai awk. A dotu nih la hna sehlaw a ruak kha khua chung zalam ah an vahpi than lai i mi hrokhrawl tiah an au pi hnga.

Nihinni tiang Jesuh ruak an hmu lo. An vuinak hmun hrawng vialte hi an cawh i an hmuhmi cu Jesuh a nau pa James thlan a si. James cu Jesuh zultu hna lakah a hmasabik an thahmi a si. Herod Agrippa nih vainaam in a chunhter hna. Zumtu pawl nih si men lai, a ruh kha bawm chungah an khumh i Jesuh thlan ah an rak vui ve. Cu bawm te cu kanmah chan ah an hmuh. A chungah, James Joseph fapa, Jesuh i a nau, tiah ca ai tial. Khrih a thawhthan hnu ni sawmli chungah minung 515 sinah ai langh. Pentecost ni ah thiangthlarau in a ra than i khrihfabu a dirh. Vawlei cung i a thawngbik ralbawi Stalin le Lenin  hna nih Russia ram ah an doh. 1910 in 2011 tiangah Khrihfa million zaruk kan karh. Thothan Jesuh Khrih cu sual phuhrung in a ummi hna ngaihthiamnak petu a si (Luke 23:34), lungrethei in a ummi hna daihnak petu  Thiangthlarau a si (John 20:19), zang a dermi zumtu hna thawnnak Thiangthlarau petu a si (Acts 1:8).