Kum Thar Nun le Jacob

Jacob caah khuacimui a si. A u Esau nih a pa a thih khawh, ruak i fimtawl dih bak in ka thah lai a timi a si. Fapa tlaupa nakin a sual deuh. A pa ro kha fianghlang tein a hal lo. Esau ah ai canter in lungfim tein in a pa a hlen. A nu nih a pu Laban sinah zam a fial. A khuallam hi tih a nung. Sahrang nih seh khawh a si. Damiah nih vuak khawh a si. Khuallam ah zawt i thih khawh a si. Ni a hun liam paoh ah riahbuk iserh i ih colh a si. Lung ai tlinh i ai hngilh lio ah a pu Abraham le a pa Isak hna i an Pathian nih a chawnh. Miphun lian ah kan ser lai, na ram a kau lai, na tefa an karh lai, a ti. Jacob nih cu pawl cu a fian zong a fiang lo, a lung zongah an lut lo. Khuazei na kalnak paohah kan umpi lai, a timi biafang nih a lung a thawngh bik. Mi sual a si ko lio ah Pathian nih caan ttha thar a pek ti ai hngalh. A cungah vel a ngeih rih ti ai hngalh. Pathian umpinak tangah cun ka him lai ti zawng a zumh. Pathian sinah biakamthar a ser ve. Kum Thar, Caan Ttha Thar pek kan si ve tikah Biakam Thar kan ser ve cang maw?

Roling tukmi biakamnak: “Atu ka khualtlawnnak ahhin na ka umpi i na ka huhphenh i rawl le hnipuan na ka pek i ka pa inn ah him tein ka kir ṭhan ahcun nangmah cu ka Pathian na si lai. Philh lonak lung ah ka phunmi lung hi na inn a si lai i na ka pekmi thil vialte cheu hra ah cheu khat kan pek lai,” (Gensis 28:20-22). Ka Pathian na si lai, na inn ka sak lai, cheuhrachuekhat kan pek lai. Zeitikin thok ding? Atu. Zeican tiang? A nun chung. Pathian pennak chung vun luh cu hihi a si. Hmai zarh ah, hmai kum ah tiin rian i chiah, saduhthah i hngahter hi Sehtan pennak tang i kan um lio te a si ( Dr. Stan Coffey). Cun Khrih tu kan Bawi ah siter hmasa loin kan ziaza i remh i timh hmasa cu a tling lo. Kan zia cu ai thleng kho tak men ko lai nain Khrih kan Bawi a si lo i kanmah ca lawngah kan nun tthiamtthiam ko ahcun kan tthang lo (Andrian Rogers). Bawipa, na caah mahhi tal cu ka tuah ve lai vun ti khawh khi Jacob nih Pathian vel a theihnak a langhnak a si.

Harnak tong lo in a um hlei lo. A pu Laban nih nupi kongah a hlen, ttuan man kongah a hlen. Asinain Pathian a umpi kha Jacob nih a theih peng. A pu Laban cu hitin a ti:  “Na fanu pahnih hna caah kum hleili kan rianh i na saṭil run hna caah kum ruk kan rianh. Cu na hmanh cun ka hmuh hnga ding ka ṭuan man kha voi hra te na ka thlen. Ka pa Pathian Abraham Pathian, Isak nih a biakmi Pathian nih khan rak ka umpi hlah seh law kut ro in na ka kalter ko hnga. Asinain Pathian nih cun harnak ka inmi le ka rianṭuanmi kha a hmuh i zahan ah bia a kan ceih cang,” (31:41-42). Pathian nih a pa inn ah kir a fial. A u Esau kong ruah ah ttihnung tuk. Hmanhseh Pathian nih kan umpi lai a ti. Voi sarih vawlei ah a kun i ngaihthiam a hal. Palhnak ah ka palh ti khawh hi Pathian umpinak hmual a si. Zeizong te a hung i lim. Bethel hmun Pathian inn leiah kal ding a si cang. A nupi le hna i an pa siasal an i kenmi le an hnatawnh vialte thingkung tangah a phum ta dih hna. Bawipa kan fuh lioah dontu kan siasal hna hi phum ta ve ding kan si. Na siasal lakah ttih a nungbik Jesuh nakin biapi deuh i na chiahmi thil kha an si.

Categories: Uncategorized

Leave a Reply