Lawmhnak Kawl Dan

Vawlei ah a man fakbik hi zeitik caan paoh ah Bawipa sin i “thanks” ti khawh khi a si. Rudyard Kipling hi Britist cattial minthang taktak a si. A cattial mi in phaisa zong tampi a hmu. Biafang pakhat a ttialmi hi dollar zakhat man a si an ti tawn. Voi khat cu thawngzamhtu pakhat nih a va fuh i na biafang fang khat ah dollar zakhat man a si an ti caah za khat kan pek lai. Zakhat man bia pakhat tein ka chim a va ti. Kipling nihcun zakhat cu ai lak i a zal ah ai sanh hnuah a chimmi cu, “Thanks,” timi a si (James Merrit). Kaa lawm timi biafang hi kan i lawmh tak i kan chimmi a si ahcun dollar million khat zong nih a caw kho lo. I lomhnak langhter hi damnak sii tthabik a si. Kan i lomh ahcun thinphannak a tlau. Vuivainak an lo. Daihnak tu kan chungah a hung lut i ilungsinak le thanuamnak in kan khat (Jerry Vines). Lohnak bia chim ding hi a kawl in kawl ve a hau. Tahchunhnak ah, ka saya pa nih sau tuk ka tuahmi ka paper a ka cohlan piak lo tikah ka thinhung. Sinain ka ruah tthan tikah a ka sunghter lo i van remh rih ti tuin a ka ti kha ka hmuh tthan tikah kaa lawm tthan. Harnak lakah lomhnak kawl zia thiam hi zumtu nun a si ve. Damnak a si fawn.

Harnak chung zongah Pathian nih a kan pekmi lawmhnak hmuh khawh a si. Matthew Henry cu Pathian mi hman a si. Voikhat cu mifir group nih kan tlaih i a phaisa bawm an chuh. Zeihmanh hman ding a ngei ti lo. Khua a ruat. A donghnak ah a ruahmi cu i lawm tthiamtthiam ko ning, ti a si. Pakhatnak ah a hlan ah firpiak ka rak ton bal lomi cungah kai lawm. Pahnihnak ah kan phaisa bawm lawng an lak i keimah an ka thah lo caah kai lawm. Pathumnak ah mifir ka si lo i firpiakmi tu ka si caah kai lawm, a ti (Great Commentary). Harnak le sunghnak lakah lomhnak a kawl khomi si hi damnak a rak si hrim ko ti a fiang. Bawipa nih kan vennak kong hi kawl khawh ahcun i lomh ding hi a dong kho lo. Kumzabu 18 lio, hlan chan rang i cit in i chawhleh chan ah a si. Mi rum William David hi zanlei inn a lawi lio ah chum nih a zelh i khua a hmu kho lo. A rang nih a hruainak paoh in an kal. Cu lioah biakinn darkhing tum thawng a theih i lam an thlau diam cang kha a hun hngalh caah lam dang in an kir i inn an phan kho. A thih lai ah a ro vialte cu biakinn darkhing tumtu rak pek dingin min a thut. Darkhing thawng kha thei loin minitue panga kal chap ahcun hrawlkuang ah tlak i a thi ding a si kha a hnu i a hun theih caah a si. Bawipa a kan dawtnak, a kan kilvennak hi a kawl in kawl i, i lomh zungzal ding kan si. Kan damnak a si fawn.

Pathian thluachuah cungah ai lawm lomi Jesuh nih a kan hlam. Ngaihchia bik a si tiah ruahmi Bawi Jesuh bia pakhat cu: “An pahra ningin an dam lo maw? Pakua tah khuazei ah dah an si kun?” (Lk. 17:17) timi hi a si. Thinghmui in a zawmi minung pahra lakah pakhat lawng nih lomhnak bia chim tikah kan Bawipa nih a dang pakua kha a hlam hna. Thinghmui zawtnak nih pumsa a ei ciah mah. Kutdong le ke dong an bul. Nganfahnak a pek. Mui zong a rawk. Mi nih zoh duh lo, zawtnak chawnh lai phan ruangah minung hawi lolo ah chiahmi hna cu thinghmuihma ngei pawl an si. Chawnh duh zong ah lam hlat piin an au hnawh hna. Thinghmui pawl bawmh ai timmi Beth Moore nih, mahhna sin i rian ttuan kai thok kaa ah ka celh lo cemmi cu an rimhaw a si, a ti (Amiri Hooker). Kannih zong hi kan sining i zoh ve usihlaw a ttha. Kan rimhaw le kan sining hi celh ding kan si ve maw. Thinghmui zawtnak phun dangdang a ngeimi lawngte kan si. Cu bu cun Pathian nih kan dawt, a kan ven, a kan thianter. Khoikaahdah a dang pakua cu an um timi ah i tel hna hlah usih. Samaritan pa bantuk in lomhnak bia chim ding hi a kawl in kawl ve hna usih. Kan damnak a si fawm. Zei si paoh ah kaa lawm ko, Bawipa.

Categories: Uncategorized

Leave a Reply