Lungdonghnak Pinleiah

Minung kan pum hi rawl loin ni sawmli a nung kho, ti loin ni thum a nung kho, thli (Oxygen) loin minute pariat a nung kho nain ruanchannak lo cun second pakhat lawng a nung kho. Kan cuap nih Oxygen a herh bantukin kan lungthin nih ruahchannak a herh (Hal Lindsay). Ruahchannak he ai ralchanh mi cu lungdonghnak a si. Minung hi kan lung a dongh ahcun kan dih ko. Cucu kan hngalh ko bu ah lungdonghnak he cun kan i hlat kho hrimhrim lo. Vawlei kan zoh i kan lung dong. Kan sining, kan rian, kan i zoh i kan lung dong. Kan chungkhar ka zoh i kan lung dong. Kan khrihfabu kan zoh i kan lung dong. A lung a dong mi minung cu amah le amah ai zum ti lo, midang zong a zum kho ti hna lo. A ruah khawhmi pakhat cu nun man ka nei ti lo ti lawng a si cang. American President lak ah an upat bikmi Abraham Lincoln zong president a si hlan ah faktukin a lung a rak dong bal ve. A lung donghnak kong cu a diary hitihin a tial: Atu  ka neih liomi lungthin zawtnak hi vawlei minung vialte sinah phawzamh sisehlaw vawlei ah ai lawmmi muihmai pakhat hmanh um lai lo. Atu ka sining hin ka tha deuh lai ti zong ka chim kho lo. Hi tining in nun peng awk le a that fawn lo caah ka that deuh lo ahcun thih lawng a tang cang (David Cawston). Minung kan ral nganbik cu lung dongh, full stop ah dir hi a si.

Lungdonghnak nih minung hi fawi tein a kan thah khawh. 2013 US ram ah minung 41,149 anmah leanmah an i that. Meithal in 21175 an i kap, hri in 10062 an i awk, sidin in 6637 an thi (http://www.cdc.gov/nchs/fastats/suicide.htm). Hi hna pawl vialte hi a lung a dong i bawmhnak kawlnak a thei ti lomi lawngte an si. Pathian he pehtlaihnak a nei lomi, zumtu hawi he thla ai campiak ti lomi, chungkhar le hawikom tha he ai hlatmi hna an si. Mithiang Paul zong nih Pathian he ai thenmi miphun hna caah ruahchannak a um lo timi cu Efesa 2 ah a hrilhfiah. Cun Rome 15 ahcun ruahchannak a hram cu Pathian a sinak a chim. Lungdonghnak a tong ve ko nain a dam thanmi hna cu Pathian a zum i a sinah thla a cammi hna an si. Sizung i um ciocio, thong i tlak ciocio ko zongah Pathain a theimi cu Thiangthlarau nih ruahchannak a pek hna. Pathian a thei lomi cu bochan ding dang an nei ti lo. Minung nih kan tei khawh ti lomi lungdonghnak pin leiah a thawngmi kan Pathian a um zungzal. Kannih nih kan i ruahchannak cu mi vialte khamhtu a si i a nungmi Pathian cungah khan kan bunh i cu a nungmi Pathian cu a zummi hna khamhtu kha a si khun (1 Timothy 4:10).

Zumlotu hna khi an lung a dongh caan ah aho khi hme an mitthlam ah a cuang hna ti ka thei kho lo. Kan nih zumtu hna kan Pathian a cuang i Bible bia kan hnathlam ah a leng. A si kho bak ti lo kan ti lio ah Pathian nih zeithil paoh a si kho ko, ati (Lk 18:27). Ahohmanh nih an kan daw ti lo kan ti lioah Pathian nih kan dawt a kan ti (John 3:16,13:34). Zeiti tuah awk kan thei kho ti lo kan ti lioah Pathian nih lam kan hmuhsak lai a ti (Phutb. 3:5-6). Kan tuah kho bal lai lo kan ti lioah Pathian keimah thawngin nan tuah khawh dih lai a kan ti (Phi. 4:13). Kanmah le kanmah kan ngaithiam kho ti lo kan ti lioah Pathian nih kan ngaihthiam hna a ti (1 John 1:9; Rome 8:1). Ka herhmi a tam tuk ai ee kan ti lioah Pathian nih nan herhmi kan pek hna lai a kan ti (Phi. 4:19). Kan tih tuk, kan phang tuk kan ti lioah Pathian nih nan thilrit vialte ka sinah rak chia uh a kan ti (1 Pet. 5:7). Kan zumhnak a der tuk kan ti lioah Pathian nih zumh khawhnak kan pek hna lai a kan ti (Rome 12:3). Kan hrut tuk kan ti lioah Pathian nih fimnak kan pek hna lai a kan ti (1 Kor. 1:30). Keimah long ka lileng, ka ngaktah, ka buangro kan ti lioah Pathian nih zeitikhmanh ah kan kal hna lai lo a kan ti (Heb 13:5). Kan lung donghnak pin leiah a nungmi kan Pathian thawng in ruahchannak kan neih zungzal awk a si. Christopher B. Harbin nihcun, hope is the last to die, a ti. Kanmah kan thih hnu lawngah ruahchannak kan neihmi hi thi te seh tinak a si.

Categories: Sermon

Leave a Reply