Lungput Hman

Kum li a simi hngakchia nu a um. A nu le a pa nih an chumhcia rawl ei awk ah cabuai ah a hung thu. Mah hi ka duh lo, mah hi ka duh lo, tiah a chim tam. A pa nih, nute na chim tam ti hlah, Pathian sinah thla tu van cam tiah a fial. Hngakchia nu nihcun, Pathian, hibantuk rawl thaw lo ruangah tutan cu kan ngaihthiam, Amen, a ti. Zumtu si fawn tung i lomh zia thiam lo pinah phunzai awk lawng a thei pengmi lungthin cu ngaihchia a va si dah! Pastor Jerry Vines nihcun hitihin thla a cam: American, Khrihfa inchungkhar, khrihfabu tha a neimi innchungkhar in na ka chuahter caah kai lawm. Iraq ah chuak usihlaw Muslim Isis zong kan si kho ve taktak. Laimi zong Khrihfa a si cangmi nu le pa nih hrinmi kan rak si hi kan i lawmh tuk ding a si. Laimi kan si nain US, Europe, Germany le Australia tbt ah hmun a kan neihtermi hi kan i lomh tuk awk a si. Na Bible kha kau law, na biakmi Pathian cu minung chunglei lungthin a zohtu a si ti kha na hmuh lai. Lungput hman, lungput tha na neih ahcun thil tha dang vialte cu anmah tein na caah an chuak luaimai lai (Pastor Dave Gustavsen).

Lungput hman nih lomh bia chim zia zong a thiam. Paris ah Isis pawl nih minung mahzat lengluang an thah hna lioah kan nih nan kan nunter mi cungah kan i lawm tihi zumtu thlacam hman a si hnga maw? Dr. Si Khia nihcun, Isis nih an thahmi hna vialte nih an tantakmi hna chungkhar dihlak caah thla kan cam hnu lawng ah kannih kan nun rih caah kan i lawm tiah kan chim awk a si a ti. Rawlei tidin awk nei lomi tampi lakah, a zaw a fakmi tampi lakah, a thi a lomi tampi lakah kan nih cu thluachuah na kan pek, na kan damter, na kan nunter tibantuk in bia kan phawh awk a si lo. Kan dam cu a zawmi caah thlacam ding kan si. Kan neih cu a nei lomi caah thlacam ding kan si. Kan nun cu a thimi hna hnemtu ding kan si. Saram siloin minung ah a kan sertu Pathian sinah kan i lawm lai. Saram cungah dawtnak kan nei lai. Innchungkhar tha kan neih caah Bawipa kan lomh lai. Chungkhar a dirhdorhmi caah thla kan cam lai. Rian kan neih caah Bawipa kan lomh lai. Rian nei lo pawl kan bawmh hna lai. Jesus zumtu khamhmi kan si caah kan i lawm lai, zumlotu caah vel kan nei lai. Hibantuk lungput nih thil tha dang vialte a luanter.

A rum nain a hrut tiah Jesuh i a timi pa nih a chimmi biacang pathum hi van re ve hmanh: Ka rawl vialte chiahnak ding hmun ka ngeih ti ṭung lo. Zeidah ka tuah ah a ṭha hnga? Aa, hihi ka tuah lai: Ka rawlruk kha ka ṭheh hna lai i anmah nakin a ngan deuhmi kha ka sak hna lai. Cuka ah cun ka rawl le ka thilri dang vialte kha ka chiah hna lai. Cun keimah le keimah cu kaa thawh lai i, Mivanṭha pa! Kum tampi caah a za in thil ṭha vialte cu na ngeih cang. Cucaah nuam tein um ko cang, ei law ding law i nuam ko, ka ti lai,’ a ti (Luke 12:17-19). Biacang pa thum te a chimmi ah “Keimah” timi biafang voi 16 a chim. Ni a tlan tertu, ruah a sur tertu, vawlei that tertu ahodah si ti a ruat bal loh. Rawlei sawm ai tim loh, Christmas tuah ai tim loh, thawhlawm thawh ai tim loh, mission tuan ai tim loh. Jesuh nih a hmanmi biafang “Mihrut” timi hi biafak a si i Phungtghlukbia chungah voi 70 tluk a hman ve. A sawh duh bikmi cu Pathian a um lo tibantukin khuasak khi a si (Rev. Heike Werder). Leviticus 23:34-44 ah biacang 11 ai tial i Bawipa min voi 12 an telh. Bawipa nih thlua a kan chuahmi cungah lomhnak bia kum khat ah ni 8 chung kan chim lai an ti.  Bawipa cungah ai lawmmi lungput hman kan neih ahcun thil dang vialte cu anmah tein an rak luang ko lai.

Categories: Uncategorized

Leave a Reply