Mi Hngar, Mi Nahchuah, Le Hakkauh (Envy, Jealousy and Greed)

UCCC childrenUCCC Sunday School

Mi hngar timi nih midang i an neihmi thilri le thiamnak cungah lunsi vang in kan um i kan nahchuah hna khi a sawh. Mi nachuah timi nih midang i teinak, minthatnak, hlawhtlinnak an hmuhmi cungah thin nuam lo in kan um i kan hngar  mi hna khi a sawh. Hakkauh timi nih zeidang vialte nakin chawva, tirawl le nawlneihnak hna lawng kan kawl pengmi khi a sawh. Mi hngar hman, mi nahchuah hman, le haukkauhnak hna hi kan Bawipa Jesuh he a kan thentu le kan minung hawi hna he a kan huattertu an si zungzal. Keimah timi kha zeidang vialte nakin a hmasabik i kan chiah tikah, vawlei ah huatnak a karh, Satan a thawng. “Keimah” timi hi mah ca thatnak kawl cu a lo ngai nain mah thluachuah rak i kham tu a rak si tawn. “A ngan bik si a duhmi cu nauta bik ah le mi vialte sal ah aa chiah hrimhrim awk a si lai,” (Mark 9:35)

Kanmah cio bang Jesuh a zultu hleihnih hna hi mi hngarnak, nahchuahnak le hakkauhnak in an rak nung ve. Thlarau tha lo nih a tuahmi hngakchia pa kha an damter khawh lo lioah Jesuh minin mi damter khotu mi dang an hmuh. Cu tikah an hngah a chuak i “Tuah ti hlah” tiah an tlauh. Cu lio hrawng i an i caih bikmi cu kanmah hleihnih lakah ahodah a nganbik lai, ti a si. “Lampi i an i almi cu, kan lakah hin ahodah a ngan bik, ti kha a si caah an let ngam lo,” ti kan hmuh. Zultu hna hi Jesuh pawng teah an um ko nain an thin lung le Bawi Jesuh cu nichuah nithlak bantuk in ai hlat. An chung taktak in an kawlmi cu mah ca rumnak, bawinak le hmunhma neihnak kha a si. Cucaah ai tordormi, a nun a nemmi, chim a ngaimi hngakchia hmang in a cawnpiak hna. Hngakchia nih Pathian cu lung thiang te le lung thin um ek in an zumh ban tukin a kan zummi le a ka bochanmi hna cu keimah ta nan si, a ti hna.

Vawlei kan nun tawite ahhin kan thilrit bik cu kan hakkauhnak, hngahchuah kan hmannak, le mi hngar kan hmannak hna hi an si. Cucu thluachuah a co lomi nun tu a si. Kut sum nakin kut samh ah tha a dam deuh. Duhfak nakin i lungsi khawh ahhin nun a zang deuh. Mi entainak in mi va bawmh ah thluachuah a um deuh. Thluachuah hmuh timi cu: 1) Vawlei chawva, thilri le hmunhma nih a tei lomi lungput neih khawh, 2) Pathian  a thei lomi thawngtha vaa chimh le mah nakin a harsa deuhmi bomh ah i nuamh, 3) Mi thalcamnak a lettu dingah Pathian nih hmanmi minung si, hna hi an si deuh tawn. Khrih cu kan lungthin tak tein kan zulh caah kan nih cu a fale kan si. A chungkhar kan si. A zultu kan si. Kanmah cu chim lo kan cung i ti dork hat te a siangmi cung hmanh ah lak sawng a um lai tiah bia a kan kamh. “Nannih cu Messiah zultu nan si ruangah mi nih ti hrai khat zong an in pek hna ahcun, cu hna cu laksawng hmu loin an um hrimhrim lai lo, ti kha va philh hlah u,” (Mark 9:41)

 

 

 

 

Categories: Ministry

Leave a Reply