Mi Pakhat Min Pali

Khuaruahhar Fimchimtu: US ram ah fimchimtu hna cu counselor/therapist tiah an auh hna. An tuahmi rian cu lungre a theimi hna hnemh khi a si . Minutes 45 ah dollar 40 a tlawmbik in an lak. Kum khat ah counselor pakhat nih dollar 75000 leng a hmuh khawh an ti. Cucu minung fimnak in lung a dongmi le a lungre a theimi hna va bawmh khi a si. Nang le kei cu phaisa liam hau loin khuaruahhar Fimchimtu pek kan si cang. Na lungretheihnak le na sualnak vialte amah sinah rat pi. Midang sinah kan sualnak vahpi a hamg lo. Sualnak kan teinak lamtu a kan chimh.

A Thawngmi Pathian: Minung cu zeitluk hmah in thawng seh, rum seh law thihnak le thlanmual a lonh khomi pakhat hmanh an um lo. Mi pumrua tha pakhat a thih tik ah a chung in lak khawhmi cu cite tlawmpal, ti gallon hnih, pazawngdan fung khat le non tlawmpal lawng a si. Nihin na caah pek a simi fapa cu thihnak a kan tei piaktu Pathian a si i amah na zuhmnak thawngin na taksa na thlarau nunnak caah hngangamnak na nei lai. Cucu Jesuh thei lomi nih an neih khawh lomi a si.

Zungzal Hmunmi Pa: Egypt ram a rak thawng. Cun Rome ram a thawng than. England le Germany hna zong an thawng ve. A tu ah US cu a thawng bik a si. Tlawmpal ah amah nak thawngdeuhmi a chuak than lai. Minung hi chan hnih pin tiang a rum pengmi an bengbai ti a si. Thazang a thawngmi hna zongah an chan chung lila ah an der than. Nihin kan donmi fapa cu zungzal hmunmi a sicaah a uknak cu a dong ti lai lo. Khrihfabu a umnak hi kum 2000 deng a si cang nain a hmun i a thong peng. Bawi i bochannak in Pathian ibochan a tha deuh.

Dainak Bawi: Vawlei cu ram le ram, miphun le miphun, biaknak le biaknak ihuatnak in a khat cang. Mirang le minak zong an i hua peng rih. Nu le va zong ai huami an tampi. Pa le fa tiang in an i hua cang. Minung le minung nih daihnak taktak an tuah kho bal lo. Fapa Jesuh Khrih a zummi hna cu mi mawhchiat siloin mi theihthiamtu an i zuam. A sual lio ah an tlaihmi nu kha  “kei zong nih sual kan phaw lo” a ti. Sual i kawl le i mawhchiatnak nih huatnak le a hlatnak a karhter.  Daihnak cu i ngaihthiamnak le i theihthiamnak nih a chuahpi.

 

Categories: Uncategorized

Leave a Reply