Minung Kan Sining Tak

Mi kong caih a tha loh an ti tawn. Hmanseh mi kong caih lo in um khawh a si lo. Mi kong kan ciahmi in fimnak, thathawhnak le ralrinnak kan i lak. Mi dang an tuanbia a thami tampi a chim khomi cu mi sersiamtu an si. Mi tha tiah kan ruahmi hna kha an tuanbia kan chim i midang forhfialnak ah kan hman. Duh a nung lo tiah kan ruahmi minung tuan bia kha midang ralrin peknak ah kan hman. Laimi nih kan miphun hawi kong kan chim bel ah i thangchiatnak, i mual phohnak a chuak deuh peng tihi zapi hmuhning a si. Mi kong caihnak nih mi dang an ngaih a chiatter mi hna an tam. Cu thil cu nitin ti awk in kan ton. Hihi kan that lo tuk ruangah a si lo. Kanmah pedan hmete in a tuk tukmi mi dang nung kha kan tah tawn hna caah a si. Milton Erickson nih cun minung  a simi paohpaoh hi an men bak lo, mah le mah i remh khawhnak thawnnak an chungah a um dih, a ti.

Minung a simi paoh nih kanmah le kan hmuhtonmi cio hmang in khua kan tuak cio. A chia a tha kan thlei dan. A hman le hman lo ri kan khiah. A tha le tha lo cuai kan thlai. A sualmi le a dingmi kan hlat hlai. Mawhchiat ding le cawisan dingmi  kan thim. Cuticun kanmah le kan pedan cio hmang in minung hawi kong zong kan caih. Kei nih mi tha tiah ka ruahmi kha mi dang nih mi chia tiah an ruah ve khawh. A taktak ah cupa cu kan ruah lo ning nak in rak that deuh khawh a si i rak chiat deuh khawh zong a si fawn. Zeicaah tiahcun kan nih nih mi kan tahnak cu an chan chungah an tuahmi thil tampi lak ah pakhat men in a si tawn. Kanmah nih kan ruahdamhak men in a thuk tukmi an lungput kha cuntin si, kha tin si kan ti men. Cutik mi dang kha an si tak lo ning kan kong kan caih hna. Minung caah in tuar a harbik pakhat cu a si loning in mi nih hmuh, thir le caihphai hi a si. King, Jr nih minung vialte hi an thatnak tampi lak ah an tlinlonak a um peng, an tlinlonak tampi lakah an thatnak a rak um peng ve, a ti.

A luancia kum zakhat ahcun teihpan mifim hna nih minung hi zeidah an si ti theih an i zuam. Tasa zawtnak a ruang an kawl i damnak si a phunphun an tuah khawh taktak. Sinain minung thinlung an damh kho lo, minung ziaza an remh kho lo. Minung duhnak an thleng kho lo. Phun dang i chim ahcun minung pakhat kong hi a fimtukmi hmanh nih a hngal thlu kho lo ti a hung si cang. Annih cu cu a si, kha a si kan ti lengmang mi ah khin kan lih a tam deuh tinak a si hnga. Cucaah tu chan mifim (anthropologists le psychologists) pawl nih cun mi dang kong fing tein theih khawhnak cu anmah tein an i chimmi an tuanbia tha tein ngaihnak lawnglawng in a si, an ti.  Mah hlathlainak le biavak vai men in mi dang an sining tak theih khawh a si lo. Mi pakhat a sining theih kan duh tak i a kong caih kan duh tak ahcun amah a bia kan ngaih a herh. Mi dang an tuanbia a hram thok tein a dongh tiang an kan chim tikah minung cu Pathian muisam keng in sermi (Gen. 5), lungkilne tein mi tha si a duh i theitha tlai a ra duhmi lawng te kan si kha a hung lang. Hihi kan i hmuh piak khawh cio ahcun Laimi nih tuanbia tha tampi chim ding kan ni lai. Kan thilrit ai chawnhmi in ai changmi miphun kan si lai.

Categories: Artical

Leave a Reply