Value in life

Moses A Hrintthan, Agur Nih Hrintthan Nun A Ngeih

• By Chan Lian
• 8 February, 2018
• 2 Comments

Kan pupa phungthluk ah ‘Hruh hmasa, fim hnudung’ an ti tawn. Minung kan chan tawite ahhin zeitik caan ah khin dah kan hruh hmasa caan cu a va si hnga i kan va fim te caan zong cu a si hnga, ti ka ruat tawn. James 4:14 ah kan nun caan hi menmei bantuk in chikkhat ah a hung chuak i a lo colhmi he tahchunh a si. Hruh hmasa ttung i fim manh ti lo hna in kan caan a liam sual kho. Moses hi Egypt siangpahrang innchung in a tthang i fimthiamnak sang pi a cawngmi a si. Pathian nih a kawh i a tthengthunh ah tthawnnak a um. Rili a cheu khawh, lung chungin ti a chuahter khawh. A der kho ding, a thi kho ding ah ai rak ruat lo. Sinain thihnak nih a ka neih cang ti kha a theih tikah, ‘Kan nunnak hi zeitluk in dah a tawi ti kha kan hngalhter law cuticun kan fim deuh lai,’ tiah thla a cam. Minung cu kum 70 in 80 kar lawnglawng a nungmi kan si zia a fiang cikcek. Cucaah vawlei kan nun hi zing ah a kho i zanlei ah a carmi belh le tawite lawng kan tum khawhmi fifik he a tahchunh (Psalm 90). Moses minung kan chan tawi le sau kong a chimmi hi a tthangcho tukmi nihin vawlei nih a lonh kho lo. Vawlei minung dihlak kan chuah in kan thih tiang kan nun caan buaktlak an tuaktikah kum sawm sarih le a cheu a si. Pa hi kum sawmruk kum riat le thla li kan si i nu hi kum sawmsarih kum hnih le thla riat a si (UNWPP, 2010-2015). Chan tling tein va nun hmanh ah kan chan a tawi hrinhran. Fim ta loin hruh buin kan liam lai cu a fak hnga dah! Nang le kei???

Zei khi dah ‘Hruh’ cu a si hnga, ti zong ka ruat fawn. Moses nih a thih lai i a thla cammi kan zoh tikah ‘Hruh’ timi hi cawnnak ngeih lo, thiammi um lo khi a si lo. Fim ko, thiam ko, ngeih ko zong ah nun caan, nun man, nun chan rak i theih lo hi hruhtaktak a si. Cu hruh nun nih Pathian a ralchanh i taksa thil a tlaihchan tikah nun thil a rit, nun re a thei. A donghnak ah ttihphannak le nun chan diriam lo buin thlankhur panh riangmang lawng a tang. Moses nih hi bia a chim hnu kum tampi a ruah ah Solomon nih fim bia, Phungthluk a ttial. Cu chungah mifim Agur bia a telh ve. Agur kong ah a pa min le a khua min lawng kan theih khawh. Sihmanhseh a bia tawite thawngin hruh nun le fim nun kan thleidan khawh. Agur bia cu a rak hruh ruangah a nun chung a tuarmi kong in ai thok: Ka re a thei tuk, maw Pathian, ka re a thei tuk i ka ba tuk cang,” tiah mifim ti in zoh chomi pasal pi a hrumai (Ptb. 30:1). Agur nih hruh nun i a phichuak cu mah le mah harnak i pek, thilrit i khinh, tha ba cicek buin nunnak liam ter hna an si zia an phuan. Moses caah cun hramhtoknak le donghnak a ngei lomi Pathian nawl ngaih lo, lung puam, thin tawi hna hi hruh taktak an si. Agur caah cun arhli bang i phawrhlawt, cangvat bang a za ti hngal loin hakkauh, ruh ngei lo lei nih lih lawng tein nunnak khamh ai zuam le, fale nih nu le pa nehsawh hna khi an si. Hi bantuk nun lungput hna cu Pathian le a Fapa theih loin ai thok. Pathian theih lo hi hruk chimpit, hruh mak taduai a si. Cucu langak kha “ka mit rak ka khoih” ti va nawl he ai lo tiah Agur nih a tahchunh. Maw hruh,hruh, hruh!

Fim timi hi zei dang pi a rak si lo. Pathian hngalh i ttihnak in ai thok (Ptb. 9:10). Cu nih nun lam dik ah a kan hruai. Moses fimnak nih 1) Pathian hmai i misual a si kha thuk piin a hngalhter, 2) A sualnak kha lungthiang tein Pathian hmaiah a phuanter khawh, 3) Toidor tein Pathian sinah ngaihthiamnak a halter, 4) Cun hitihin thla camter: Bawipa kan Pathian, kan cungah na thluachuahnak cu um seh law kan thil timi kip ah khua awng kan pemhter ko! Agur nih a thih hlan ah Pathian sin i a halmi thil pahnih hi fimnak taktak in a chuakmi an si. 1) Lihchim le hrokhrawl cu ka sinin lamhlapi ah ṭhial ko hna; 2) Chanhbaunak siseh, rumnak siseh ka pe hlah; ka ca i a herhmi rawl in ka cawm ko (Zeicahtiah tam tuk ka ngeih ahcun kan hlawt sual lai i, “ Bawipa cu aho hen dah a si?” ka ti sual lai; ka si a fah ahcun ka fir sual lai i ka Pathian min cu ka thurhhnawmh sual lai). Moses a hrintthan, hrintthan duhnung, hngar tlak a si, ka ti. A minung sinak vialte a kal tak. Zero ah ai chia. Bawipa sinah a nunnak a ap dih. Pathian thluachuah ai ham. Agur hi hrintthan nun a ngei. Hngar tlak Thlarau laksawng a co. A nun a tangmi chungah lih chim in nunnak humhak a duh ti lo. Hakkauhnak sal si a duh ti lo. Teimak tein rianttuan, lungrual tein hawi he khuasak tti le a rum tukmi Pathian inn tangah him tein khuasak kha ai thim. Aw fim, fim, fim!