Moses’ Mother

Fapa a hrin ahcun tisartlam nih an hngahmi Nile tiva ah hlonh ding a si. Israel nau chuak thar paoh Faro le a minung hna nih inn kam loin an kawl hna. A far Mirriam (kum 15), a u Aaron (kum 3) le nau ngeihtertu nurse pa hnih (Shiffrah le Puah) hna nih lungrethei ngaiin an hngah. A nu Jochebed cu a ngan a fak. Atu le a tu ai seng. Pate a si sual lai maw tiah a thin ai domh. Nurse nu nih nau te cu a vun dawh khawh tikah pate a si. Cathing nih, “Moses kha a rak chuak i fa dawh ngai a si,” a ti (Lam. 7:20). Zeitin kan tuah kun lai? A pa Amram le sal rian thi lo nung loin a ttuan. Nunnak pek in hringtu a nu tu nih thla thum chung a thuh. Egypt mi nih theih sual ahcun an nu fa in thi ding an si. A ttah thawng a thang chin lengmang. Inn pa nih an theih chin lengmang hna. Ngiathlaitu le an tam. Thuh awk a ttha ti lo. Cu tikah phaikung in an tahmi bawm pakhat kha aa lak i farthling in a phih dih hnuah Faro fanu ai khawlh tawnnak tiva ah a va chiah. Aw… nunnak pek in fale a kan nuntertu kan nule dawtnak!!!

Faro fanu nih Hebrew fa a si hngalh. Ai dawh tuk, duh nung tuk i thah ding ah a siang ve lo (Maw Pathian khuakhannak). Sianpahrang inn ah le lawi pi ttha lo. A upat deuh tiang zohkhen awkah hringtu a nu sin a phan tthan (Maw Pathian tthawnnak). Judahmi tuanbia a theitu Josephus nih, Moses cu ai dawh tuk caah pa tampi nih an rian kal tak in an va zoh tawn, a ti. A mui dawh kha a nu caah a za naisai lo. Pathian phunphun duh paoh in a biami Egypt chungkhar sin a phak tikah zeitindah a va nun te lai? A miphun a kan zahpi lai maw? A chuahkehnak a philh lai maw? Jehovah Pathian a philh sual lai maw? Moses nun ah a lang. A nu nih 1) Pathian kong thukpiin a cawnpiak, 2) Pathian thimmi Israel miphun a sinak kong fekthupin a chimh, 3) Chungkhar, ule nau, miphun hawi dawtnak kong a nun in a hmuhsak. Aw… Philh awk ttha loin kan nun a rak siamtu kan nule dawtnak!!!

Caan a liam cuahmah. Fapa Moses a hung tthang cuahmah ve. A nu sinah um awk ttha ti lo. Mitthli le hnapduk he Faro fanu sinah pek tthan ding a hung cu cang ai. A donghnak biacah: Ka fa, Pathian va philh hrimhrimhlah mu, na chuah kehnak na miphun vaphilh hrimhrim hlah mu, hringtu na nu ka si zong va philh hlah mu. Fapa Moses zong hngalh bal lo theih bal lo sin um lai a ttih tuk ve. Ka nu na sin um ka duh ko. Ziahahhen na ka kal ter lai. Zeiti chim awk ttha ti lo a nu caah. Ka fa, fimthiamnak na va cawng ta lai i na rak kir tthan te lai mu. Din loin thla kan rak campiak peng lai. Pathian nih an umpi peng ko lai. Moses a van a tthat cemnak cu Pathian aa bochanmi hringtu nu a ngeihmi hi a si. Pathian a zummi nu a ngeimi paoh cu an si a fak bal lo tiah Abraham Licoln nih a chim bal. Ka nu thla camnak nih atu tiang a ka zulh, a ka dawi peng, a ti. Aw… Mak hngal loin thla a kan campiak pengtu kan nule dawtnak!!

Categories: Sermon

Leave a Reply