Na Bia Ah Teinak A Um

Ni khat ah mi tlamtling, hawi he khua a sa mi minung nih biafang 2500 hrawng hi chim cio a si an ti. Mi sinah, kanmah le kanmah sinah le Pathian sinah kan chimmi bia hna an si. A cheu kan bia cu chim loin mail le facebook tbt ah kan tial. Chimmi bia paohpaoh an tlau kho ti lo, nunnak an ngei ve. Cun kan chimmi kan bia ah a thlummi siloah a khami tthawnnak a um. Bia kan chimmi nih mit in hmuh khawh lomi kan lungput kha a langhter. Kan bia ruangah kan nung kho, kan thi kho (Mtt. 12:37). Kan bia nih midang a sersiam khawh hna, a nun zong a hrawh khawh hna. Florida State University ah hlathlainak an tuah. Bia chiakha in hrocer lengmangmi fale cu an upat tikah: 1) Mi ttha ah an i hmu kho bal lo i thluakchiat, lungrawh le thinphan zawtnak a lethnih in a tam, 2) Rawl tamtuk ei, tlawn tuk ei, taksa dam lonak a phunphun le lung zawt nak zong an tong kun, ti a si. Cucaah setan nih bia ttha lo chimter i thihter ding in a kan zuam peng (Chuck Booher).

Thazang peknak bia le Pathian thilti khawhnak kong a kan chim lengmang tu minung an um. Ruahchannak thar an kan pek. Cubantuk hna cu kan hlam hna, kan kawl hna, kan fuhpanh hna. Khatlei ah mawhchiatnak le thihpheihnak bia a kan chimtu an um ve. Kan lungre an kan theihter, kan thin an kan phanter nain kan nun an kan thleng kho lo. Kan nun, midang nun ah zeidah a palh, zeidah bau ti chim hi thinlung nih a duh dekmak. Hmailei kong kan theih khawh lomi tiang khin biasiphai i prophet tuan kan duh. Thiang Thlarau tthawnnak i bochan loin khuachia tthawnnak kong lawngte chim kha ngaihthiam khawh lomi sualnak a si tiah Khrih nih a ti (Mtt. 12:31). Joel Osteen nih: 1) A si a fak tukmi hmurka na ngeih ahcun a sifakmi nunnak na ngei cia cang , 2) Thil ttha na duh ahcun thil chia kong lawngte na chim kho lo, 3) Teinak na duh ahcun sunghnak kong lawngte na chim kho lo, 3) Tlamtlinnak na duh ahcun a chanbaumi kong lawngte na chim kho lo, tiah thawngttha a chim. Thiang Thlarau nih a tuah khawh lomi zeihmanh a um lo timi bia hi kan caah thawngttha a si.

Kan bia hna hi Pathian he a kan pehtu hlei an si awk a si. “Bawipa min a aumi paoh cu khamh an si lai,” a ti bangin a si taktak ko (Rome 10:13). Kanmah le kanmah bia kan i ruah tikah kan piahtana kong lawngte kan i chim ahcun piahtana in kan dong. Mi nih bia an kan chimh tikah an piahtana kong lawngte kan hmuh piah hna ahcun zeihmanh an caah kan tthahnem lo. Cathiang nih: Bia na leh hlanah ngai hmasa, cu ti na tuah lo ahcun na hruh a si hleiah bia na lehmipa zei i na rel lo zong a si (Ptb. 18:12). Mi pakhat kha na zoh tikah a piahtana le a minung na tthen piak lai. Piahtana cu piahtana a si i minung cu minung a si ko. Minung kha Pathian nih a dawt tukmi a si kha na hngalhter tthan lai i a piahtana cu Pathian caah a tetuai tukmi a si kha na theihter lai (Christian Neuger). David nih Goliath cu a ttih tuk ve ko. Minung sinak a tei khawhnak ding lam a um lo. Hmanhseh Israel Pathian min in a doh ngam. Hopaoh nih kan hmaiah Goliath kan i ngaih cio. A kong caih menmen cu Goliath sunparnak chim a si. Bawipa nih a teikhawhnak bia tu tampi chim hna usih!

Categories: Uncategorized

Leave a Reply