Pathian Umnak Tette Paruk

Pathian hi a um tak hnga maw ti a ruat ballomi kan um lai lo. Pathian sining minung nih hngalh dih khawh a si lo. Hngalh dih khawh a silo ruang tuah hin biak tlak Pathian a sinak a si. A sining hngal kho dih usihlaw minung nih uk kan timh hnga, zeiah kan rel hnga lo (James Poling). Khatte leiah Pathian riantuan ning kan hngalh khawh dih lo caah kan lung a hring tawn ve. Ziah, ziah, ziah hi tihin thil a can hnga, timi kan ruat tawn. Pathian hi a ding maw? Mi thleidan a hmang maw? Thlacam a let maw? Thih hnu nunnak a um tak hnga maw? tibantuk khua kan ruah caan a um tawn. A hlei in zumhnak ah a hram a fek rih lomi thangthar kan fanau hna caah lungawitawmnak a tam khun. Zumhnak kan neih khawhnak ding caah hngalhnak zong a rak herh ve. Kan Pathian hi a nungmi Pathian, sertu Pathian a sinak a tanglei tette paruk in thazang la hna usih.

1) Minung kan pum chungah thiangthlarau cu thiamtah in ai tak. Minung a simi paoh nih thlarau kan nei dih. Cu kan thlarau nihcun lenglei ah a nungmi thlarau a um ti a hngalh khawh. Kan pupa hna nih thawngtha an rak theih hlanah khuachia zong a um i Cung Zingnu zong a um ti an rak hngalh cang. Cucu kan pum chungah Pathian thlarau a um ti a fiannak a si (1Korin 6:19).

2) Kan Bible nih hamilei ah a si te dingmi thil 2500 a chimchung i 2000 cu an tling cang. A dang zanga zong an tling cuahmah lio. Kum thong a rau cangmi ah rak tialmi Biakamhlun nih Jesuh ratnak ding le a thihnak ding kong chim i a tling dih.

3) Hlan lio thil vawlei tangah a kawlmi hna nih Jesuh kong an hmuh. 1961 ah Pontious Pilate thlan an hmuh. 1990 ah Jesuh thah ding in bia a khiaktu Caiaphas tlangbawi pa thlan an hmuh. 2014 ah Jesuh nau James, Joseph fapa timi lungca an hmuh.

4) Pathian a um lo tiah a au i tette piah ai zuammi (Atheists) minung tamtuk nih Pathian a um ko than tiah tette an khan. 2014 ah an hruaitu bik pakhat a simi Dr. Anthony Flew zong a khan ve. Cu nih vawlei pi a hnih.

5) Scientists tam tuk nih van le vawlei, minung kan pum umtuning an zoh lengmang i sertu, design tuahtu umlo cun hi thil vialte hi an um kho lai lo tiah tette an khan. Pathian nih zeitin dah hi thil vialte a ser ti le zeitindah khua a ruah tihi theih ka duhbikmi a si (Albert Einstein).

6) A thi nain a nung thanmi minung million tampi nih Pathian kong tette an khan. Pathian ceunak chungah (John 1:5) kan lut i dawtnak in a khatmi nunnak kan tep an ti. A nun than hnuah zumtu tha zumhnak a fekmi ah an i cang.

Mihrut nih cun an i thawh i, “Pathian a um lo,” an ti. An dihlak in an thu, thil ṭhalo kha an tuah; ahmaanmi thil a tuahmi ahohmanh an um lo (Psalm 14:1). Pathian tih cu fimnak hramthawk bik a si (Ptb. 1:7).

Chirhchan: AJ Maccini’s article; http://www.godandscience.org/apologetics/sciencefaith.html

Categories: Artical

Leave a Reply