Pehtlaihnak Ttha nih Lomhnak le Dawtnak a Hlawh

Khrihfabu chungah a ummi member le member, hruaitu le hruaitu pehtlaihnak ttha an ngeih tikah lomhnak taktak a um. I pehtlainak hi a phun tampi. Pumpak in kan i tong i kan i chawn bia. Phone in kan i chawn bia. Email in kan i chawn bia. Viber, snap chat, facebook tbt chanthar thil hmang in kan i chawn bia. A chel ahcun mi dang sinin kan kong ciahmi kan i theih. A ttha lei zong kan theih tawn i a chia lei zong kan theih tawn. Pakhat le pakhat i zumhnak le i dawtnak kan ngeih hmasa lo ahcun bia hi a phunphun i lak khawh an si. Kan mit in kan hmuhmi zong aa palh kho. Kan hna in kan theihmi zong aa palh kho. Kan thinlung nih a chia leiin aa kuaih ahcun thinhun le ingpuan a si ko. A ttha leiin aa kuaih a si ahcun thanuam le lunglomh a si ve ko. Aa dawmi kan si, member khat kan si timi i zumhnak a um lo ahcun i pehtlaihnak a rawk i nuam lo piin khuasak tti sawhsawh a fawi te. I zumh lonak le i phuhrunnak nih kan nun a uk ahcun i ngaihthiamnak le in ruahthiamnak te hna, thlachiat ruahnak te hna an muisam a tlau. Khrih ah pum khat a simi zumtu le zumtu, hruaitu le hruaitu, pastor le members tbt pehtlaihnak ttha van ngeih tthan khawh ah khin lomhnak taktak a tling.

Mirang pastor Brain Croft nih a bu chung nuva hna an i tthitumnak kum sawmnga tlinnak an tuah ni hi kai lomh bik ni a si a ti. Cu khrihfabu i a ttuannak kum hranak ah an tuahmi si. Ai lomh cemnak a ruang cu a rak dodal bik tu nuva an si nain atu ahcun zumtu hawi ttha ttuan tti hawi ah an caan caah a si, a ti. Pastor a ttuan ka in cu hna nuva nih an doh dal peng, a tlin lonak an chim peng caah a kum hnih nak ahcun i dinh ding tiangin khua a ruat. Sinain kei zong kai hnek, cu hna nuva hna zong nih an i hnek ve i kum li a rauh hnuah i theihthiamnak ttha, pehtlaihnak ttha kan ngei kho. Cucu kai lomhnak bik a si, tiah cu pastor pa nih a chim. Khoika hmun paoh phak zong ah, zei khrihfabu paoh i um zong ah i hmuh thiam lonak tete, i theih sual mi tete, i palh sual mi tete an um lengmang ko lai. Van i ruahthiam i van i dawt tthan khawh, van i zumh tthan khawh hi lomhnak taktak a chuahtertu an si.

US Laimi kan khrihfabu kan chan hi kum kua hra a hung phan cio hna. Pastor ttuan ka thok ka ah ka fa upa deuh hi kum 8 a si i atu cu kum 16 a si cang. Fale nih an kan tthan phuat bantukin nu lepa zong kan rak upa ngai ve cang. Kan rak herhmi le atu kan herhmi an i dang cuahmah. Hlan lio ahcun food stamp, medicaid, rian kong, mawtaw kong tbt ah kan rak buai. Hmunhma i cuh kalh, bu i tthen ah kan tha a rak baa. Laimi phun khat te a si komi hmanh ai chawn bia duh lomi kan tam pi. Kan rak mawh lonak tampi a um. Pem nih a chuahpi thil zong an si kho i kan ral sehtan kan tei khawh lo ruang zong ah a si kho ve. Sihmanhsehlaw atu ahcun cu thil vialte hna kha kan lawnh cang hna. Tthen le cheu um ti loh. Pehtlaihnak ttha kan kawl dih cang. Kan lohma nganbik a si mi kan fale (Next Generation) caah lungrual in kan ttuan caan a si cang. Nu le pa hna, hruaitu hna lungrual tein fale ca i khuakhan tti, khrihfabu caah ttuan tti tluk in a nuammi a um lo, mipem kan caah. Na khrihfabu kha na mission field nganbik a si (Sang-Chan Rah).

Categories: Artical

Leave a Reply