Peknak ah Nundamnak A Um

Nungak hei sining law, tlangval pahnih i thim awk ka hei ngei hnga. Pakhatnak pa hi phaisa kawl cak ngaimi a si hnga i thlafatin thong 3000 lengmang a hmuh hnga. Cu a hmuhmi cu ai za lo i cheuhracheukhat a pe kho bal lo. A phaisa kalnak zong ai hngal huaha fawn lo. A nunnak caah minung ai bochan. A pahnihnak pa hi thlahlawh 1500 te a hmumi a si hnga. A hmuhmi chung in 150 thawhlawm a pek i a tangmi in nun khawh ai zuammi a si hnga. Pathian ai bochan. Hi tlangval pahnih i thim ding ahhin a chawva in zoh ahcun pakhatnak pa hi i thim ding a si hnga. A lungthin le zumhnak in zoh ahcun a pahnihnak pa hi i thim ding a si hnga. Hi nun pahnih hi keimah nunnak ah ka ton veve, ka teh veve mi an si caah peknak ai tel lomi Pathian biak cu a biatu kan caah a sung tuk timi hi tette ka khan duhmi a si. Kai za lo, ka pe kho lo ka rak ti tawnmi kha, atu ahcun pek lo tu hi tuah khawh lo ding cem a si tiah ka zumh cang. Pekning a hman le hman lo tahnak tawh a um kho lo, pek chunmi te cung paoh tuah Pathian ai lawm.
 
J.C. Penny dawr a thawktu James Cash Penny hi cheuhra cheukhat in cheuhleinga ah, cheuhleinga in cheusawmkua tiang a petu a si. A dawr a thawkka ah leiba he ai ciah ve ko. Cu lio ahcun a khrihfabu ah cheuhracheukhat peknak in Pathian lungton ai zuam peng. Amah bantuk petu tampi an um. William Colgate nih a company a thawk lai ah “Pathian, ka chawva in na hmaiah zumh thlak ka si lai” tiah thla a cam. Kan theih deuhmi ah Holiday Inns dirhtu Wallace Johnson zong peknak in Pathian thluachuah a kawlmi a si. Standard Oil company a tuahtu John D. Rockefeller nih a fale tinvo a phawt hna paoh ah cheuhra cheukhat cu member nan sinak khrihfabu ah nan pek lai. A dang cheuhra cheukhat cu nan bank ah nan i khawn lai. A tangmi in nun nan i zuam lai tiah a cawnpiak peng hna (Ken Trivette). Kan Pathian hi a nung Pathian a si. Biakamnak nan tuah tikah chiatser biahrennak zeihmanh tuah hlah u … Nanmah lu chalh zongin chiatser hlah u, zeicahtiah nan samfa fa khat hmanh nan dumter kho in nan ranter kho lo (Mtt. 5). Peknak tuin ka hneksak uh a ti tu Pathian a si (Malakhi 3).
 
Khrihfabu pakhat an biakinn a rop ngai cangmi ah an mirumbik pa ai pum. Pastor nih biakinn caah pek a herhnak thawngtha a chim. Cu lioah an inncung a ropmi pelpawi nih an mi rum pa cu an hun thlak. A lung a fak ngai i thong khat ka hlut a ti colh. Tlawmpal ah a vun thlak than i thong nga ka hlut a ti than. A vun tlak than i thong hra ka hlut ti hoi. An khrihfa upa pakhat a hung dir i, Pathian fak deuh in van tu ko, tiah a au (Ken Trivette). Chickkhat lungthawh i chawva pek, silole mithmai kawl duh i chawva pek hi kei ka hman ngai tawnmi a rak si ve. Peklei paoh cu a tha dih ko nain Bible ning tein, dirhmun ngei tein chawva peknak nih Khrih ah nutling deuh, patling deuh kan sinak a langhter. Kan pek tikah minung mit in cuanh loin Pathian vancung kutka in kan hmuhmi i fiannak le i lomhnak in pe hna usih. Vancung kutka kan caah awnpiak kan si than dingmi Pathian biakamnak zong kan ruah chih thiamthiam. Tupi ramlak ah zumtu pahnih an tlau. Pakhat deuh cu lungrethei tuk in a um. Pakhat deuh cu hngangam ngaiin a um. Ziah hitihin na hngangam tiah a hawipa nih a hal. Mipa nih, thawhlawm tha tein ka thawh ko i kan pastor pa nih a kan hmuh te ko lai, tiah a leh. Lungdeih hngangamnak hi peknak ah a um.
Categories: Sermon

Leave a Reply