Philh Hmang Lo Pathian

Facebook i kan tarmi hmanthlak pawl zoh ahcun ai nuam pengmi, a tling pengmi kan lo. Ai dawh lomi le a ttha lomi kan kong kan tar duh cio lo. Cu ve bantukin zarhpini biakinn chungah khin cun mi tling, mi ttha kan lo dih ve. Ka tling ko, ka ttha ko timi langhter ai zuam mi kan lo. Sinain vawlei hi a tling lomi a si, kan nih zong mi tling lo kan si. Tlin lo hi a poi lo. Tling dih usih law vailamtah kan herh lai lo, thawhtthannak kan herh lai lo, khamhtu kan herh lai lo (Jay Lowder). Biakinn kan kalmi nih kan tlin lo ruang i Khrih kan herhnak, zumtu hawi he i komh kan herhnak, cawn rih kan herhnak, tthan kan herhnak le khamhtu Pathian thangtthat kan herhnak tu a langhter. Mi tling lo nih mitling bantukin nun i timh cu thil a rit. Pathian kan herhnak a kan hngalhtertu tu a si awk a si deuh. Mithiang Pawl nih, “Ka pum ahhin hling pakhat a ka chiah i cu hling Satan lamkaltu cu porhlaw in ka um sualnak hnga lo a ka dawntu dingah a hman. Hi kong ah hin voi thum thliahmah Bawipa sinah thla ka cam i, ka lakpiak ko tiah ka nawl. A ka lehnak cu, “Ka vel hi na caah a za ko, zeicahtiah ka ṭthawnnak cu derthawmnak ah hin a lang,” tiah a ttial (2 Kor. 12:9-10).

Mitlinglo misual nih kan sining kan i hngalh i Pathian kan fuh tikah kan thlacam a ngaih. Rachel hi Jacob nupi pahnihnak a si. A u Leah lawng nih fa a hrin khawh tikah hnahchuahnak in a khat mi mitlinglo nu a si. Sihmanhsehlaw Pathian sinah naungeih khawhnak a hal. Cu Mitlinglo nu thla camnak cu Pathian a philh lo. Fa sawhsawh hmanh siloin Israel mi mangttam in a chanhtu Joseph nu ah a ser. Pathian ai bochanmi hna cu Bawipa nih a philh bal ve hna lo. Sodom le Gomorrah meikangh lioah Bawipa nih Abraham a philh lo. Thlichia le tilet lak ah Bawipa nih Noah a philh lo. Rili sen hmaiah Bawipa nih Moses a philh lo. Chimpit vansang in a ummi Hannah zong Bawipa nih a philh lo. Chiandeih hmai ah Bawipa nih Daniel a philh lo. Sehtan tuk forhnak fak  a in lioah Pathian nih Joseph a philh lo. Goliath hmai ah Pathian nih David a philh lo. Hi hna pawl hi mitling (perfect) an si ve hlei lo. Pathian ai bochanmi tu an si caah Bawipa nih harnak caan ah a philh bal ve hna lo.

Derrick Strickland nih kan Pathian i a philh bal lomi thil pathum a chim. 1) Kan mitthli. Zumtu nih Bawipa hmai i kan mitthli kan thlakmi hi a thawl chungah ai rawm i a zoh lengmang. Zeitikhmanh ah a philh bal lo (Psalm 56:8). Rachel nih mithli tla in Bawipa sinah naungeih khawhnak a halmi cu Bawipa nih a philh lo. A caan cu a rau ko nain a rak philh hrimhrim lo. 2) Kan thlacam. Zumtu thla kan cammi hi Bawipa nih a philh lo. John nih Biatlam chungah fiang tein a langhter mi cu kan thlacam vial te hi Pathian nih sui kheng chungah a chiah hna ti a si: “Pakhat nih tingtang pakhat cio le zihmui a khatmi sui kheng pakhat cio an i put, sui kheng chung zihmui cu Pathian mi hna thlacamnak kha a si,” (5:8). Kan thlacam ai khon hna i zeitik hmanh ah a philh bal hna lo. 3) Kan ttihnak. Pathian kan ttih ruangah kan tuahmi thil ttha  hnih khat te le kan hrialmi hnih khat te hi Bawipa nih a philh lo. A cauk chung ah ai ttial hna. “Khi tikah Bawipa a ṭihmi hna cu pakhat le pakhat bia an i ruah i Bawipa nih an bia cu a theihpiak hna i a ngaihpiak hna. Amah a ṭihmi hna le an lungchung in a min aa cinkenmi hna cu a hmaika i cazin chungah an min kha a khumh hna (Malakhi 3:16).” A min i cinken le a min in bia i ruah ah khin a kan thei peng tu le a kan dawtu Pathian a si.

Categories: Uncategorized

Leave a Reply