Thawhthannak Na Lunghrinh Maw?

President Abraham Lincoln an thah hnu kum 23, 1887 ah a thlan an hlai than. A ruang cu a ruak hi an vui taktak lo timi biachokvai a tam tuk caah a si. A lunghringmi paoh nih an zoh i a ruak cu a rak um ko. Kum 14 a rauh ah biakchokvai a tam than i voi khat an hlai than. Mithmuh kuttawngh in a ruak cu an zoh cio. Bawi Jesuh a thih hnu nithum ah Jesuh ruak a um ti lo timi bia a thang ve. Sihmanhsehlaw nihin tiang Jesuh ruak an hmu ti lo. Khatte leiah, Jesuh cu a nung than ti tuin tette an khan. Mary Magdalene le a dang nu hna nih an khan. A zultu le lamkaltu hna nih an khan. A dang minung 500 leng nih tette an khan. Mangril thiamsang hna nih thil a hman tiah tette an piah khawhnak dingah voi tampi test an tuah bantukin Jesuh a nung than tinak tette cu minung hna mithmuh kuttawngha ah voi tampi a lang ve (Donald Cantrell, Easter’s Infallible Proof).

Mithiang Paul chimmi hi van ruat ve: Ka rak hmuhmi kha nannih kan pek chin hna i cucu a biapi ngaingaimi a si. Cucu zeidah a si tiah, Cathiang chungah a rak i ṭial bang khan Khrih cu kan sualnak caah a thi; cun Cathiang chung ṭhiamṭhiam ah a ṭial rih bantukin, an vui i ni thumnak ni ah thawhter a si; cun Peter sinah khan a lang i lamkaltu hleihnih an dihlak sinah khan a lang fawn, cun a zultu za nga renglo sinah khan voi khatte ah a lang i a cheu cu an thi cang nain a tam deuh cu an nung rih; cun Jeim sinah khan a lang i lamkaltu dihlak sinah khan a lang. A hmanung bik ah ka sinah a lang ve (1 Korin 15:3-8). Vawlei cung min thang vialte hna cu an thi i an ruak cu an thlan ah a tu tiang an um. Lincoln kha ram hruainak caah ruahnak hal law an let kho ti lai lo. Einstein sinah fimnak hal law an pe kho ti lai lo. Mohammed le Buddha cu au len hna hmanh law an in let lai lo. Sinain Jesuh kha na lung tak in na auh ahcun a dong lomi thawnnak, minung a thleng khotu thawnnak an pek lai. Zeicaahtiah Khrih cu a nun caah a si (David Henderson, Overcoming Death).

England ram ah a nganbik thingkung pa khat a um. Hram pakhat in kungli an kheu i tourist pawl nih zoh an duh bikmi a si. Mah thingkung cu St. Peter’s Church hnu Lady Anne Grimston thlan in a kheumi a si. Lady Anne hi mirum taktak a rak si i inn tha lo tha, hawikom thatha a neimi a si. Vawlei thil le vawlei nunnak pinah zeihmanh a um ti lo ti a zum mi, mi uah ngai zong a si fawn. A hawile Pathian a thei i thih hnu nunnak a pemhmi hna nih thawhthannak le zungzal nunnak kong an chimh tawn. Khuasik ah rose pangpar kung a thih i fur ah a hung cawrhthan bantuk khi minung cu kan si ee tiah an chimh tawn. Lady Anne nih thih hnu nunnak a um tak ahcun ka thlan chungin thingkung a rak kheu lai tiah a leh hna. A luan ciami 200 ahkhan Lady Anne cu thi in an vui. A thlan cu lung le these in an kamh dih. Caan sau nawn a rauh ah thlan cu a kak i concrete in a belh. A kak than i thing kung te a hung mang. An hrawh than i thir in an khuh than. Thir zong cu a kak than i thing hram pakhat in thingkung pali a chuahnak cu a si. Hi thil a canning hi an ruah lengmang tikah Lady Anne Grimston nih thih hnu nunnak kong a challenge mi kha Van lei chungkhar nih an cohlan caah a si, an ti (Margaret Galitzin). Vanlei chungkhar kan Pathian le a vanmi hna caah Khrih thawnthannak cu khuaruahhar awk um hrimhrim lo. Khrih a tho cang.

Categories: Uncategorized

Leave a Reply