Thazang Petu

Thazang Petu Ralchiatnak timi hi phundang cun lungthin derthawm, mah le mah cungah zumhnak neih lo, thinlung thlarau thazang der khi a si. Kan tuah duhmi kan tuah khawh lo caan ah kan thazang der. Kan doh duhmi saupi kan doh nain kan tei khawh tikah kan thazang a der. Thla kan cam lengmang ko nain an kan leh lo caah kan thazang der. Thinlung hmahmuah kan ton lengmang caah kan thazang a der. Taksa zawtnak kan ton ruangah kan thazang a der. Hngalhnak le thiamnak kan chanbau caah kan thazang a der. Kan thazang a der lio i kan tuahmi thil hna cu a hnu ah kan i chirmi a si deuh peng ti a si. Billy Graham nih, thinlung chungah ralchiatnak in a khatmi minung hna cu Bawipa nih a hmang bal hna lo. An ral a thatter hmasa hna, cu hnuah a hman hna, a ti.
 
Mi vialte nih kan herh bikmi cu thazang petu an si. Pathian nih mi vialte hi direct thazang a kan pe lo. Minung hawi tu a hman tawn hna. Cucaah thazang petu minung tampi kan herh. Mi dang thazang va pek kan timi cu mi cawnpiak a si lo. An palhnak va chimh a si lo. Thihpeih le hrocer a si lo. A chel ahcun kan sining 100 a ummi ah pakhat te nih kan thazang a derter tawn. Duh a nung lomi kan sining pakhat te lawng kha kanmah zong nih kan zoh peng i midang zong nih an kan hmuh piak peng tikah kan tha a chia. Thazang pek kan timi cu zumtu kan hawi a thazang a dermi thawnter than khi a si. A sining duh a nung lomi pakhat kha siloin duh a nungmi 99 theihter than kha a si. Hebrew holh in thazang pek timi cu mah kha dam hmasa i midang kha thawnter, damter, bawmhchanh, remh le dirter than khi a si (Frank Damazio). Thazang a der veve mi thazang an i pe kho lo. Thazang a thawng liomi lawng nih thazang a der liomi kha thazang a pek khawh.
 
Thazang petu kan timi hna hi a rum, a thiamsang mi an si hlei lo. A thi cang lai tiah kan va zohmi mizaw pa hna khi thazang petu a rak si tawn. Ngaihchiatnak a tong i kan va hnemhpi nu hna khi thazang petu an rak si tawn. Cucu Pathian an zumhnak le an i bochannak ruangah a si. Pathian nih minung cu a kan sersiam cuahmah ko ti zumhnak a neimi an si. Harnak caan tawite kan tonmi pin leiah sunparnak kan co ding a um ko timi Pathian biakam a zum khomi an si. Mi Thiang Paul nih, hi ruangah hin pei kan lung a dongh bal lonak cu a si cu. Kan mihring sinak cu duhsah tein zor chin lengmang hmanh seh law kan thlarau sinak cu ni khat hnu ni khat a thar chin lengmang. Cun harnak hmete caan tawite kan inmi nih hin, hi harnak nakin a let tampi in a ngan deuhmi zungzal sunparnak cu a kan pek lai. Kannih nih kan i zohchihmi cu hmuh khawhmi thil hi si loin hmuh khawh lomi thil khi an si. Hmuh khawhmi thil cu caan tawite lawng a nguh, sihmanhsehlaw hmuh khawh lomi thil cu zungzal in a hmun, a ti (2 Kor. 4:16-19).
Categories: Artical

Leave a Reply