Thlarau In Hrinning

Kum thar hun luh lai ah khua nan ruat cio lai. Ni kum ah mah kha rak tuah ning law timi le rak tuah hlah ning law timi nih hin minung tam bik an thinlung nuam lo in a chiah hna. A cheu cu ni kum ca lawng hmanh si loin, no lio in rak tuah palhmi le ra tuah tlorh mi ruangah zan it kho lo in khua a ruatmi an um ve. Nu va kong ah, rian kong ah, cacawnnak kong ah, fale kong ah, hawikom kong ah duh kan nun lonak tete kan ruah caan ah kan tha a chia tawn. Nunnak kong i phawrhlawt sualnak ruangah siseh, harsatnak kan ton ruangah siseh lung dong in kan um kho. Saihmanh sehlaw kan dihlak caah thawngttha cu: Kum Thar ahhin dun a nungmi, ai lawmmi nunnak thar kan ngeih kho dih ti hi a si. Kan fim hlei lai, kan thiam hlei lai, biaknak ah kan i zuam hlei lai tinak a si lo. Khrih Jesuh kha a kan khamhtu ah kan cohlan ding lawnglawng tu hi a si deuh.

Nicodemus hi mirum a si. Jerusalem ah a rum cem pathumnak ah ai tel an ti. Cun uknak lei zong thimmi a si i nawl a ngei taktakmi a si. Cun mangril thiamsannak a ngeimi (scientist) a si i Jerusalem khua chung “ti” i peknak a suaisam tu a si. A bikin biaknak ah ai pe taktak mi a si fawn i nawlbia zulh le dinfelnak ah soisel awk a um lomi a si. Sihmanhsehlaw lungthin damnak le zungzal nunnak kawl awk ah Jesuh sin a phan. Jesuh nih ti le thlarau in na hrin tthan a hau, tiah a leh tikah a khuaruah har. A lung a fing kho hrimhrim lo. “Ti” timi cu vawlei thil a si. Thlarau cu van thil a si. Jeush chim duhmi cu na nu nih an hrin lawng a za lo. Thlarau nih hrinmi na si chap hau tinak a si (Jerry Vines). Ti in hrin timi cu a hung fiang nain thlarau in hrin timi kha a fiang kho lo. Tikah Jesuh nih Moses i dar rul a tar bantukin kei zong vailam cungah tar ka si ve lai. Na nu nih an hrin lio ah nganfah a tuar bantukin thlarau in hrin na sinak hnga kan tuar piak ve lai. Cu kong na zumh i an khamhtu ah na ka cohlan tik khi thlarau in hrin na si cu a si ti kha a cawnpiakmi a si.

Thlarau in hrin tthan kan si tik ah zeidah cang? Laimi nih kan i buaipi bak. Jesuh nih fiang tein a chim. Pakhatnak, misual kan si kha i hngalh ding. Pahnihnak, kan sual nih hnahnawh ti lo ding ka si kha i hngalh ding. Khrih kha kan ceunak ah a cang i cu ceunak nihcun thil ttha lo kan tuah mi a kan hmuhter. Kan sualnak cu kan i hmu nain cu nih hna kan hnawh ti lo. Zeicatiah, Khrih nih a kan in piak cang. Thil ttha lo kan rak tuahmi dihlak, bia dawh lo kan rak chim dihlak, khua ttha lo kan rak ruahmi dihlak, lih kan rak chim dihlak kha ngaihhtiam kan si cang. Kannih kan rian cu thlrau in hrinmi si lawnglawng a si. Thlarau in a hrin ththanmi hna cu an chunglei in lomhnak an ngei. Cucu chunglei in ai thok i lenglei nunkha thlen. Huatnak lungthin in dawtnak lungthin ah an i tthial. Uahnak le lungkhonnak lungthin in toidornak le nemnak ah an i tthial. Lih chim lengmang nak in biatak chimnak an an i tthial. Lungfahnak in lung damnak ah an i tthial. Thlarau in hrin tthan mi cu zithli nem tein hranh he khi Jesuh a tahchunh. Kumthar ah hi nun hi ngei cio ko hna usih! (John 3:1ff).

Related posts:

Tih A Nungmi Thlennak
Lungput Hman
Lungrethei In Um Hlah
Categories: Uncategorized

Leave a Reply