Ti Lum in Ti Tlawk ah (From Hot Water to Boiling Water)

Tisa kan so tikah dergee 211 a phanh ah khin a linh cu a lin taktak cang nain a tlawk rih lo. Degree 212 a hun phak taktak lawng ah a tlawk. Degree pakhat te lawngin ai dang ko nain linh le tlawh nih sining tam tuk a dan ter. A tlawk taktak lomi ti cu a hrik a thi rih lomi ti a si caah ngandamnak a chuahpi lo. Hmuitinh a phan lo. A theipar a chuak lo. Khrih a thawhtthan hnuin Pentecost ni i khrihfabu a dir karlak hi ni sawmnga a rau. Khrih a nun lioah cun zultu pawl Peter te hna kha an linsa ngai i Khrih ram ca i hruaitu si ding ah degree 211 an phan ti khawh a si. Sinain, an tlawk taktak lo. Khrih kha an mit hmuh in an sin i a um ti lo tikah Khrih fialmi rian cu an kal tak i nga tlaih ah an kal tthan. A linsa ngai ttung i a tlok tak lomi khrihfa si khawh cio kan si. A linsami tiang ah i zat i a tlawh tak tiang a cuan kho lomi member zong kan si kho. Hi kong hi 2018 chung kan kar hlannak ah lung fim tein kan ruah a herh ko. Khrih zultu ttha kan sinak hi degree 211 lawng in kan tah a si ahcun a chim thiam, a tthangtthat tui, thlacam tthawn le Bible theih tam lawng khi kan pedan a si peng hnga. Degree 212 in kan tah ahcun degree 211 kan sinak thawngin nifatin kan nunnak ah Khrih tette taktak kan si maw? Kan chawva, kan lungput, kan biakhiahnak le kan zumhnak ah Khrih hi a bawi taktak maw? Midang caah eibar kan chuahnak a um taktak maw? Lungfim tein in tlawh kai tim maw? timi kan zoh chih cang lai.

Tisa tlawk bantukin damnak caah din awk a tlakmi zumtu kan si khawhnak ding ah Khrih chimh ngaih kan hau. Peter le a hawile hi mi nauta ah kan ruah sual hna lai. Tinbawta an si. Khuaticaan, rili tiva umtuning, tizung ngacel kawlhawl dan a thiam i a paw ai cawmmi an si. Amah chan ah tilawng a ngei khomi cu atu lio rili ah tinbaw ngan pipi in nga a tlaimi company tluk an si. Nga tlaihnak boat hmete 2018 Sea Chaser 27 HFC khi dollar ting khat le thong kua an hauh va si kaw, Khrih zultu ngatlai pawl hi mi menmenlo an si. Mah zan tu cu zan khuadoi sur an chep, an tlai lo. Khrih nih, nan vawrhlei kam khan vun chep uh, a ti hna (John 21:6). Al lo tein Khrih nawl an zulh i tampi an tlaih. Keimah ai ti vemi nang le kei hi nitin kan ttuan i kan thiammi rian kong ah cu tin tuah, kha tin tuah kan ti ve hna sehlaw zei kan lawh hnga. Kan i nautat tawn ko lo maw? Kan nih a chuak tawn ko lo maw? Hibantuk mihring lungput menmen cu tisa tlok siloin a lum lin sawhsawh mi lawng a si rih. Bible thiam Andreas Kostenberger nih, thawngttha pali chungah Khrih tel loin zultu hna nih nga pakhat hmanh an tlaih ti a um bal lo, a ti. Amah Khrih hrimhrim nih “Keimah loin nan tuah khawhmi zeihmanh a um lo,” a kan ti (John 15:5). Minung sinak in kan linsa ngai kho ko. Sinain Khrih nawl zulh lo, i hngek nun ngeih lo cun kan tlawk tak kho lo. Eibar kan chuak kho lo. A linh lawng a linsa i a tlawk kho tak bal lomi cu Khrih tel loin sur cheh he ai lo.

Khrih loin kan tlawh khawh ve lo bantukin kanmah tel loin Khrih nih tlawhter a kan duh ve lo. Minung thong nga rawl dangnak caah hngakchia pa chuncaw a hman. Misur zu caah mipi ti a thanter hna. Lazaruh thawhnak dingah mipi kha thlanlung a tthialter hna. Kanmah tein thlaici tha kan tuh hau. Ti kan toih hau. Cu hnuah Khrih nih a thei a parter. Kei nih a ci ka tuh, Apollo nih a kung kha ti a toih, sihmanhsehlaw a ṭhantertu cu Pathian a si (Degree 212, 1 Kor. 3:6). Johan cu a ra i rawl a ul i zu zong a ding lo, asinain a mi kip nih, ‘Khuavang a ngei,’ an ti. Mi Fapa cu a ra ve i a ei a ding i a mi kip nih, ‘Hi pa hi zohhmanh u, misaram le mizuram, ngunkhuai khawltu hna le misual hna hawikom hi,’ an ti. Sihmanhsehlaw Pathian fimnak cu a hmaan tiah a theitlai nih khan a langhter ko (Matt. 11: 18-19). Nihin nun ah thei a tlai lomi praise and worship, thlacam le tiphul cu 211 degree lawng a si rih. Kan hrintthannak hi nitin kan nun ah tlawk seh. Amen. Kan chungkhar ah tlawk seh! Amen. Kan rian cio ah tlawk seh! Amen. Kan khrihfabu meeting ah tlawk seh! Amen. Kan pekchanhnak ah tlawk seh! Amen. Degree 212 hi 2018 kan pedan si cio seh!
Note: Tisa tlawk kong idea hi Series: Gap Leadership by Steve Jones sinin lakmi a si.

Chan Thawng Lian

Categories: Uncategorized

Leave a Reply