Tih A Nungmi Thlennak

Biaknak kan ti ko zongah a dam lomi lungthlennak (pianthar) hi tih a rak nung tuk. US minung tampi hna nih Islam (ISIS) ah luh an duh. A ruang cu biaknak hman an kawl siloin lehrulcham duhnak mental problem nih a uk hna caah a si (CNN News). Thinlung hi thil pahnih ruangah a ngawr kho. Pakhatnak pawl cu midang nih an cungah an tuahmi thil kong ah a chung in a lung a rak fak pengmi hna an si. Cu chunglei i erhmi lungfahnak nih an lungthin a ngawrter i lehrul chamnak caan tha an hngak. Hawi an hmuhnak hmun cu biaknak le bu chungah a si tawn. Kan tuar ve ko tiin a sual lomi hngachia cung hmanh ah thil tha lo tuah an ngamh. An paintharnak cu terrorist sinak ah ai cang. Pahnihnak pawl cu an no lioah dehcawh a tongmi (abuse), ngaihchiatnak fak a tongmi (trauma) an si i an chungah tihnak le duhtlin lonak ai erh. An pianthar tikah lenglei an tuahmi cu ai dang ko lai nain an kawl taktakmi hi mah lung diriamhnak a si tawn. Cutikah biaknak lam le sul pawl an i rit pi. Carl Marx nih khrihfa hi bing a rimi nan lo a rak ti bal. Cucaah thlennak hman timi cu lenglei kan tuahmi in tah khawh a si lo. Kan chung ah kan erh i a ngawrmi kan lungthin i thlen, dam khi a si (Ulmann). Lehrulcham duhnak le mah thinlung diriamh duhnak kha a thi i Khrih Jesuh nih a kan fialmi dawtnak le a mission rian ah nun i phum ding kha a si. Mi zeihmanh hi Khrih he an i peh tlaih tikah cun a nun hlun kha a lo cang (1 Kor. 5:17) a ti bantukin kan chung i a dam lomi lungput kan erhmi te kha kan kal tak a herh. Cu hnu ah a dammi thingkung thei tha tampi a tlaimi ah Bawipa nih a kan ser lai.

Muslim cheukhat pawl cu Allah timi an Pathian nih dinnak caah ral a do i a thimi cu vancungkhua ah nungak dawhdawh nih an rak don hna lai tiah a rak chimmi kha an i lak i anmah duhnak in an hman. US ram hi Muslim tampi nih an huat. A ruang cu a lang hlat in a heih uk hna, an nunphung a thlen hna mi an rem lo. Democracy ram ah thlen a timhmi hna an duh loh. Cu ti US cung i an lungfahnak kha Muslim piangsual Jihadist  tiah an auhmi hna nih an lung chung ah an erh. An biaknak ah kan piangthar an ti nain an lung kilne ahcun lehrul cham duhnak in an khat. US cozah an doh khawh lo caah an thah khawh ve mi nu le hngakchia tiangin an thah ve hna. Mah lungfah ruangah a sual lomi minung cungah thil tha lo a tuahmi cu terrorist an si. Atu ahcun Muslim lawng an si ti lo, US cungah ah a lung a fakmi US citizen lila hmanh kha ISIS ah an lut, luh ai timmi zong an um len ti a si. ISIS pawl nih sualnak a nei lomi thawngzamhtu mingnung pathum an lu an tan cang hna. An i tlaihmi cu Allah caah ral kan tu ti a hei si faw. Chim duhmi cu biaknak hmang in thil tha lo tampi an rak tuah bal, atu an tuah cuahmah, hmailei zongah tuah khawh a si. Cucaah Rome 12 ahcun cunglei Thlarau nih nan lung thin kha a dih umek nakin in thleng hna sehlaw a hmanmi thil le a dikmi thil nan theih khawh lai. Cun hnu lawngah nan nunnak nih Pathian a lomhter lai tiah a kan cawn piak. Pathian bia ah thlennak kan timi nih hin kan lung kilne te in kan i uammi thinhannak, lehrul cham duhnak siloah tihnak, hakkauhnak, phawrhlawtnak kha a thah tu in a thah awk a si. Khrih tu kha kan nunter i dawtnak, ngaihthiamnak, le ruahchannak ngan pi he kan nun awk a si.

Categories: Uncategorized

Leave a Reply