Toidornak cu Suilungvar A Si

Mi kong an kan chimh tikah annih cu mi toidor a si an ti ahcun kan tha dam, mi phawrhphlaw a si an kan ti ahcun kan si vang. Mi tang i ai dormi cu kan duh tuk hna nain kanmah bel tangdor nun neih kan i harh. Dan Rogers nih: Toidornak timi cu thuhmi suilungvar, man a nei tukmi a neitu caah a sunglawi tukmi thil he ka tah chunh. Minung a kan ceuter khotu taktak cu kan lung kilne i kan i neihmi toidornak khi a si, a ti. Toidornak he ai ralkahmi cu phawrhlawtnak silole uahnak a si. Phawrhlawtnak cu mirang nih pride tiah an auh i thil ka ti kho, thilri tha ka nei kho timi lungput he Pathian hmai le minung hawi sinah nun khi a si. Ka thilti khawhnak hna hi keimah thawng in a si ti lungput neih khi a si. Minung hi kan kokek sinak in mi phawrhlaw kan si. Keimah duhning in si seh, mi nih ka cuan hna seh, ka thangthat hna seh ti a duhmi kan si. Mi toidor a si tiah minthatnak medal an pekmi pa nih a minthatnak cu a hawng ah ai awih i an chuh than an ti tawn bang toidornak min hmanh i put zau in phawrhlawtnak a kawlmi kan si. German Proverb ah luantuk lehpek in ai tordor termi cu mi uah an si, ti a um. Sihmanhsehlaw mi phawrhlaw cu rawhnak kan phan lai. Bawipa kha ṭih, mi toiah i dor law rumnak le upatnak le nunsaunak kha na hmuh lai (Ptb. 18:16; 22:4). Pakhat le pakhat i entainak le mah pumpak thangṭhat kawlnak kha nan lakah umter hlah u.

Zeiruang ko ah hen, kan thilti khawhnak hna hi Pathian nih laksawng a kan pekmi a si tiah kan lung kilne tak in kan cohlan khawh hnga lo tiah thawngtha chim thiam Kenneth Boa cu a hrum ai len. Pathian nih a sunparnak langhternak ding caah thil ti khawhnak a kan pekmi pahrang kanmah sunparnak kawlnak i kan hman hi cu kanmah le kanmah chiat kan i sirh a si tiah Matt Chandler nih a ti ve. C. S. Lewis nih, i din thiam lo le i nuam lo lungrethei peng in an chiatu keimah timi na lungput kha hlo cang. Pathian nih ka thei seh ti an duh. A thawnnak pek an duh. Pathian na theih tak a si ahcun toidorinak na nei lai i na lung ai lawm lai, tiah a tial. Mi pakhat khat kha mi lianngan a si tak maw si tak lo ti hngalh khawhnak ding ah a hmasabik test a haumi cu ai toidor maw dor lo ti hi a si. Mi lianngan taktak nihcun an lianngannak kha anmah ah siloin Pathian thawngin a si ti kha fiang tein an hmuh khawh caah dong loin le mihrut zong lo lakin an i tang dor (John Ruskin). Nihnak cu ai toidormi minung hna caah Pathian pekmi laksawng a si. Mi uah le ai phorhlawmi hna cu an pawpi nih zeitluk nih a duh zong ah mi nih nek lai an tih i an ni kho lo. Mi toidor cu keimah timi ah a buai ti lo caah thanuam te le zalawng tein a ni kho. Nika le thlapa bantukin mi vialte in an ka cuanh, keimah cu zeizong vialte i a laifang ah ka um timi lungput hi nei ti hna hlah usih. Toidornak lungput he kan minung hawi sin le kan Pathian hmai i nun hi minung sining ah a thabik, a hmanbikmi nun a si (Terry Lindvall, Surprised By Laughter: The Comic World of C.S. Lewis).

Mi toidor si kan duh cio. A ruang cu ai tordormi nih upatnak tu an co caah a si. Ai toidor mi tu cawisan than an si caah a si. Amah le amah ai thum hmasami nih teinak an hmuh caah a si. Kan Bawipa Jesuh Khrih nih vawlei a teinak zong toidornak in a si. Nang le kei ka ti khawh, ka tuah khawh tiin kan au lioah Jesuh nihcun Fapa nih amah tein zeihmanh a tuah kho lo, a ti (John 5:19, John 8:28). Keimah nawl, keimah duhning in kan ti lioah Jesuh nihcun keimah duhning siloin a ka thlahtu ka Pa duhnak lawng ka tuah, a ti (John 5:30; 6:38). Upat ding kai tlak, thangthat ding kai tlak kan ti lioah Jesuh nihcun mi sinin thangṭhatnak hmuh ding kha ka kawl lo, a ti (John 5:41). Phungchim ka thiam, cawnpiak ka thiam, music ka thian kan i ti cuahmah lioah Jesuh nihcun ka cawnpiaknak hi keimah ta a si lo, ka Pa sinin a rami a si, a ti (John 7:16). Kan min tang seh, mi nih ka cinken hna seh kan ti lioah Jesuh nihcun Kei cu keimah lila sunparnak a kawlmi ka si lo, sihmanhsehlaw a ka kawlpiaktu pakhat a um i amah cu keimah ṭhatnak in bia a ceihtu kha a si, a ti (John 8:50). Khrih chung in a ummi kan sinak thawngin kan Bawi Khrih kan lawh chin lengmang ding hi Khrihfa kan hmuitinh a si. Kan thil ti khawhnak, kan neihchiah, kan i dawhnak, kan thawnnak, kan fimthiam kongah Pathian thawng lawnglawng in a si timi kha lung kilne ah ai sehchih khomi kan si cionak lai Bawipa nih thluachuah kan pekpiak ko seh. Amen

Categories: Sermon

Leave a Reply