Trump nih Jesuh Zum Hnga Maw?

Donald Trump nih Jesuh a zum hnga maw? President a si hnuin a theih hmasa bik thawngttha bia a chimtu cu Southern Baptist pastor Robert Jeffress a si. Amah hi St. John’s Episcopal Church in D.C. i a ummi First Baptist Church ah senior pastor a ttuanmi a si. Biahmaithi bantukin a chim mi ah: 1) Mormon pawl cu bulobu an si, 2) Islam biak nak cu khuachia biaknak a si, 3) Roman Catholic biaknak cu khuachia nih a hruaimi a si, 4) Gays pawl nunnak cu ttih a nungmi le a thurhnawmmi a si, tiah a chim caah mi tampi an lau colh. Trump cu Pathian thimmi hruaitu a si ti fehternak ah hi Bible hi a chim: “Khuacaan siseh, caan kha siseh, a thlen lengmang hna, Siangpahrang kha a ṭhumh hna i a kaiter hna; Mifim kha fimnak a pek hna i a hngalmi kha hngalhnak vialte cu a pek hna,” (Denial 2:21). Miphun nih a herh tuk lio caan ahcun uknak lei hruaitu zong silo, biaknak lei hruaitu zong siloin mi sawsawh Nehemiah kha Pathian nih a thim bang Trump hi thim a si ve timi a langhter. Kulhnak vangpang sak hi Pathin nih a duh, a ti. Jesuh kong pakhat hmanh ai tel lo.

Pastor Jeffreess caah Jesuh maw a ngan deuh Nehemiah dah? Ni sawmnga le ni hnih ah Nehemiah nih vangpang sak a lim. A ruang cu: 1) Pathian thimmi hruaitu a si, 2) Dodal tu hna an bia a ngai lo, a biapimi tu a ttuan, 3) A ttuanmi rian lim khawhnak ding caah Pathian tthawnnak ai bochan, timi hi pastor pa i a thawngttha muru cu an si. Hi thawngttha hi US president a ttuan balmi hna sinah chim balmi dang he an i lo lo. Dawtnaknak le tordornak kong tu siloin midang khamnak vangpang a phunphun saknak lawngte a si, tiah US tuanbia thiam University of Notre Dame i siang cachim Daniel Silliman nih a ti. Mah duhnak tuahkhawhnak ding caah Pathian i bochan a um ve. Jesuh nih cun a Pa duhmi mi vialte khamhnak ding caah Pathian kha ai bochan (Luke 4:18).

President Trump hi amah duhnak tuahkhawhnak caah Pathian aa bochan mi siloin Pathian duhnak a kawlmi a si nak hnga zumtu hawi nih thla kan cam a herh. Billy Graham nih US president tampi sinah a chim lengmangmi cu: Thla fakpiin cam ulaw Pathian duhnak hngalh i zuam uh, cun mi tampi nih thla an kan campiak ti zong thei zungzal uh, ti a si. Mipem le ram dangmi hna cungah Trump nih a tuah cuahmah mi ruangah a di a riammi tampi kan um. A ttap a hrammi le thinphang thlalau in a ummi rel cawk lo kan um ve. Hi lio caan ah Pathian bia nih: Harnak a phak tikah ka au u, kan khamh hna lai i nan ka thangṭhat lai,” a ti (Psalm 50:15). President Ronald Reagan nih 1984 ah hitihin a chim: Pathian nih America a herhmi nakin America nih Pathian kan herh deuh. Trump a tanhmi kan siah, a ttihmi kan siah kan herh bikmi cu Pathian umpi nak a si ko. America hi vancung changtu a si lo, Pathian he umttu hi PENNAk chungah um a si.

Chirhchan: Washington post by  Sarah Pulliam Bailey; Acts of Faith newsletter

Categories: Uncategorized

Leave a Reply