US Laws le Khrihfa Nun

Kan dawtmi hna cungah thinhun buin kan chimmi bia le kutke kan zomi hna hi Pathian nih a duh lo lawng siloin US biacaih zung nih a huat tuk. Ttih a rak nung tuk. Kan khrihfabu ah lawyer pakhat kan auh i ai daw komi hna an sik ruang i a chuak mi buainak kong a kan chimh. Nu le va, u le nau, i duhmi, hawi le kom, minung hawi cung ah bia chia a chimmi paoh hi taza cuai khawh a si, a ti. Cun kutke a zomi cu a reng a sang chinchin. Kuh le reh i nupi le maw vale maw kal kho lo in tuah zong ah thong thlak khawh a si, a ti. Kan thin a hun hnu ka tuahmi a si ahcun kut dong in sawh le kheuh men sual zong ah thong thlak khawt a si. Kan fale kan cawnpiak hna i kan tuk velh hna zong ah thong thlak khawh a si. Tih a nung deuhmi cu i sik ruangah mi ruh khiah sual, thi chuah sual, pum chung ah hmape va chuahter le zapi tlawnnak hmun i i sik, i vuak hna hi an si, a ti. Kum saupi ramlak prison ah thong thlak khawh a si i a niam deuh ahcun innlak thongin jail ah caan sau nawn chiah khawh an si, timi a kan chimh. Hi kan sihni pa nih a kan chimhmi ka ngaih tikah, khua a ka ruahtermi pakhat cu inn chungkhar chim lo khrihfabu he ai pehtlaimi meeting kan tuah hmanh ahhin palic auh ahcun thong a tla ding kan um kho ko hi ta ti a si.

Palik auh hi a ttha maw timi kong a chim rih. Palik auh paoh ahcun a palhmi pakhat paoh cu tlaih i thong thlak a si. Pa hi a a tam deuh an tlaihmi an si nain nu tampi zong biachia chim le kutzo ruangah an thlaih ve hna, a ti. Nu le va, u le nau , hawi le kawm bia el ruang ah palik a au mi minung 100 ah 80 cu an i chir tthan, a ti. Cutikah thong a tlami an dawtmi hna kha luat tthan hna seh tiah an nawl hna. Sihmanhsehlaw a ka vuak ko, biachia a chim ko timi tehte caah biaciah zung nih an auh tthiamtthiam hna. Luat tthan seh tiah biacaih zung kal a duh lomi an um ttheu. A kal mi zong nih a ka vua tthan lo tibantuk in lih an chim ahcun lying to the police timi lih chim hmuh sang tak in taza an cuai tthan ve hna. Hibantuk minung hawi cungah bia chia chim, mi cung i kutke zo timi cu biacaih zung nih a ngai thiam kho lo i a ingtu kha tette siter hrimhrim ding in an auh hna. A kal duh lo mi, lih a chimmi kha taza an cuai ve tthan hna, a ti (County le State tu cun ai dang men lai). Cun mi hro hmang, mi velh hmangmi sinin midang pawngkam ummi an him lo caah dantat ta hrimhrim kha cozah lei nih an i zuam. Cucaah na dawtmi hna he nan i sik tikah bia ttha tein i caih khawh i zuam u law nan nunnak ca i ttih a nun taktak lawng ah palik na auh lai tiah a kan cawn paik. Ka fa thil bahnak i ka rak tuk lio ka ruah ah ka tuk a sum ngaingai. Biachia kha chim zong hi ttih a rak nung tuk hi ti ka fiang chinchin. Palik a ua tu ca he a sual tu ca he ttih a rak nung tuk. Rian a rak tam tuk.

Filipi dal 2 ah entainak cu nan lakkar ah a um hrim umter hlah uh tiah a kan cawn piak. Tordornak tu i ngeih dingin a kan fial. Luke 12 ah a rum ngai ko, a tthawn ngai ko, a fim ngai ko mi a lo nain Pathian mit hmuh ah a hrut taktak mirum hrut pa kong a kan cawn piak.A hruh biknak a ruang cu amah tining, amah hmuhning, amah ai nuamh ning lawng in zapi sinah khuasak ve ai timhmi kha a si.Filipi khrihfabu hna cu chimh ngaimi an si i Paul nih lungthiang tein Khrih nun hi cawng uh a ti. Cucu toidornun, i ttthumh nun kha a si i a hnu ah Pathian cawisan te ding bia kamnak kha a si. Laimi mi tlawmte te Pathian a zum ciocio mi kan lak ahhin tordor nun hi um kho ve ding in cawng hna usih. Jeim le John bantukin tthutden khawl kha kan ral a si. Khrih nih cun a tthut den a kal tak hmasa i minung menmen kan tang ah ai dor. A ral kha a hua hna lo, a lehrulh hna lo. Vailam cung in ngaihthiam tu a hal piak hna. Cucaah Khrih cu sunparnak pek a si i mi vialte nih Bawipa kan ti. Kannih zong i tthum ve hna usih, chungkhar ah, hawikomh sinah, khrihfabu ah kanmah duhnak nak in kan bu dihlak ca tthatnak kawl i zuam hna usih. Biachia chim le kutke zo duhnak lung thin cu toidornak lawng nih a tei khawhmi a si. Mi tling lo ka si ve, a palh kho mi ka si ve, keimah nak fim deuhmi tampi an um timi lungput hna hi todor nun an si (Wiki How).

Related posts:

Fig Tree for people (Mi Vialte Caah Theipi Kung)
Leiba Sal Maw, Bawipa Sal?
Trump nih Jesuh Zum Hnga Maw?
Categories: Uncategorized

Leave a Reply