Vanmi An UM Tak Maw?

Richard Dawkins hi mithangbik scientist, catial thiam Pathian a bia lo i biaknak vialte um hna hlah sehlaw vawlei hi paradise a si ko hnga. Zeithil paoh hi Pathian tel loin anmah tein duhsah tein a ummi an si dih. Cucu evolution theory a zumlomi paohpaoh cu mihrut, thluaktawlmi lawngte an si. Cu hna pawl nih a um tak lomi thlarau an zumh ruangah vawlei hi a buai dih. Mifim nih Pathian kan herh lo, a ti (Beliefnet Interview). Vancung i minung an i chawh khawh ka ahkhan Russiah pa van in a rak tum i a chim hmasa cemmi cu, van pumpaluk ah Pathian ka va kawl i ka hmu lo ti a si. Cu bia cu Dr. W. A. Criswell nih a theih tikah, van a um lioah a van kainak uniform kha i phawih sehlaw Pathian cu a hmuh colh lai tiah a leh (Ray Prichard). Thlarau riantuannak cu vawlei minung tuaknak in tehte piah khawhmi a si lo. Dawhnak te hna, dawtnak te hna, kan pawng i khuaruahhar thil vialte hna hi tette in piah hawk an tha lo. Zeinidah him tein a kan umter timi zong tetet piahkhawh a si lo. Kan nunnak tu nih a ton in a ton i ai lomh pi (Peter Marshall, US Senate i an pastor). Kum Zabu palinak ah a rak ummi Bishop Hillary nih, zeihmanh a um lo kan timi hmunhma vialte ahkhin Pathian vanmi lawngte an khat, a rak ti bal.

Vanmi an um maw, Thiangthlarau rian a tuan maw, timi vialte cu Naute Jesuh chuahnak ahhin a fiang dih. Hi ka zawn i ai fiang kho lomi cu nunnak ah a herhbikmi Pathian le minung, van le vawlei hna an i pehtlaihnak kong a biapibik an fian lo caah thil dang an ruahmi vialte a ping an si dih. A luan ciami kum 2000 lio ah kan vawlei hi Pathian nih a Fapa Jesuh hmangin a rak kan len nak kong an thei kho ti lo. Cubantuk minung cu zeitluk an hngalhnak a san ko zongah an hrut (Ray Prichard). Vanmi nih Mary cu fa na nei lai a ti. Vanmi nih Joseph cu na fa min ah Jesuh na sak lai tiah a chimh. Arfi nih mifim pawl lam a hruai hna. Vanmi nih tuukhal pawl sinah hla an remh. Vanmi nih mifim pawl an mang ah lam dang in tlun ding an chimh hna. Vanmi nih Jesuh zampi ding le tlun than ding kha Mary le Joseph an chimh hna. Syria ralkap nih an kulh dih hna i awlawkchawng in an um lio ah Elisha nih a sin um pa cu hihihin a ti: “Ṭih hlah, zeitintiah kan sin i a ummi hna cu an sin i a ummi hna nakin an tam deuh,” tiah a ti. Cun Elisha nih thla a cam i, “Maw Bawipa, a hmuh khawh nakhnga, a mit hi hun auter ko,” tiah a ti. Cucaah Bawipa nih tlangvalpa mit cu a auter i a hmuh; cun zohhmanh, Elisha velchum ah cun, tlang cu rang le mei rangleng in a khat (2 King 6:16-17).

Angels, God’s Secret Agents timi cauk ah Billy Graham nih hitin a ti: Pathian vancungmi an um taktak tihi minung hna tete an khan meenmen mi ruangah kan zumhmi a si lo. Pathian bia Bible ca nih fiang tein a chim caah le Pathian bia cu a hman zungzal caah ka zumh a ti. Cun  Pacific thlanglei New Hebrides tikulh ah mission a kalmi John Pollock le a nupi kong a chim. Mah ti kulh i a phan hmasabik missionary an si i an khua i a ummi khuavang neinu nih a huat hna, a tih zong a tih fawn hna. An khuami pawl kha khuavang neinu nihcun nan zozkzok hna lo ahcun nan fale an in thah piak dih hna lai tiah bia a phuan. An khua pi tein missionary nupa hna thah ahcun an i thoh. An nupa cun kup bil in zan khua dei thla an cam. Caan a hung liam i an khuabawi tiang in Khrihfa ah an i thleng. Ziah mah lio ahkhan nan kan thah lo tiah an khua bawipa cu an hal. A lehmi hna cu, nan umnak bawk kha papumrua tha pipi tamtuk nih an vainam he an cawngh, a ti. Pathian vanmi cu relcawk lo an si tiah Cathiang nih a ti. (Biathlam 5:11). Zumtu nitin kan nun ah kan ral Sehtan a thawnnak le tih a nunnak kong lawng te ruah ding, i thihpheih ding kan si lo. Kan hawi a thawng tukmi Vanmi hna nih kan velchum in a kan kulh ti tu zumh i raltha tein kan nun awk a si. Na kalnak kip i nangmah zohkhenhtu dingah Pathian nih a vancungmi kha a chiah hna lai (Psalm 91:11).

Chan Thawng Lian

Categories: Uncategorized

Leave a Reply