Vawlei Chawva Thilri le Fale

Vawlei cung cattial minthang William Shakespeare nih “Ai lawm kho lomi fa ngeih cu sivai a ngeimi rul ha nakin ttih a nung deuh,’ tiah a ttial bal. Kan fale hna hi ai lawmmi, duh a nungmi, Pathian cohlanmi an si khawhnak ding ah an no lio tein Pathian laksawng phaisa le ngeihchiah thilri kong kan cawnpiak hna a hau (Randy Alcorn). Kum hleiriat a chuah ni ah mawtaw 25,000 man laksawng pekmi fa nakin amah tein khawnter i mawtaw 1,800 man ai cawkmi fa nih Pathian laksawng a sunlawi zia a theih deuh lai ti a si. Hngakchia nih a thil a thlau siloah a hrawh tikah fawi zang tein cawkpiak tthanmi cu a nun lam cawnnak hrawh piak he ai khat an ti fawn. Na fa nih cycle tthing garage sale ah an zuarmi kul man a duh lo i a thar zakhat man an hauh ahcun a cawih in cawih law a karh he chamter. Chuncaw einak caah phaisa na pekmi in thil dang ai cawk a si ahcun a rawl tam sual lai tiin rawl dang cawk piak tthan ti lo ding a si. Voi khat rawlttam cun a thi lai lo. Cuticun thilri duhnak nih nun lam a harter zia tu kha aa fiang lai. Chawva le vawlei thilri kongah a lung a fimmi fale ngaih duh lo kan um hnga maw?

Fale nih kan phaisa lut chuah kong an theih ve a herh. Nu le pa nih kan hmuhmi paycheck hi fale kum hra cung nihcun an theih ve ding a si. Kan hman ding ning zong chimh ve ding a si. Cu ve bantukin fale zong kha inn rian khinh ve i hlawhman pek ve ding an si. Randy Alcorn nih, “ Ka fale hi kum thum an si in thlahlawh ti bak in ka pek hna i zarh khat ah pia sawmnga veve ka pek hna,” a ti. Anmah nih anmah phaisa te an hun ngeih cun tuaktan biakhiah awk an hun ngei ve. Hi lioah nu le pa nih fak piin lam hruai an herh. Fale nih an cawnnak ttha bik cu ka chimmi pinah nu le pa nih an tuah vemi kha a si tiah mifim tampi nih an chim. Randy le an nu nih an fale an hmuhsak bikmi hna cu: 1) Peknak, 2) Khawnnak, 3) Hmanning hna an si.. Zeititk hmanh ah 1 kha 2 le 3 ah tthial lo ding. 3 le 2 tu kha 1 leiah tthialter khawh zuam ding hi Pathian lungtonak a si. A pu nih na fa kha phaisa pharhra a pek ahcun hi pharhra hi zeitindah na hman lai ti awk a si lo. Cheuhracheukhat pek hnuin  pharkua ahhin zeizatdah nai khawn lai i zeizatdah zeitin na hman lai ti ding a si. Chawva cungah lungput a hmanmi fale cu Pathian sinah an nun a him. Nu le pa zong cu tthiamtthiam kan si bang an si ve.

Keimah ca i tlawm deuh ka hman, midang caah tam deuh ka pek tikah lomhnak in ka khat deuh deuh i ka thinlung thluachuah a hmu chinchin (Hudson Taylor). Zumtu le Pathian kan i pehtlaihnak  caah nitin Bible rel, thlacam, a tette va si a biapit bantukin kan cheuhracheukhat hman tein pek hi fale sinah ah kan roh ding khrihfa zia sunglawi a si. Zikhetehtta kutka khar lo awk a tthat lo bantuk a si. Hmaiphiah dih in timerh phih a hauh bantuk a si. Rawl ei lai i thla cam zungzal a herh bantuk a si. Rawl chumh dih in mei hmih a hauh bantuk a si. Peknak in khamhnak an hmuh lai tinak a si lo. Pathian cungah i lawmh ruangah a pemi siter ding tu a si. Lunglawm tein a pemi hna cu Pathian nih a dawt hna (2 Korin 9:7). Kan fale nih Pathian sinah lung lawm tein an pek tik caan khi kan i lawmh bik ni a si. Nu le pa bochannak in Pathian bochannak ah kan fale an hun i tthial khawh khi Khrihfa innchungkhar kan hmuitinh a si. Chawva cungah a lungput a hman lomi fale cu zeitik hmanh ah lomhnak taktak an co kho lai lo.

a) Million tampi kan hmuh nain zei lomhnak hmanh an chuah pi lo (John D. Rockefeller)
b) Million 200 ngeih i zohkhenh le kilkawi cu minung pakhat thah nakin a har deuh, a nuam lo tak khi a rak si (W. H. Vanderbilt)
c) A rum ttungmi i zangfak bik a simi cu keimah hi ka si (John Jacob Astor)
d) Mi rum taktak si hnu nakin mechanic  rian te ka rak ttuan lio kha kai rak nuam deuh (Henry Ford)
e) Millions in phaisa a ngei mi hna hi lung tak tein an mirh kho bal theng lo (Andrew Carnegie)
f) Lungput le zumhnak nih a phak ttung lo i phaisa tam nawn ngeih cu mah le mah i hrawhnak men a si (Chan Thawng Lian)

Categories: Artical

Leave a Reply