Value in life

Who Can Have A Church Building? (Biakinn A Sa Kho Tu Khrihfabu)

• By Chan Lian
• 27 February, 2013
• No Comments

US ram TV in thawngtha a chimmi bu mi rum Jim Bakker le a hawi hna nih million 100 man, minung 30,000 a tlummi biakinn kan sak lai an rak ti. TV thlahnak khan thong nga ai tel lai, meeting khan 200 ai tel lai tiah phawrhlaw ngaiin an rak thanh. Sinain cu biakinn cu nihinni tiang a dir kho thai lo. Zeiruangah ahdah a si hnga? Zumtu dang nih an zumhnak ahcun Pathian min sunhlawihnak kha i tinh loin anmah minthannak an kawl caah a si, ti a si. Pathian biakinn cu 1) pastorte dawt ruang men ah, 2) mah khua dawt ruangah men ah,3) zumtu hawi i tlaihchan ruang men ah, 4) rum le neih ruang men ah ai sa kho lo.

Kum thum an zulh hnu ah Jesuh nih a zultu hlei hnih cu bia a hal hna. Hodah ka si?, tiah a hal hna. Peter lawnglawng nih Pathian fa Messiah na si tiah a leh khawh. Jesuh nih Peter cu mi vantha ngaingai na si, na cungah ka khrihfabu ka dirh lai, tiah a leh. Biakinn a sa khotu khrihfabu cu 1) Jesuh cu Pathian fapa a si ti ai fiang i a zummi an si lawngah, 2) mah sining le thazang i zoh loin amah Jesuh khrih ai bochan ngammi an si lawngah, 3) minung siloin kan Pathian lawnglawng hi khrihfabu dirhtu a si ti a theimi an si lawngah, 4) biakinn cu mah zalonnak siloin amah Pathian min hlorhnak ca bak a si ti a zummi hna lawng nih an sak khawh.

Zei bantuk dirhmun le mi pem mi vakvai kan si ko zongah, Jesuh cu Pathian fa a si ti a zummi nih cun kan phaknak hmun paohah amah Pathian thangthat nakhmun “biakinn” kan neih khawh ding cu kan nun hmuitinh a si awk a si. David Siangpahrang pa nih a mi hna ansifah le an har a theih ko buin Pathian inn kan sa lai tiah a chimh hna tikah, a ruah lo ning leng tiangin an chawva an rak chuahpi. Cu ni thok cun Israel miphun cu thluachuakmi miphun kan si thai cang lai tiah a chim ngam. Pathian sinah lomhnak thla a cam. A fapa Solomon sinah rovuih bia a cahmi takmi pakhat lawnglawng a si. Cucu, “Pathian biakinn rak sa ti,” a si.  Pathian a zum i a sunhlawih a duhmi hna nih biakinn an sak khawh i thluachuah an hmu.