Hawikom Tha Cu Sui Le Ngun An Si

Vawlei cungah zeibantuk minung dah na hngar bik hna, tiah kan hal hna sehlaw, hawikom tha tampi a ngeimi tiah kan leh cio men lai. Laimi nih phungthluk kan ngeihmi pakhat ah “Hawikom tha cu sui le ngun an si,” ti a si. Cucu kan hngakchiat lio tein an kan chimh i hla zong in kan sak lengmang. Kan Cathiang zong nih “ Ka fapa, misual mi nih an in lem ahcun, na hna tlakpi hna hlah,” a ti (Ptb. 1:10). Hawi tha nih mi tha sinak leiah an kan kalpi. Hawi tha lo nih kulhmi minung cu zeitindah a nunnak a va dongh te lai ti hngalh khawh a si. Cu caah Cathiang nih “Ahohmanh i hlenter hna hlah u. Hawi ṭhalo nih ziaza ṭha a hrawh,” tiah a chim kha a si. Minung nih kan tuahmi thil vialte lakah 100 i 95 cu hawi nih sawmmi zulh lawngte a si tiah Rev. Lal Cung Awi nih a kan chimh bal. Rudy Giuliani, New York City ah Mayor a rak si balmi nih Leadership (2002) timi cauk a rak tial i minung tam taktak nih an cawk. Cu cauk ah fak taktak in a langhtermi cu, “Nitin na nun ah mi tha tam piin i kulhter hna,” ti a si. Cathiang nih, “Miṭha hna bia cu ngun ṭha bantukan si, sihmanhsehlaw miṭhalo hna lungthin cu hnawmtambantuk an si, (Ptb. 10:20),” a timi kha a hman taktakmi a si.

Hawi tha nih kan nun an kan khamh. Hawi tha lo nih kan nun an kan hrawh. Kum khat ah mino sing 500 renglo nih mah le mah i thahnak lam an kawl i mino 500 leng cu an i thah taktak. Mah le mah i thah duhnak cu fak tuk in lungretheihnak le ruahchannak zeihmanh ngeih ti lo tikah a chuakmi nun lam a si (Timothy J. Demy, Gary P. Stewart, Suicide: A Christian Response, (Grand Rapids, MI: Kregel Publications, 1998), pp. 199-200). US ram ah kum khat chung i mah le mah aa thahmi hi thong 40 leng an kai cang. Aa thah mi hna an nun an zoh tik ah hawikom tha a ngei lomi, nu le pa he aa pehtlai ti lomi, khrihfa hawi nih thla campiak ti lomi an si tiah an hmuh. A lung a dong cikcik bal ve ko nain a dam thanmi hna hi 100 ah 80 an si i an dam thannak cu hawikom tha nih thazang peknak le zumtu hawi nih thlacam piaknak thawng in a si, an ti. Jenifer timi nu hi cathiam taktakmi a si. Saram sibawi si ding in ca a cawng. A sianginn kainak ah drug a hmangmi hna he aa kom sual. Kum tlawmpal a rauh ah sibawi si kho loin fa pahnih tu a ngei. A ngeihtertu cu pa pahnih an si nain an thi fawn lo. A fale a zohnak ah ca a cawng kho ti lo. Amah a that lo tuk ruangah siloin hawi tha lo he aa komh ruangah an nun a rawk. Hawi thanih maw an kan kulh, hrawktu hawi nih dah?

Hawikom tha ngeih a duhmi nih kanmah zong hawi tha kan si ve a herh. Ral bawi Napoleon nih, kei cu ka power hmang in ralkap tampi ka rak hruai hna i ram tampi ka tei. Ka tar lei bel ah ka derthawm i zultu hohmanh ka ngei ti lo. Ka ralkap thing hna zong nih zeiah an ka rel ti lo. Sinain Jesuh Khrih cu vawlei a nun caan tawi teah tordornak le dawtnak in hawi tha tampi aa serh hna. An sualnak caah amah nih thihnak tiang a in piak hna. Amah cu vailam ah a thi cang ko nain a thih hnuah zultu rel cawk lo a ngei peng, tiah a rak chim. Biakthleng cung i thla nan cam lai ah na unau he va rem hmasa uh tiah a kan cawnpiaktu cu kan Bawipa Jesuh Khrih a si. Nihin kan nun ah kan hrinthannak cu kan minung hawi hna caah hawi tha kan si le si lo nih tette a piah awk a si. Hawikom tha cu kan caah khua a tha leiin a kan ruah pitu an si. Muihnak chung i kan um lio zong ah ceunak a kan hmuhtertu an si. Cu ve bantukin kanmah hrimhrim zong kan pawngkam minung hna caah ceunak phurtu si i zuam hna usih.

Categories: Artical

Leave a Reply