Lih Chim A Si Ko Nain

Mi pakhat nih a rak tuahmi le a rak tonmi a chim. Mi raltha, a mi thawng a sinak zong a si kho. Ingtuartu, namneh mi le hawi ton bal lo thil harsa a rak tonnak zong a si kho. A chimmi tuanbia a tha tein hun hlat tik ah lih lawngte a rak a si. Cu tikah mi lihchim, mi hrawkhrawl tiin labal benh in zei ah rel ti lo a si tawn. Mi nih nehsawh sual lai phan ah mah le mah i faknak tuanbia chim a si tawn (Hero ah i chiah). Mi nih sualphawt lai phan ah midang kha sual va phawt chinnak lam kawl. Amah ruangah, anmah ruangah hihi dirhmun ka phanhnak a si (Victim ah i chiah). Theih ko mi nih an tuan bia lih le lih in an chim lengmang tikah ing a puang, mi a simh. An pawng um, an bia ngeih huam a si ti lo. Psychologists pawl nih cu bantuk minung tampi nunnak an kherhlai tikah mi hlen duh ruangah men ah lih an chimmi a si thlu lo. Mah le mah i zumh ti lo (Insecurity), minung hawi bantuk in le cohlan ve duh ruangah lih an tawnmi a si an ti (A team of New York psychologists in 2015). 

Mi dehcawh duh le forh duh ah lih bakbaro a chim mi an um ve. Anmah duhnak midang nih an tuahnak ding caah lik in fak le lih nih thihpheih an hman (Manipulation). Mi nawnnok tu, mi tha lo tiah ti khawh an si. Nain a cheu cu mah him lo ruangah tinhmi theng ngei loin lih a tawn i a chim lengmang mi an um ve ti a si. Cucu lungthin in a dam lomi milihchim (Pathological liars) tiah auh an si i mi sual mi tha lo tiah ruah an si lo. Bawm a haumi thazang pek a hau mi tu an si deuh (Dr. Panagiota Korenis at the Bronx Lebanon Hospital Center). An lih lawnget na chim tiin bia el le an lihnak kong fianternak nih a bawm hna lo. Zeidah an nun ah a baucham, zeitindah ka bawm khawh lai timi mih tuin zoh deuh ding an si. Minung an chuahkehnak le an thanning, an tinmi thil hna tha tein hngalh piak khawh i zuam hi dawtnak taktak ngeih a si. Mah nih hmuhning, rak i pom ciami peedan in mi tah le biacaih ahcun bawmtu siloin beuhtu ah i can khawh a fawite.

Na minung hawi pawngah minute hleinga caan na hman i a biacaih bawi ah na van can ahcun a pawng i a um lo ah a tha deuh. Hlawhhlangnu a si an ti paoh mi sual, mifir a si an ti paoh ah misual, zu tama a si an ti paoh ah mi sual, gangstar a si an ti paoh mi sual timi lungput na ngeih ahcun komh ding minung zong ngeih ti lo a fawi te. Khrih hmai ah hlawhhlangnu cu awlokchawng in a um. Pa he an sual lioah kan tlaih an ti. Pa nih zeitindah an sualpi ti hngalh a si lo. Anunnak ah zeidah a rak ton ti hngalh a si lo. Hlawhhlangnu timi label bunh a si phawt ahcun Judah mipi hmaiah hmunhma a ngei ti lo. Khrih nihcun, “Mi nu, sual kan phaw ve lo, va sual ti hlah (John 8).” Sual cu a hua nain sual phawt nak in lam tha i hruai aa tim zungzal Khrih Jesuh a si. Mi dang mithnawm na coih hlan ah nangmah mihnawn i coih hma sa (Mtt. 7:3-5) timi nih midang sualphawt colh duhnak lungthin kan ngeihmi kha i coih hmasa ti a chim duh. Hi Khrih lungput he nun ahcun minung hawi pawng i minute hleinga te caan hmami nih Khrih dawtnak a kauhter. 

Categories: Uncategorized

Leave a Reply