Lomhnak Taktak (True Happiness)

GivingKhual a tlawng cuahmah minu nih tivak cek a tan lio ah lungvar man sung ai hmuh. A bak chungah ai sanh. Chuncaw einak a phak ahkhin mipa pakhat a hmuh. A rawl a tam i ei awk a rak nei lo. Minu nihcun a zal a hun samh i a chuncaw kha a hrawmh. Mi pa nih a lungvar cu a hei hmuh i a mithmai ah hngarnak in a khat. Cuti a um cu minu nih a hmuh tikah, a lungvar cu a thenh. Mi pa cu ai lawm tuk i ka nun chung ka herhmi vialte a ka zat lai tiin khua leiah a tlung. Lam thluangtlawn khua a ruat. Keimah nak mi vantha hi an um ti hnga maw, a ti. Khatte leiah, zeitindah ka zuar lai, zeidah ka cawk lai, ka chungle nih an kal hal lai maw, mi nih an ka fir piak sual lai maw ti a ruah fawn. A donghnak ah lungvar a petu minu sinah a va kir i a va pek than. Ziah na ka pek than tiah mi nu nih a hal. Mi pa nihcun, hi lungvar nakin siannak na neihmi thinlung ka duh deuh, a ti. Henry David Thoreau nih, kan nunnak i kan thapmi vialte lakah a sung a um bal lomi cu peknak a si, tiah a rak tial. Lungvar duhnak nakin lungvar pek siannak ah lomhnak a um deuh.

Minung kan nunnak ahhin kan herhmi kan neih ahcun kan i nuam lai tiah kan ruah cio. Nain Socrates chan in a tu chan mifim hna nih an chimmi cu, a hmunmi nuamhnak taktak cu lenglei in a rami a si lo. Kan chunglei in a hung chuakmi tu a si. Tangdor tein nun, ding tein nun le siang tein nun hna hi i nuamhnak taktak i a hrampi a si an ti. Ai nuam lo cemmi minung hna hi amah le amah ai ti sangmi, a din lo ningin hmunhma le chawva a kawlmi, le a kirmi hna an si deuh zungzal an ti. Cucu ah le mah vun cungah acid i tawih bantuk a si. Nun a zaw, zia a rawk, chan a tawi. Tampi an nei lo nain an mithmai a panh i an nun hngar a ummi minung kan hmuh lengmang tawn hna. Abraham Lincon nih, thil tha ka tuah ahcun kai nuam, thil tha lo ka tuah ahcun ka lung rawk. Cucu kei ka Pathian biaknak tlaihtleng a si, a ti. Amah hi lungre theih zawtnak saupi a rak nei ve i peknak thawngin a rak dam an ti. A hmunmi lomhnak cu vawlei rumnak le minthannak in a ra lo. Kan chunglei a chuakmi kan lungput tuin a rami a si.

C. S. Lewis nih nunning phun hnih a chim. Pakhatnak cu “Need-love” a ti i herhmi caah nun tinak a si. Keimah caah zeidah ka kawl lai, zeitindah hmunhma kai halh lai, ti lawnglawng ruah i nun khi a si. A pahnihnak cu “Gift-love” a ti i pek awk caah nun khi a si. Zeidah ka Pathian caah ka pek lai, ka minung hawi caah ka tuah lai ti i nun khi a si. Hmuhnak lawng kawlnak nih chikkhat nuamhnak le a tha lomi donghnak a chuahpi. A theipar zun awk a um lo. Peknak cu a tlau ti a um bal lo. Na pek tikah na thinlung a dai lai i na thilrit a zaang lai. Plato nih, peknak cu ahohmanh nih fir piak khawh ti lomi thinlung le thlarau laksawng a si, a ti. Cun huatnak nih huatnak a chuahpi bantukin peknak nih peknak a chuahpi. A petu cu a co than tu an si zungzal. Stephen G. Post nih Italy nu nih a fapa a cawn piakmi cu “Pe law philh” ti a si a ti. Hi hna hi lomhnak taktak a chuahtertu lungput an si.

Categories: Artical

Leave a Reply