Lungsaunak: Thlarau Laksawn

         US ralkap pastor nih Afghanistan ah a um liomi ral kap pawl thawngtha a chim hna. Ralkap bavuah cu “Hurry Up” le “Wait” bak kan si ko, a ti. Uniform le meithal hlam an duh tikah thawh zokzok a hau i, nazi pathum tluk dir in hngah a si, a ti. Cakuat thlak/hlam duh ah, si ai thoh duh ah, rawlei caan ah saupi hngah i rianrang tein tuah lawng te a si, a ti. Cu nakin a rau deuhmi cu, zeitikdah inn ka tlun te lai timi a si, a ti hna. Hngah hi minung kan caah a har bikmi a si. Van i ranh duh tuk lioah tlanglawng nih a kan kham, tar mawtaw kan lonh kho loh, traffic a jam tbt nih nitin kan thin a kan tawiter. Mi an tamtuk ruangah rawl dawr in kan kir, kanmah nih kan van chiahmi microwave te hmanh kan hngak kho tawn lo. Thil thar cawk i lawipah ah i hruk kan duh. Sateih cakuat cu a rau tuk kan rak ti. Atu ahcun email cakuat zong kan hngak kho te lo. Text message hmanh second pakul i an kan leh lo ahcun thin a tawi cang. Zeitindah kan tuah ne lai? Pathian bia nih, lungsaunak cu Thiangthlarau laksawng a si, a ti (Galati 5:22; James 5:7; Phungchimtu 7:8, Luke 21:19; Rome 12:12; Hebrew 10:36).

         Lungsaunak kan timi cu “tuar khawh ta” siloah “in khawh ta” khi a si. Thil kan duh lo ning in a kal, kan duh lomi nih a kan tlunh tikah kan thin a hang. Kan ing a puang, kan lung a dong. Cu lio teah van lehrualhnak, van doh khawhnak thazing le hmurka kan nei ko nain let rih lo tein van um khawh khi lungsau cu a si.  Minung simi paoh nih kan duhmi cu: 1) Pawngkam thil vialte hi kanmah dungning in cang hna seh; 2) Pawngkam minung vialte hi kan duhning in cawl hna seh; 3) Kan tuahmi paoh ah hlawhtling dih usih, 4) Kan ruahmi paoh hi cohlang dih hna seh, tihi an si. A taktak ahcun kan vawlei hi ihmuh sualnak, i theihpalhnak, i kuaihsualnak te pawl in a khatmi a si. Kan thin tawi i kan i thlahphawih tikah midang va mawhchiatnak, i suk i khaknak, i thencheunak le lung donghnak hna nih a kan zulh. Lungsau kan timi cu kan puarthaunak lungthin teikhawh a si. Kan lung a sau tikah kanmah le kanmah caah himnak a si i midang he kan tuan tinak zongah  lam tluannak a si (Toni Bernhard, J.D.). Thinlung van i uk khawh i thintawinak van tlaih khawh hi fimnak lam a si, an ti.

         Lungsaunak lawnglawng in Khrih hnuzultu tha kan si kho. Khrih nih cun a hlaw cuahmah tu Peter kha lungdong lo tein, “Ka tuu zohkhenh hna,” a ti khawh peng. A sual lioah tlaihmi mi nu zong caan tha a pek khawh. Kawm chungah um duh loin in a vakvaimi tu zong a kawl hna. Bibe chungah a lung a saubik cu Job a si. Pathian nih a kamhmi a phak tiang harnak a tuar khawh. Inchungkhar thatnak caah lungsau tein khuaruah khawh cu Thlarau laksawng a si. Khrihfabu thatnak ding caah lungsau khawh cu thlarau laksawng a si. Midang cungah thin i sum khawh cu thlarau laksawng a si. Pathian nih bia a kan kamhmi kan phak rih hlan chung thlacamnak he hngah khawh cu thlarau laksawng a si. Zan khuadei sur an vawrh i an lung a dongh cikcek hnuah Bawipa ai phuang. C.S. Song nih, “Pathian cu nazi pakhat ah mengthum in a kal nain a tlai bal lo,” a ti. Lungsaunak thlarau cu mual phonak in a kan khamh i thluachuahnak le remnak ah lam a kan hruaitu a si zungzal.

Categories: Artical

Leave a Reply