Mipem Nunlam

Kum sawmthum a simi nu pakhat ruahloin lungzawtnak ruangah sizung a phan. Operation fak taktak in an tuah lio ah a thlarau Pathian sin a phan. Bawipa vawlei ka nun caan hi a dih cang ko ne lai maw, tiah a hal. Pathian nih a dih rih lai lo, hi hnu kum 43 le thla hnih le ni riat na nung rih lai tiah a leh. Operation tuahnak cun a lung a fim i ai lawm tuk. Hi hnu kum 43 chung nung ding ka si caah a ti i a hmai kha nungak note bantukin sibawi te a tuahter hna. A pawthau an lak piak i a form tha tuk cang. Cun samdumsi ai thuh i nu ngak no bantuk ah ai cang. Cun sinzung cun a chuak. Inn a lawi pah ah mawtaw nih a teih i a thi. Vancung a phan i Pathian bia a chalh, ziah na ka hlen, kum 43 na nung rih lai na ka ti lo maw? Ka phaisa vialte tamhnak ah ka hman dih, a ti. Pathian nih operation an in tuah lio na mui le inn na lawi lio na mui ai lo ti lo le kan palh sual, keimah sermi na si rua lo ka ti cu teh, a ti (joke.com). US ah a pemmi Laimi hna zong kanmah le kan sining te hi kan i duhbik dingah Bawipa nih a kan pekmi a si. Mirang pawl va hngar, an nawl i cawn colh i hmatpungtin i thlen ding ah Pathian nih a kan ser lo. Thihnak lam tu a si caah kan hrial awk a si.

Abraham cu Pathian nih a auh i ram ken kip ah a vah ter. Middle East ram hna le Egypt ram zong a tawl dih. Ai thawh ka in Israel a si i a thih tiang Israel a si. Ai thawh ka in Pathian bia a dir i a thih tiang Pathian nawl a zul. A tefa cu vawlei an an khat i thluachuahnak an hmu.US ah a pemmi kan hawi le Chinese pawl, Korean pawl le Pilipino pawl hna an tuan bia kan zoh tikah, Cawnawk a um bantukin hlawt awk zong an um. A cheu cu mirang uarnak le an nunphung uarnak in an khat i Asia mi ka si tihmanh an duh lo. Mirang style in an um i Asia mi hawile he pehtaihnak zeihmanh an nei ti lo. Cu hna pawl khoika an um i khoika ah an thih ti zong an thei ve ti hna lo. A cheu cu anmah rammi te lawngbak ai i kom, hmunkhat ah khua an sa i lenglei mi dang he pehtlaihnak pakhat hmanh an nei duh lo. Kanmah nunphung, kanmah holh, Lailei kan khua tlang caah tiin an nung ve. Hi hna pawl bantukin US ah khua a sami hna cu an nu le an pa chan a van dih hlan deuh ah an tlau ve. An fale nih an nu le pa duhmi chungah an nung kho ti lo, lam dang le an neih lo tikah miphun dang sinah an lut thai.

Cucaah atu lio Asia mi mifim ka pale hna nih kan chuahkehnak kan miphun hi Bawipa nih kan zawng ah a ser cangmi a si. Kaltak ding, hlawt ding siloin i uanpi ding, kilkawi ding, Pathian min thangthatnak ah hman ding a si, an ti. Nunphung chia le ziaza chia kan hmuhmi paoh hi kan hrial hna hi a thami le ai dawhmi kan cawn khawh ding hi mipem hna i kan rian nganbik a si. Upa pawl nih a hlan ah cun tin, kha tin kan rak tuah tawnmi zong kan kaltak a herhnak a um bantukin mi nih cun tin an tuah, kha tin an tuah timi zong ralring tein kan i lak a hau. US ram ah Asia mi lawngte hi 5% kan si cang. US ram ah biaknak lei thanchonak a chuahtertu hi Asia khrihfa hna an si ve. A rum a lianmi zong tampi an hung um cang. Kan nih Laimi hna zong Pathian bocahnak le mah miphun sinak ah i lawm tein hmai kan kal ti ahcun Pathian nih a miphun ah a kan thim peng ve ko lai. A thimmi mi phun hna caah Pathian nawlbia cu: Nangmah nih na sakmi a si lomi khua nganngan … nangmah nih na rawnmi a si lomi thil ṭhaṭha … nangmah nih na huahmi a si lomi tikhor … mitsur dum hna le oliv thing hna chungah an luhpi i na ei i na khim tikah, … Bawipa kha na philh sual nakhnga lo, i ralring tuah. Bawipa na Pathian cu na ṭih lai; na biak lai i a min lawngin chiat na ser lai (Deut. 6:10-13).

Categories: Artical

Leave a Reply