Sualnak In Luatnak

OXYGEN VOLUME 13

                Kum sawmnga tluk a simi pa a paw a fak i sibawi sinah ai piah. Thinphang ngaiin a phichuak a hngah. Sibawipa cu a hung ra i, thawngtha pakhat thawngchia pakhat chimh ding kan nei, zeidah chimh hmasa na duh, tiah a hal. Thawngchia ka chim hmasa ko a ti. Napaw hi cancer a si cang. Hi hnu kum hnih lawng na nung cang lai, a ti. Mipa cu a hangcang ai rial i a hrum a ai. Cusiah zei thawngtha hmanh ka caah a um ti tung lo, thawngtha chimh ding na ka ngaihmi cu zeidah si kun tiah a hal chap. Sibawi nihcun, hi hnu thla hnih ah Alzheimer timi (Tluaktlau zawtnak) nih an tlak la i lungretheih awk na hngal ti lai lo, a ti. Minung cu ka tha ko rua kan ti lio ah a chia kho, ka dam ko rua kan ti lioah a zaw kho, kan hman ko rua kan ti lioah a palh kho kan si. Kan i hngalh bu in siseh, kan i hngalh loin siseh damlonak, tlinlonak, le sualnak kan nei dih (Romans 3). Cucaah minung a si ciomi paoh cu tih khun awk an um lo, nehsawh deuh ding zong kan um lo. Sual ah kan i khat i thatnak ah kan dang cio, kan Pathian thawngin.

Nan lakah mi sualbik nan timi van chuahpi hna uh , tiah kan fial hna sehlaw, ahodah kan chuahpi hnga? Bible nih 1) Pathian nalbia zulh khawh lo hi sual a si a ti (Acts 23: 3; Hebrews 10 17, 2 Peter 2:16; 1 John 3:4). Jesuh Hrimhrim nih ahohmanh nawl bi a zul khomi nan um lo, a ti. 2) Hngalh lo hi sual a si a ti (Hebrews 9:7, Rome 10:3; 11:25; 1 Cor. 14:38; 1 The. 4:13). Jesuh hrimhrim nih, ka Pa, ngai thiam hna, zeidah kan tuah timi an i thei lo, a ti. 3) I uah hi sual a si a ti (Proverbs 7:20, 2 Thess. 2:4, 1 Tioth 1: 13; Romans 29:31; Genesis 37:1-11). Ai uah lomi ho talk an um maw? 4) Lung dongh fawi hi sual a si (Romans 11:2; 1 Cor. 6:7). Zeitluk indah kan lung thawn le a sau cu kan i hngalh dih. 5) Tinhmi tlawrh hi sual a si a ti (Romans 11:2; 1 Cor. 6:7). 6) Thil tha thei ko nain tuah lo hi sual a si a ti (James 4:17). 7) Thiangthlarau dongh, zumh lo cu sual a si a ti,  (Mtt 12:31; 1 John 5:16,Mtt. 15:14; 23:25-26). Cuve bantukin haukauh hi siasal biak a si a ti. Hi vialte ahhin a luat dihmi kan um sual hnga maw? Kei ka luat ti lungput kan neih ahcun mi sual kan caihnak le kan sual kan i huhphenhnak ah kan nun a thil a rit chinchin.

Kan sual, mi sual ka si ti cohlan khawh hi Pathian le minung kan i remnak lam hramthoknak a si. Sual i hngalh lo, cohlan duh lo cu sual kha lih in chilhnalh i timh a si. Kan sual Pathian sinah kan phuan i kan nun ka tling ve lo timi lungput nih a hraui tikah kan lam a tluang. Thilrit a zang. Paul nih Roman khua um khrihfa hna cu thawngchia pakhat le thawngtha pakhat a chimh hna. Thawngchia cu: Mi vialte kan sual dih, ti a si. Thawngtha cu: Khrih thawng in thianter kan si cang, ti a si. Kei mi sual ka si, mi tling lo ka si tiin Bawipa a fuhpanhmi hna nih an sual thilrit in an luat lai. Pathian nih a ngaihthiam cangmi hna cu Thiangthlarau nih an nun a hruai hna lai tiah biakamh kan si. Cu Thiangthlarau hna nih a chuahtermi hna cu: dawtnak, lawmhnak, daihnak, lungsaunak, zangfahnak, thatnak, zumh awk tlakmi sinak, tordornak le mah le ma hi tei khawhnak te hna hi an si (Galati 5:22-23).

 

Categories: Artical

Leave a Reply