Aa Lim Cang

Rian ka lim dih tihi a um kho hnga maw? Vawlei tuan bia ah vawlei rat hnawhchan a lim cicek mi cu Khrih Jesuh lawng a si. South Dakota i ummi Mt. Rushmore tlang par lungpang ah milu pali a rak siam tu cu Gutzon Borglum a si. President pali hna i an hnawng tiang suai ding in 1927 kum ah suai hram a rak thok nain a lim hlan ah a thi. A fapa Lincoln Borglum nih an hun pehzulh i 1941 ah a lim. Thi ding in caan serpiak cia mi minung cu tinhmi, biakam, siaherhmi tuah dih ta loin a liam ding lawngte kan si.  BC 564 lioah Wrestling chanpion a voi thumnak lak ding ai zuammi Arrhichion cu a zuammi pa nih a ke in a hnawg a ceh i a reh. A zetihmanh in a cawlh kho ti lo i a thi ding a si lioah a kehliah te kha a hun phelh i amah cu a thi cuahmah. A zuamtu pa nih a fah a celh lo caah fakpiin a au I a kut a thlir. Biakhiaktu nih Arrhichion cu teitu ah an chiah. Thih pah in teinak a hmu ko nain a dang tuah a duh mi vialte le a chunmang cu a kal tak dih ko. Vailam cung i nazi  paruk a um hnuah Jesuh nih: “Ai lim cang,” a timi bia cu a Pa nih vawlei ah a ratternak rian a lim kha a si. Vawlei ah taksa in a nun chung vialte a rawl thawbik cu a Pa fialmi rian tuan le lim a si, a ti (John 4:34). Hika i “Lim” timi biafang a hmanmi le vailam cung in a hmanmi biafang zong a khat bak mi an si. zungzal ca tinak a si.

Biakam Hlun chan lio Judah mi an ipumnak hmun ah thuden an chia bal lo. A ruang cu an tlangbawi hna kha midang sual ngaihthiamnak ding raithawinak tuah ah an caan a dih i thut caan an ngeih lo caah a si (James Merrit). Cutluk cun Pathian a thei i nawlbia a upatmi minung hna nih an sual an rak i hmu i sual ngaihthiamnak an kawl. Voi khat ngaihthiamnak nih a zat lo caah raitawinak tuah piak lengmang an hau. Tlângbawi hna cu nichiar tein sualnâk a la kho lomi thawinâk tuah in an dir lengmang ko. Khrih nih valilam cungah a limmi nih sualnak dihlak a ngaihthiam khawh pinah aTlangbawi sinah ngaihthiamnak hal than lengmang a hau ti lo (Amen). “Tlângbawi hna cu nichiar tein sualnâk a la kho lomi thawinâk tuah in an dir lengmang ko. Asinain Anih nih cun zungzal caah sual thawinâk voikhat lawng a tuah hnu ah Pathian orhlei kam ah a ṭhu,” (Hebrew 10:12). “A lim cang’ timi hi Mirang catlang hi perfect tense in a hman. A suallam cu a luanciami ca, atu lio ca le hmailei ca tiang a nguhmi sual ngaihthiamnak a si. Ka sual, misual ka si ti ihngalh,  Khrih Jesuh nih ka sual leiba a kan cham piak caah mithar ka si ti hun zumh kha ngaihthiamnak co lawng siloin zungzal nunnak hmuh timi cu a si.

Rom biacaihtu hna nih misual cung i bia  an khiah tik ah catlak a hmai ah a sualnak, a hnu leiah a in ding dantatnak an tial. Cu ca cu thonginn khan hmaiah tar. Khrih Jesuh thawngin nang le kei cu a nganbik Pathian biakhiahnak ah kan sualnak catlap thianhpiak a si cang. Tazacuai kan si ti lo. Sual lngaihthiamnak hi a cawih in cawihmi a si lo. A miak in hlanmi zong a si lo. A muisam a kengmi minung a kan dawt tuk caah a kan tuahpiak mi a si. Kan ca i a in ruangah a kan halmi zong a um lo. Amah thangthat ding le a kan pek ciami thluah tuin a pennak kauhter ding ah rak sermi kan si.  Serhnawh chan kan nun tu ai tharchuah i Khrih zultu nun kan cawn chin lengmang nak dingah a kan temtawntu kan sualnak in thianh ka si hi fian a hau. Khrih i ilomhnak ngeih lo buin Khrihfabu cah tuanmi, pekmi, chimmi vialte hna nih caansau thatnak a chuah pi lo. Lawmh nun ngeih, lawmh nun samh, lawmh nun he Pathian ton ding hi kei ka lim kho ve te hnga maw?

Categories: Uncategorized

Comments are closed.