John The Baptist

Zumhtlak zumtu tampi cungah thil thalo tampi a tlung. Sihmanhsehlaw anmah hna thawngin thil lianngan tampi a chuak (Jim Perdue). Shahbaz Bhatti hi Khrihfa a si i Muslim ram Pakistan ah uktu lutlai pakhat a rak si. A zumhnak le a tuanmi rian cu Khrih Jesuh nih a rak chimmi, “ Tluninn an in dongh hna lai,” (Mark 6:11) “ Vawlei nih an in huat lai zeicatiah Keimah kha an ka huat hma sa cang,” (John 15:18) timi kha a hun Tling. Shahbaz Bhatti cu March 2, 2011 ni ah Al-Qaeda meithal tlai hna nih aung dihlak in an kah i a thi. A thih hlan thla khat: “Kan caah a nunnak a petu Jesuh Khrih cu ka zumh i a hnu ka zulh. Vailamtah lam zulh zei a lawh ti zong ka theih. Ka pawngkam minung hawi ca le an intuarnak in an luatnak caah ka nung lai. An nuhrin covo an conak dingah ka dir lai. A herh ahcun ka nunnak ka pek lai,” tiah a thanh ruangah an thahnak a si. Tipil petu Johan cu Jesuh nih ‘Nu pawchung a chuakmi vialte lak ah a nganbik a si (Mathai 11:11)’ tiah a chim. An lu cu an hlawh nain nihin tiang Pathian sin a phanmi an thlarau cu bia a chim.

Herod Antipas nih a pa penram cheuli ah cheu khat a simi r Galilee and Perea cu AD 39 tiang a rak uk. Siangpahrang min a hal lengmang nain Rome uktu Augustus nih apek duh lomi a si. Judahmi tu nih an tih tuk mi damiah Ezekias a tlaih khawh ruangah siangpahrang tiah an auh mi a si. A tupa Herod Agrippa tu hi Caligula khua AD 37 ah sianpahrang min rak pekmi a si. A nupi Herodias nih an tupa cu a hngahchuah tuk i a voi hnihnak siangpahrang title cu an hal than. August nih apek duh lo pinah Rome penram chungin thawl tiang a timh. A nupi Herodias hi a unau pa Filip nupi a thitmi a si i fanu pakhat a rak ngei. Herodias lungah a thi kho lomi pahnih a um. Pakhat nak cu a pasal  caah a duhpiakmi “King Title” amah nawlngeih  hmuh khawh lomi kong a si. Pahnihnak cu Herod Antipas nupi si awk ah a tlak lonak kong a phuang lengmang tu Tipil petu Johan a nunmi hi a si. Bible chungah nu tha tampi an um. Amah bel Uriah dum chuttu Jezebel le mah Herodias  ahhin ahodah an sual chimpit a si deuh hnga ti cu minung menmen nih caih awk tha lo. A nupi ruangah Tipil petu Johan a tih i faknak pek a rak duh lomi Herod cu lainawng uktu ah a chuah (Mark 6:20). Rome ram uktu Caesar Augustus nih Herod fapa sinak in a thingthei tlaici si ah nunnak a him deuh, a ti.

 Dietrich Bonhoeffer nih: “Jesuh Khrih nih minung a auh hna tik ah, zulh le thih ding a tel chih,” a rak ti bal. Khrih zultu a si ruang le Hiltler uknak a doh ruangah thah ding a si i April 9, 1945 ah a donghnak bia a chimmi cu, “Mah hi ka kei ka donghnak si, nunnak tak a thok zong a si,” ti a si. Pathian vel hi a man fawituk in kan hmuh nain zultu si cu a man a fakbikmi a si timi cauh zong a rak tial. Nihin zumtu tampi nih kan iharh tukmi 1) Cheuhracheukhat pek, 2) Mission ca thawh, 3) Biakinn ca thawh, 4) Tlangrian tuan te hna hi zultu sinak ah a hramthok nak lawng a rak si. Pathian nih kan nun in thil lianngan deuh a tuah khawh nak dingah a hramte lawng a domhmi hna thawng in Khrihfabu hmai ah a kal, Mission rian a tuan, zumtu mibu tha tein in an izohkhenh kho i hmailei ruahchannak a um. Pathian cu zeizongte ngeitu a si ti kan zumh tak ko ahcun kan phaisa bawm ah nawlngeihter a hau (Randy Alcorn). Pathian cu controller a si ti kan zumh tak ko ahcun mah duhnak ithumh a hau. Zungzal nun kan co lai ti kan zumh tak ko ahcun thaizing kong cu Pathian kut ah chiah khawh a hau. 

Categories: Uncategorized

Comments are closed.