Caan Nih A Liam Pi

Caan nih a kal pi lengmang i zeipaoh hi an liam lengmang ko. Nuamhnak zong an liam, harnak zong an liam. Thangthatnak zong an liam, thangchiatnak zong an liam. A karlak i fak tuk khuarauh bel a sung tuk. Na zawt zong ah na dam ṭhan ding a si ahcun zaw ta ve ko ning ti kho law na tha dam lai. Na zatlak zong ah na thih lo paoh ahcun caan ṭha um ṭhan lai ti ruat law ruahchannak na ngei lai. Huatu na ngeih zong ah dawtu dang lengluang kha rel hna law na lung dai lai. A thi ding dirhmun i na dir hmanh ah vawlei nun hi a donghnak a si lo ti kha zum law Khrih sin tu ah i ap. Nun chap khotu Jesuh, hawikom ṭha bik Jesuh, zungzal nunnak petu Jesuh ngeitu kan si.

Thilrit pakhat tal cu na ngei ve ko lai. Khrih he an neihter tu siseh. Thinghmui zawtnak nih Khrih he a ka neih ter ahcun a zaw lo i Khrih he aa hlat mi nak in kai hlawk deuh a ti tu an um. Thilrit ngeih tawn cio mi hi Pathian nih thlah sian lomi kan sinak pakhat a si ve. Thaizing ahcun khua a dei ṭhan lai. Kan dihlak caah a si lai. Ni a chuak lai. Kan dihlak ca ṭhiam. Thluachuahnak ruahpi a sur lai i nangmah theng keimah theng a kan hrial lai lo. Atu i na co rih lo zong ah ka caan a phan ve te lai ti na cuanh khawh ahcun mi hngar ding a um lo. Bawipa nih kanmah le kan herh ning cio in a kan hneksak i thluachuah zong a kan pek.
Nun nuam deuh, ruahchannak a ngei mi nun ngeih na duh ahcun Khrih zultu tak a simi hawi ṭha tam pi i serh hna. Hawikom ṭha lo nih na si khawh ko mi tang ah an in ṭhumh lai. Na ngeih cia mi na nun man an zuar ter lai. Lungre thei le thinphang in an in chiah lai. Bia nan i ruah dih paoh ah mi santlai lo na sinak lawng an theihter ṭhan lai. Cathian nih: “Hawi tha lo he ai kommi cu an tlacham lai,” a ti (Ptb: 13:20). Hawikom ṭha nih thazang thar an in pek lai. A si kho lomi kong nak in na si khawh mi kong an in chimh lai. A tlin lonnak nak in Pathian muisam kengtu nan si nak an in chimh lai. A sunglawi bik mi cu Khrih dawtnak kha an nun in an hmuh sak lai. 

Categories: Uncategorized

Leave a Reply