Value in life

Colors of Christmas

• By Chan Lian
• 31 December, 2022
• No Comments

Christmas Zawng Phun Li

Mi tampi nih Chritsmas hi a phunphun in an hman cio.  Phungchim tu zong nih nihin ah mah duh khunnak zawn chim cio a si. Chritsmas hman ning aa dannak kha a zawng phun li an then. 

1. Red Christmas. Christmas zawng sen in a hmang mi hna cu vawlei thilri duhnak in a khat mi pawl an si. 1 Timothy 6:6-10, 17-19 ah mithiang Paul nih ralrin a kan pek mi cu Christmas hi a) A herh lonak i phaisa hman caan a si lo, b) A herh lo leng in leng ah rawl ei can a si lo, c) Ngeih lomi leng in credit card hman caan zong a si lo, US zapi chungkhar pakhat nih kum khat ah $ 87,000 an hmuh i an thih tiang ah an hmuh ding cu 3.5 million lawng a si. Cucu a dam bak mi a tuan kho peng mi i chanchung hmuhmi a si caah suallam ngei tein hman ding a si. Tordor tein hman, siang tein hman, Pathian sinah khawn ding in an kan fial.

2. Green Christmas. Christmas zawng hring in a hmang mi  hna cu nahchuahnak in a khat mi pawl an si. Proverbs 16:8; Proverbs 27:4 ah mi vialte hi nahchuahnak in a zam kho mi ahohmanh an um lo ti kan hmuh. Thiamhlimnak a kawlmi pastors hmanh nih an ngeih. Sehtan hriam tha bik pakhat a si. Shakespeare nih ‘‘the green-eyed monster,’’ tiah a auh. Lenglei in hmuh khawh lomi chunglei sualnak a si (1 Thessalonians 2:5). Sifah le rum nih lei a rel lo. Mi rum pa zong a ngeih mi ah aa lungsi lo ahcun nahchuahnak sal a si tthiam. Sifak pa zong a ngeihmi aa lung si ko ahcun a hna a ngam kho. Hrial dingmi cu cuiatlai nun kha a si.

3. Blue Christmas. Chistmas zawng dum in a hmanmi hna cu sungh zatlak bu, ngeihchiat bu, zawtfah bu, lungretheih bu in Christmas a hmang mi hna an si. Vawlei harnak hi misual lawng nih ton a si lo. Job 1:1-2:8 ah Job nun kan hmuh. Pathian a tih i a ding mi pa a si. A chungkhar pumhnak a tuah pi peng hna. Rian aa zuam i an ram ah mi rum bik a si. Upat tihzahmi a si. Nain harnak fak taktak a tong thiam ko. Cu ve bang Christmas ah harnak tampi he aa ciah mi um an um. Job nih Pathian cu a nung i keimah zong Amah caah ka nung. Taklawng in ka chuak i tak lawng in ka kir than zong ah keimah nawl a si lo, a ti khawh. Zei dirhmun dir paoh ah Pathian cu Pathian a si ko, a ti. Thaizing khua a dawi tikah keimah ca si ve lai ti zumh a si.

4. White Christmas. Christmas hi a rangmi zawng in a hmang mi hna cu Khrih kha nunnak caah laksawng sung bik a si ti theih buin Christmas a dong mi hna an si. John 1-3 chungah Khrih cu Pathian nih kanmah caah a hun tlahmi a si nak fiang tein kan hmuh. Thawngtha pali chungah Khrih nih nan ca i tuan piak awk ah ka pa nih a ka thlah timi voi 39 a chim. 1 Timothy 2:5 ah Pathian le minung kar remnak ser tu pakhat lawng a um i cucu Khrih a si ti kan hmuh. Pathian thawnnak kan sin a phan ti nak a si. Hi thawnnak thawng lawng in nun hnangamnak, a tu le zungzal ca kan hmuh khawh. Sual ngeihthiam khawhnak thawnnak a si (Isaiah 1:18). Minung sermi biaknak nih zia tha lo cun an khamh khawh ko hna lai nain nunnak taktak cu an pek kho hna lai lo. Pathian thawnnak lawng nih a thi ciami kha a nun ter khawh (Mike Stone).