Covid-19 le Lungthin Zawtnak

Tutan zawtnak tlangrai fak ruangah lungthin a zawmi tampi um a si. Riantuan ah taksa tha baa. Inn i i erh ah thinlung tha a ba. Cacawn ah thluak tha a ba. Vawlei thilri kong ruah ah thlarau tha a ba. Tha baatnak a phunphun nih depression timi lungdongh zawtnak a chuahter. Lungdongh zawtnak cu mah tein cawl khawh ti lo le nun ruahchannak ngeih ti lo khi a si. Mi nih kan derthawmnak an theih tikah kan lung a zaw. Dawtmi, duhmi, venmi, tlaihchanmi minung silole thilri hna kha duhning in an um lo tikah le midang nih an tuaitam tikah lung a zaw. Cu lung zawtnak cu mifim, mirum, mi thil ti kho, bochammi si a duhmi hna sin ko ah a chuak khun ti a si. Zawtfah dam lo caan zong ah. Pumpak in lungthin a dam lo tikah a hun i chap chihmi cu thintawi le thinhun a si. Thintawi thinhun hnu i tuahmi, chimmi paoh cu a palhmi lawng te a si caah i chir than lengmang a si. A lungthin a dam ti lomi nihcun ka palh ti kha aa harh chinchin tikah thilrit tam chinchin in i chawnh a si. Mi tih, mi huat le mah i vennak ah thinlung, taksa thlaurau thazang ngeihmi vialte a dih dih. Pum chung ah zawtnak fak cu a um lo nain thinlung a zawt tikah cun Pathian sal si ti loin sehtan sal tu ah i can a si. A hnu bik a phi chuak cu Pathian caah nun duh siloin in thih zokzok duh tu a si.

Pathian a thei, a tih i a hnu a zulmi hna zong lungthin zawtnak an ngei kho ve thiamthiam. Pathian nih a zumh i a kawhmi Moses nih, Pathian ka thah tiah thla a cam (Number 11:15). Pathian nih a hmurka ah a hmanmi Elijah zong nih, Pathian ka nunnak la ko tiah thla a cam ve (1 King 19:4). Special mission pekmi Jonah zong nih, Pathian ka nun nakin ka thih ah a tha deuh tiah thla a cam ve (Jonah 4:3). Hi Pathian mi hman pathum hna zong lungdongh zawtnak nih a rak phanh ve hna ti cu a fiang. An zawtnak a ruang bel aa dang cio. Moses cu a hruaimi mipi hna ruang ah a lung dong. Zei buainak le hranak paoh amah an puh dih. Elijah cu a taksa a baa, a rawl a tam tuk caah a lung dong. Ahab nupi Jezebel nih thah in a kawl fawn i khua chungah a lut ngam lo. Jonah cu ni nih a linh, a duh lomi Pathian nih a tuah caah a lung a dong. Moses bang dawtmi hna an dam lo ruangah maw, an tlakcham ruangah maw lung dongh a fawite. Elijah bang baat tuk ruangah maw, sifah ruangah maw, ral ngeih ruangah maw lung khawh a si. Jonah bang mah duh ningin thil a kal lo tikah lung dongh i ingpuan a fawi te. Rawl loin saupi nun khawh a si. Ti lo zong in ni sarih chung nun khawh a si. Lung a dongh cicek hnu ahcun nun sawh i thih he aa khat.

Thlacam leh lo ruangah Pathian lomh a tong bal hnga maw? Moses, Elijah le Jonah an thlacam hi Pathian nih let hna sehlaw an thi diam hnga (Andrian Rogers). Pathian caah zeihmanh an tuan kho ti hnga lo. Thih ka duh, thi lawlaw ko ning, nun man santlai lo ti caan a tampi ko lo maw? Mi dang cungah khuachia ruah caan, thinhun caan, nahchuah caan a tampi ko lo maw? Cu vialte chung cun Pathian nih khamh mi si rih hi a sunglawi tuk. Midang cu upat le dawt ding an si. A tih in tih ding an si lo. Cabuai cung i rawl a chiatu cu Pathian a si. Pathian nih Moses cu, nangmah le na mipi hna zoh hlah, Keimah doh ding ral a si, a ti. Elijah cu lungkua ah dai tein vaa din a ti i langak rawl a pekter. Jonah caah umruang a zamter i thladem nih a thin linhnak cu a daihter. Tutan zawtnak ruangah lungrethei in na um maw? Nangmah nih hi ral cu na do kho lai lo. Na biakmi na Pathian kha doh ter. Thinlung thazang tha baa tuk in na um maw? Dai tein i dinh caan a si. Nagmah na cawl lo zong ah Thiangthlarau a tuan peng ko. Na duh lo ning in na bu, na chung khar, na committee an kal caah thinhun le thintawi in na um maw? Pathian nih a dawtmi si tu i zuam ko. Zei caah tiah na ih kar ah na herhmi an tuah piak kho tu Pathian na ngei (Psalm 127).

Categories: Sermon

Leave a Reply