Dawtnak Thawn Zia (The Power of Love)

Hngakchia pa nih thlaberh bu ai hmuh i a fale pathum an si. Cu thlaberh fale cu inn ah ai lawm pi hna i an inn pawng methei kung ah a chiah hna. Chai ai serh i an nu le an pa an rat ahcun ka cheih hna lai tiah a bawh. An fale awnh thawng an theih tikah thlaberh hna nu pa cu methei kung ahcun an ra. Hngachia pa nihcun an pa kha a hei chaih i a hnawng ah a khen i a tla ruangmang. An nu nih thih tih ah a zam tak hna. Caan sau a rauh hlan ah a fale caah thih le thih, nun le nun tiin an nu cu methei kung ahcun a hung ra than. Hngakchia pa nih a hei cheih than i a thla khat te lei a kiak. Zam ti lo in a fale sin tuah cun a vun fuh hna. Cu lio ah hngakchia pa nih a tangbo ah a vun cheih than i a nunnak a liam ruangmang. Aw a va mak ve dawtnak thawn zia hi, samram ca hmanh ah. Nunnak pek ko zongah an fale an chanh kho hna lo.

Pa fa hna lung meihol an khoih. Khur thukpi chungah hri in an thumh hna. A za tawk an hmuh hnuah hri cun an van cawi than hna. Caan tlawmpal an dawh hna ahkhin an thumthlak hrihrual thlak khat cu ruah lo piin a cat. An meihol lakmi vialte cu tang ah an thlak dih. Kan pafa tal kan him hnga maw tiin. Tlawm pal an vun dawh hna ahkhin an hri thlak khat cu a hung cat than. Luatnak ding lam um ti lo. A pa nih a fapa cu, ka fa na nu le rak zoh khenh hna tiin khur thuk chungah a zuan tak. Vanchiat celngel ah a angki nih an i citmi a awih sual i an pafa khur tawne ah an nunnak a liam. Kan pa le ka fapa zeitikdah inn an phak lai tiin hringtu nu bik cu… Rawl luamsa he a hngah hna lio ah thawngpang an vun theih. Rawlei chungpil kho ti lo. Lungtur in a nunnak a liam zau ve. Dawtnak thawn zia hi fale cungah. Dawtnak a mak zia hi nu le va cungah. Nunnak pek ko zong ah minung le minung i khamh khawh si fawn lo.

Nawncek cu dekcawh awk men le cilnal awk men khi a si ko. Ai dawhnak le a thatnak a um hrimhrim lo. Mah cu a si ko mi pi cu a thianghlim bikmi Pathian nih amah muisam loin a siam i a chung ah nunnak thaw a rawn. Minung ah an hung cang. Nawlneihnak le fim thawnnak a pek hna. Sertu an theih i an thangthat nak ding caah a si. Sinain nawncek in sermi nih cun sertu tluk an duh. An ruam a kai, an tang an i cum. Sertu an doh. Mairuang a hram kan pheh i a kung dihlak a car bang, sertu nih an thaw a lak ahcun leicet ah ai cang ding an si dih. A ser ciami hrawhhal ding a duh lo caah, tilet in a cawn piak hna. Zei ai hlei lo. Mei alh in a cawnpiak than hna. Zei thahnem fawn hlah. Sifah saltannak in a cawnpiak hna. Sau nguh kun lo. Hlo dih cang hna ning a ti lo. Nawng dih cang hna ning a ti lo. An sual tu i hrawm ko kun ning ti tuin nawncek sermi minung ah a hung i cang. Kan sinah khua a hung sa. Sertu thei uh law nan luat lai a hung kan ti. Aw a va mak ve Pathian dawtnak thawn zia hi.

Categories: Artical

Leave a Reply