Dawtnak: Thlarau Theitlai

            Huatnak nih maw, dawtnak nih dah zumtu kan nun a tei deuh cio? A nupi a thatmi pa kha, zeiruangahdah nan nu hi na thah tiah biacaihbawi nih bia a hal. Ka dawt tuk ruangah ka thah sual, a ti. Kan dawt bikmi hna hi kan huat bikmi zong an si tawn. A nupi a hua bal lomi kan um hnga maw? A va a hua bal lomi an um hnga maw? A nungak a tlangval a hua bal lomi kan um hnga maw? A unau cungah a thin a hang bal lomi kan um hnga maw?Dawtnak le huatnak hi ai ral chanh tukmi an lo nain an chuahnak thluak thahri ai khat, an ti. Pathian nih minung hi a kan dawt tuk nain kan sual lungput le kan ziaza a huat. Cuve bantukin, kan dawt tukmi hna zong kan huat tawn hna. Anmah cu kan dawt ko hna nain in an zia le an lungput kan rem tawn lo. Cucaah rak dawt tukmi, rak bochan tukmi hna khi kan huat khun khawh hna. Phun dang in chim ahcun an kan huat cu an kan dawt caah a si kho i  an kan dawt ruangah an kan huat zong a si kho. Dawtnak le huatnak hi minung pakhat lila cungah kan neih veve lengmang mi lungthin an si.

            Minung kan pum chung ahhin huatnak le dawtnak cu an i pai lengmang. Kan dawt hna i kan huat than hna. Kan huat hna i kan dawt than hna. Chikkhat an kan huat i an tha than. An kan dawt ko nabuin an kan huat caan a um ve. Huatnak nih a tei caan ah pehtlaihnak a rawk. Dawtnak nih a tei caan ah lomhnak a karh. Huatnak nih cun midang kha tuar ve hna seh, ing ve hna seh ti a duh. Dawtnak nihcun kan i lomhnak i hrawm ve hna seh, an lam tluang seh ti a duh. Huatnak nihcun sining pakhat te kha a zoh. Dawtnak nihcun a huap piin a zoh. Huatnak cu huatu minung pumpak chungin a chuak. Dawtnak cu Pathian sining in a ra. Huatnak i a phaw cu “Kei ka hman,” ti a si i a naam cu “A nih a palh” timi a si. Dawtnak i a lungput cu “Kei zong kan chan bau ve,” ti a si i a thawnnak cu “A nih zong a mawh ve lo,” timi a si. Huatnak lungput neih cu a derthawmmi minung caah a fawi tukmi a si i dawtnak lungput neih cu Thiangthlarau nih pek lo ahcun a si kho lomi a si.

Thiangthlarau laksawng vialte lakah a nganbik cu dawtnak a si. Dawtnak kan neih lo ahcun zeidang vialte hi pakpalawng an si, a ti. Dawtnak kan neih khawhnak dingah Thlarau sin lila in a rami hngalh khawhnak zong kan herh. Kan hawi nih kan duh lomi zia le kan rem lomi lungput an neih tikah kanmah an kan huat caah a si lo. Kan thanning ai dan ca tuah a si deuh tawn. Minung a simi paoh a chim ningin a nung kho dihmi kan um lo. Thil tha kan theih zat a tuah khomi kan um lo. Amah ai uk kho dihmi kan um lo. Mi a hua bal lomi kan um lo. Amah bel, mah duhning cio lawng a dongh tiang kan kawl ahcun kan i dawt ciami nakin kan i huatnak lawng a karh (2 Samuel, 13:15). Saram hmanh dehcawh ahcun an hrang chin i lomhsaih ahcun hawitha ah an cang. Khrih nih vawlei a teinak cu dawtnak a si. Thlarau laksawng vialte lakah dawtnak kan herh bik. Dawtnak cu mi zei he paoh ipehtlaih khawhnak Thiangthlarau laksawng a si. Zumtu hna nih huatnak kha kan i teiter awk a si lo. Kan donghnak cu dawtnak si zungzal seh!

Categories: Artical

Leave a Reply