Hramthok le Donghnak

A thluak a chia takmi minung zong nih a philh khawh lomi cu mi tlamtlinlonak a si. Hramthoknak ahcun thatnak tampi tuah cio a rak sinain a donghnak lei a tha lomi tampi um a si. Thil tha rak tuahmi vialte kha philh piak i a tha lomi pakhat hnih i chinchiah piak a si theu caah mi tha tampi an lung a dong tawn. Jackie Smith hi US ram Louisiana a ummi a si. Pe ruk le lehmah pali a sang. High School football lentecelhnak ah minthang taktakmi pakhat a si. Voi 210 aa celh i mipi nih an i chinchiah bikmi cu voi khat bawlung a tleih khawh lonak te kha a si (Chris Walls). Cu nih cun a ning zahter i sau tuk a lung a zawt. Ruahnak, hmuhning le thannak a dang lengluangmi zapi nih an lung tlin dihmi minung si ding cu a si kho lo. Cucaah innchungkhar pa bik, nu bik si hna hi lung a dong tawn. Mibu hruai tu si zong. Pathian rian tuan zong. Pastor tuan le khrihfabu he aa pehtlaimi hruaitu si zong hi a zual. Sihmanhseh Mithiang Paul nih, “Tlik zuamnak ah an dihlak in tlik cu an i zuam nain laksawng a hmumi cu pakhat lawng a si ti kha nan hngalh. Cucaah laksawng hmu ding tein tli u,” a ti (1 Kor. 9:24). Minung nih cun naa zuamnak an philh ko lai i na tlinlonak tu kha an i chiah ziar ko lai. Zeizong a hngaltu Pathian bel nih na tinlung le na zuamnak a philh bal lo.

Hramthoknak a tha ngai i a dongh tiang a tli kho lomi tampi an um. Sunday school ah Gideon thawnnak kong kan theih. Pathian nih a umpi i Midian minung pawl ral kap 300 in a tei hna. Israelmi nih rak kan uk tiah an nawl. A lehmi hna cu, “Keimah nih kan uk hna lai lo, ka fapa zong nih an uk hna lai lo; Bawipa nih an uk hna lai,” ti a si (Judge 8:23). Aa dawh tuk. Sinain mipi hna an sui le Midian sinin a lakmi sui vialte hmang in tlangbawi anki a ser i an khua Ofrah ah a chiah. Cu sui in sermi cu mipi hna nih Baal bantuk in an biak. An hlawh hlang. A tluah hna lo i amah a thih hnu ah Israelmi vialte cu siasal bia ah an i cang dih than. Aa thoknak a tha nain a dongh tiang a chuah kho lo. Abiathar timi pa hi David Adullam lungkua i aa thuh lio ah rawl a rak petu a si (Mark 2:26). Prophet Eli tufa a si David nih tlangbawi ngan rian a pek. David fapa Solomon nih a rian in a phuah i an khua ah a kirter. A ruang? Amah tlangbawi rian a hmunh nak ding caah David fapa dang Adonijah kha siangpahrang siter ding in mipi a lem hna. Hramthok a tha nain a donghnak a chia. Chinchiah khun an si fawn. Kan nun caan tawite ah a donghnak a tha lomi si lai cu tih cio a si. Bawipa i bochan lo in minung mithmai le hmurka lawng zoh le ngaih ahcun lung a dong tuan kho. Hmanhseh, “Bawipa aa bochanmi cu Zion Tlang bantuk an si; Zion Tlang, hninh khawh zong a si lo i ṭhial khawh zong a si lomi bantuk an si.” tiah David Siangpahrang nih a ti. Thangchiatnak tampi a rak tong ve nain a donghnak a thami a si.

Har lengmang tein pension lak tiang rian a tuan kho nu le pa hna hi hngar an um bik. Riantuanmi cu aa dang cio lai. A dongh tiang tuanchuah kho tu cu upatnak sangbik pek ding an si. Lungrawh, lung donghnak phun zakip an tei khawh tinak a si. Tuanbia tha cu harnak aa tel lomi a si bal lo. Harnak a lonh khotu hna tu an si deuh. Kum 1992 Olypics lio British tlik thawngpa Derrick Redmond tuanbia hi philh khawh a si lo. Mete 400 tlik an i zuam lio ah a ke thahri a cat i a tlu. Midang vialte cu an phan dih cang. Cu lio ah a pa nih a va fuh i tliknak a phak tiang a hruai. A dang a tlimi vialte nakin anmah pafa kha an zoh deuh hna. A thaizing bia an hal hna ah Derrick nih a chimmi cu, “A dih tiang tlik lo ka duh lo,” ti a si. Khua caan ah tha baa ko. Khua caan lungre a thei ko. Pawngkam minung nih thazang pek loin soisel caan zong a um ko. Hmahseh a dih ding kal ding, tuan ding, nun ding in fialmi zumtu kan si. “Cucaah cun lam a kan dawntu thil paohpaoh le kan tlaihchan pengmi sualnak vialte kha hlaw hna u sih law kan hmai i chiahmi tlikzuamnak ah khan i zuam u sih. Jesuh kha fek tein i zoh chih u sih, amah cungah cun kan zumhnak cu a hramthawk in a dongh tiang a um,” (Hebrew 12:1-2). Zei ti kan rak i thok zongah Khrih i kan dongh ahcun zeizong vialte a tling dih ko. Amen

Categories: Sermon

Leave a Reply