I Auh Pi Ding le Bak Lo Ding

Nabal timi min hi hringtu a nu nih a sak mi si lo. A ziaza le a lungput zoh in pawngkam minung nih auhnak min a si. A suallam cu “Mihrut, thluak ngei lo,” tinak a si (Chuck Swindoll). Keimah hi ka si bik, ka hngal bik, ka rum bik, ka thawng bik timi lungput a ngei (Stephen Whitney). Mah lio chan ah mirum zaran nih an ngeih mi cu tuu zakhat le meheh sawm hrawng a si. Nabal cu Rili thi kam ah khua a sa mi rum taktak a si. Tuu thong thum le meheh thong khat leng a ngei. Ka pawngkam ah ahodah a um cio, ka thluachuah hi khoi in dah a rat ti a ruat bal lo. Cu lioah ral vialte in a vengtu David le a ralkap zaruk an hung phan. David nih “Tha tein in i ruat law ka pek ve awk a si tiah na ruah zat ka pe,” tiah a hal. Nabal nih David aho a si a hngal lo. “Na tuanman a si lomi cu kan pe kho lo a ti,” tiak ah uah nak pahnih an i pai. David zong nih Israel mi paoh nih cun an ka upat awk a si. Philistine ral in ka khamh hna caah sal sinak in an luat ceu a si timi lungput a ngeih. Nabal nih keimah thawng bak in mah dirhmun ka phan timi lungput a ngeih. 

Iuah pi lo ding mi iuah pi tikah si a vang. Nun a rit. Awlok a chawng. Thin a hang. Thinnak cu a phung a si ko nain sualnak ah lutpitu a si ahcun tih a nung. Nabal le a chungkhar cu thihnak tlang ah a phan. David nih Pathian chiti thuhmi a sinak thurhhnawmh i a dawitu Saul he thlukceu si ding caan a hung phan. British pastor Willian Secker (1800’s) nih, ”Ka thin cu a hang ko lai nain sualnak a ka luh pi lai lo,” tiah a chimmi i zumtu nih kan i chianchiah awk a si. David nih Goliah a tei khawhnak kha Pathian thawng in a si ti thei sehlaw Nabal kha lungsau tein bawmh a herhnak a chimh ko hnga. Nabal nih thluachuah a comi kha Pathian sinin a ra ti thei sehlaw siang tein a pek ko hnga. Uahnak pahnih an i ton tikah i timh cia lomi thil tha lo tuahnak aa peh tawn. Fim zong hi uahnak i hman ahcun tihnung thil ah a cang kho. Rum zong nih thihnak a chuah pi khawh. Thawnnak zong a ziam kho. Iauhnak nih lungrethei in tuah a si tikah zumtu hna nih cun Pathian caan pek a herhbik lio a si. God’s monment in life an ti tawn. Na minung sinak that law Pathian bia chim ter ti leh khawh a si. Mihrut nih cun ka ding tiah a ruah zungzal, lungthin cheuhmi a ngaimi cu mifim an si (Prov. 12: 15). Thiangthlarau cu Nabal a sal pakhat sinin rian a tuan taktak. Nabal nih a ngeih bal lo caah a nupi Abigail hmang in damnak le remnak an hmu.

Vawlei cungah a hmunmi thil an um lo. Pathian kut chung lawngah himnak a um. Na hawi kha na dawtnak sangbik na hrawmh khawhmi cu Pathian biathli a ngai i a zul mi siter ve kha a si. Hngachia pathum bia an i ruah. An pale kong an caih. Pakhat nih ka pa cu kan Mayor he an i thei, a ti. A dang pakhat nih, kan Senator he an i thei, a ti. A hnubik pa nih, ka pa cu Pathian he an i thei, a ti (James Merrit). “Mifim nih a fimnak kha i porhlaw hlah seh, miṭhawng nih a thazang kha i porhlaw hlah seh, mirum nih a rumnak kha i porhlaw hlah seh;sihmanhsehlaw ahohmanh nih porhlawt a duh a si ahcun hi tu hi i porhlaw deuh seh: Keimah theih le hngalh hi. Zeicahtiah keimah cu Bawipa ka si i a dong lomi dawtnak kha ka pek hna i vawlei cungah hin biading le dinnak kha ka tuah; hi thil hna hi ka lunglawmhnak an si,” tiah Bawipa nih a ti.

Categories: Uncategorized

Leave a Reply