Value in life

Ih le Mang (Sleep and Dream)

• By Chan Lian
• 17 January, 2014
• No Comments

Thi tlup in i hngilh i mangtha manh thluk a nuammi a um lo ka ti. Minung kan i hngilh ning dot nga a um. Dot khatnak ahcun hngilh bantuk, i thangh bantuk in kan um i kan i hngilh le hngilh lo kan i thei huaha lo. Cu ti kan um cu minute pahra hrawng a si. Dot hnihnak ahcun kan pum cawlcanghnak a hung dai, kan tak satnak a tum, kan lungtung a hung fum. Kan pum kha dinh hram a van i thok. Dot thumnak le dot linak ahcun kan pum hi a cawl bak ti lo ti awk a si. Tit le taksa riantuannak hna ai din. Pawngkam hna hnawhnak a um lo ahcun dotlinak ah kan lan i fakpiin kan pum dinh hram a van i thok. Cu lio cu kan thluak fak piin rian tuan hram a van i thok a si. Dot nganak cu REM caan an ti i kan mit rangtaktak in a cawl caan a si. Kan pum cu a thih bak in a thi ko nain kan thawchuah le kan lungtur a hung rang, kan mitmu a cawl. Mangmanh hram kan i tho. Kan i hngilh ka in minute 90 a rauh hnu ah mangmanh kan i thok cu a si.

Mang kan manghmi ruangah kan thin a phang kho, kan tha a nuam kho, lungawitawm zong in kan um kho. Mang i thawhpi khawh lo ruangah siaherh ngaiin um khawh a si fawn. Kan nunnak i lungretheihnak hna kan neih tikah tektlak, meil alh, thlichia tibantuk kan manh tawn. Dam lo ngai in kan um caan le sian lo tukmi nih an kan liam tak tikah mithi hna kan manh hna. Kan ngaih tukmi thil hna a um tikah “tlai, tlawrh, kal tak” tibantuk kan manh fawn. Mi kan tih hna, soi lai kan phan tikah taklawng hna in kan mang ah kan um tawn. Mui chiat le dawh lo a tihmi kan si ahcun kan ha hna a tlawng kho. Taksa in kan thazang a der caan ah i khawhdennak hna kan manh ve. Kan nunnak ah nunzia kan thiam deuh lo caan ah inn sangpi in kan thla tawn ti bantuk in mang phunphun kan manh. A tlang piin kan mang hna cu 1) Pathian nih ralrin peknak, fimchimhnak, mawhchiatnak , biakamnak, thazang peknak hna ah a hman hna (Numbers 12:6; Joel 2:28; Acts 2:17; Jeremiah 23:28; Mtt. 2:12); 2) Nitin kan tuahmi cungah kan thinlung khuaruahnak in a ra ( Eccl. 5:3,7; Isaiah 29:8), 3) Satan nih kanmah hrawh awkah a dih cangmi kan buainak a van chuahpi than (Mtt. 13:25; 2 Cor. 11:14)

Mang kan manh caan hi Pathian duhnak kan theih caan a si. Nitin kan nunnak a kan chektertu zong a si fawn. Khatte leiah, Satan riantuannak kan theih khawh caan zong a si ve. Mang chia hna kan manh tikah, kan tihmi kan ral  i ralrin awk a kan chimtu a si. Thil tha lo ah kan phaknak hnga lo a hlan kan in a kan khamh chungtu a si. Kan dawtmi le kan huatmi a kan theihtertu a si. Thilchia le thil tha kan tuahmi a kan thlei dantertu an si. Kan nun hrawktu Satan kan doh khawhnak lam chimtu a si. Mang tha hna kan manh tikah, Pathian thawnnak thawngin teinak a co ding kan sinak langhternak a si. Ruahchannak a neimi minung kan sinak hmelchuhnak a si. Hmailei kan kalnak ding thluachuah lam hmuhsaktu  a si. Cu caah Karl Jung nih, mang hi tha tein a suallam theih khawh ahcun minung kan thinlung thlarau damnak le himnak a si, a ti.

(Chirhchan:

(http://voices.yahoo.com/the-sleep-cycle-understanding-stages-sleep-3917854.html?cat=5)