Jericho Fell

Ruahchannak ngeihmi le thil a cang takmi an i khat lo tikah zei lam dah kan zulh lai. Ram thumnak na phak ahcun vanram pahnihnak bantuk a si lai. NLD nih thimnak an tei ahcun Kawlram a nuam tuk cang lai. Israelmi cu Pathian nih kum zali sal tannak ram Egypt in duhdim nunnak ram Kanaan ah a hruai hna. Khuaihliti le cawhnuk in a luang. Ramthumnak kan phan, phunzai ding a dih hlei lo. Tam deuh cu leiba sal ah i can a si. NLD nih thimnak an rak tei. Rohingya (Rakhine Kala) pawl kongah Kawlram a buai ṭhiam. Ralkap nih uknak an chuh ṭhan hna. Atuah  nitin in thisen a luang hoi. Johua nih Israelmi cu Kanaan ah a luhpi hna. Kamhmi ram a si. Ruahchannak in an khat. Hmasabik an luhnak ding Jericho khuami nih kutka an awnh hna lo. Kum zali sal an tan, kum sawmli ramcar i khual an tlawm hnuah ral tuk ding an si ṭhan.

Jericho hi Dead Sea and Mt. Nebo kar ah a rak ummi a si. Ralhruang vanpang thuat hnih an ngei i an khua chung luh khawhnak lam a um lo. Israelmi cu Joshua nih a hruai hna i Jericho khua luh ding ah ral tu ding an si cang. Zeitindah kan luh khawh lai? Rawl eiding zeizatdah kan ngeih? Hriamnam teh? Nule hngakchia, ai hliamkhawngmi zeitin kan i zoh lai? A biapibik cu teinak hmuh ding a si. Joshua thluak nih a phan lo. A mipi thih dih lai a phang. Ralkap pawl hmai ah Kawl ralhrang, an hnuah mipi le inn le lo si lio mi he kan i lo hringhran. Mah hi maw thimmi miphun dirhmun? Micheu an lungdong, micheu biasi an phai. Micheu cu zam diam an duh. Micheu cu rili sen a tanpi tu hna Pathian sinah an i mer. Pathian nih Van ralkap a tlah hna lo. Ral teinak lam tu a chimh hna. Jeriko khua cu a chunglei he a lenglei he Israel mi hna ruangah cun aa khar khipkhep ko; ahohmanh a chuak a lut an um lo (Joshua 6.1). 

Vanpang an neih i an kai ahcun lung pipi in thlak hnawh ding an si. Canthian in chuahchuah ah kah ding an si. Mei alh chiti in toih ding an si. Hlan lio ral tuk kha, miakpi an ngei lo, vanlawng an ngei lo. Tanglei in cunglei mi doh. Miphun kip nih kum zabu tam pi chung an i cawnmi raktukning Pathian nih a chimh hna: Jericho khua an kulh. (Khuami hna nih lenglei ah an nunnak ca herhbaumi thil an la kho ti lo). A au in an au (Israelmi 6 millions Laimi zat nawn au thong a thang). Tlangbawi hna nih saki muko an tum (Biaknak hruaitu hna tlang an au). Nikhat hnu ni khat an peh nain zei hmanh a cang rih lo. Hmanhseh, Pathian bia an ngai, hruaitu nawl an zul. Nisarih hnuah Jericho vanpang thuathnih cu a cim. A vanpang pipi khi cunglei Thlarau nih a hun chimh tiin zumh khawh a si ve. Khatlei ah, Jericho khuami an lung a dong ti hi a fiangmi a si. Pawcawm rian an ttuan kho ti lo. An rawl a ṭam, an thin a phang, thih dih lai an ṭih ve. An ralkap an der chin lengmang. An kutka an awn.

Categories: Uncategorized

Leave a Reply