Value in life

Khrihfabu Members Sining

• By Chan Lian
• 24 March, 2019
• No Comments

Atu lio American church tampi ah pastor le music hruaitu hna nih members tlaihnak caah phungchim style, worship style, program tthattha hna hi an i bochan. A herh ngaimi a si ko. Lifeway Research nih hlathlainak khrihfabu 1000 reng ah an tuah i members pawl kha: “Zeiruan cem ahdah nan bu member in na chuah hnga? timi an hal hna. Zatceu nak tam deuh 54% nih an zumhnak le Pathian bia an i fianning ai thlen ahcun member in chuah ding ah fak piin khua kan ruat ko hna an ti. Zakhat ah 42 nihcun kan zumhnak ai khah lo ahcun kan chuak bak lai an ti. Khrihfabu in chuahnak ding le bu i tthennnak ding ah a biapi bik i an chiahmi cu zumhnak le pomning a si.

Cun pinah zumhnak ruangah siloin thil dang ruangah bu ai thialmi an um ve. A tanglei a ruang a phunphun hna hi US khrihfa hna nih bu an i tthialnak a ruang an si. Zakhat ah:

48 nih hmun dang i kan i tthial ahcun an ti.
19 nih phungchim dan ai thlen ahcun an ti.
12 nih kan pastor ai tthial ahcun an ti.
10 nih chungkhar chung i pakhat nih tthial a duh ahcun an ti.
9 nih bu chung ahcun politics a um ahcun an ti.
6 nih bu nih an kan herh lomi timi kan pom ahcun an ti.
5 nih music style ai thlen ahcun an ti.
4 nih member dang he elhngiarnak a um ahcun an ti.
3 nih kan hawile an i pumh ve ti lo ahcun an ti.

Member in chuahnak le bu i tthennak kong ah hrial khawh bak lomi cu zumhnak i khah lo a si. Khrihfabu i a muru taktak a simi zumhnak hi members nih biapi bikah an rak chiah cio mi a si. A dang pakua hna cu hrial khawh lomi mah pumpak lei kap dirhmun hna an si. Laimi zumtu nih teh kan khrihfabu ahhin zeidah biapibik ah kan chiah cio. Atu tiang ahcun zumhnak le thawngtthabia chim dan, music hman dan, kan i pumh dan ruangah bu dang ahcun kan i tthial rih lo. Bu zong kan tthen rih US ahcun. A ruang dang hna tu ahcun kan tthen cheu len ko. Bu member si kan duhnak a ruang hi teh praise and worship le phungchim style ruang deuh ah maw a si, zumhnak le Bible pomning na duh ruang ahdah a si? Khrih cu ka khamhtu a si caah cubantuk in a zum vemi zumtu hawi hna he Khrih i a pum a simi a khrihfabu ah member si kan duhmi hi a muru a si. Kan zumhnak cu pakhatnak a si i thil dang vialte cu a chapchuan tu an si.