Khrihfabu nih Herhmi

Sizung kal kan tih cio. Na dam lo, na thi lai ti hi tih bikmi a si. Kum zei maw zat ahkhan Los Angeles thawngthanhtu nih Mrs. Agnes Human timi nu kong an tial. A zaw i sibawi sinah aa piah. Kum 30 a si. Miphun ca rian a tuannak ah poisen timi khuvai tha lo kha Oakridge, Tennessee Nuclear Plant (Hriamnam sernak), ah aa hminh sual. Sibawi pa nih thawng tha a hun thanh than. Cu thawngtha cu “Thla khat nunnak na ngei rih,” ti a si. Kum khat lawng nung ding in khua khang law zei dah na tuah hnga? Thla 24 lawng na nung cang lai tiah an chimh tik ah mah minu nih a fale pali caah umnak ding inn a tuaktan. Kanmah si ve uhsih law zeidah kan tuah ve hnga? Zeitik kan thih lai, zeitin kan thih lai, khoika ah dah kan thih lai timi a theitu cu kan Pathian lawng a si. Kan Bible ca chung zong ah thihnak a tong colh dingmi Prophet Hananiah kong kan hmuh (Jeremiah 28:10-17). Prophet Jeremiah chan lio a si. Mah lio i Israel a uktu cu Nebuchadnezzar, Babylon siangpahrang a si. Hananiah nih Pathian bia a buar ruangah a nunnak lak ding a sinak kong a si. Biaphuan hnu thla hnih ah a thi taktak (28:26).

Ka no rih ko ti hlah. Ka dam ko ti hlah. Kaa nuam ko ti hlah. Ka eidin a tha ko ti hlah. Gym ka kal ko ti hlah. Chan saupi ka nung ko lai ti hlah. Football celhthiam minthang pa Reggie White zong kum 43 kum a si a ah thi ko. Indonesia in li aa hnih ah khan minung 120,000 an thi ko. Minute hmanh a rau lo. Cu caah kan nun chung te ahhin zei dah biapibik ah kan chiah lai timi ruah a hau. Cathiang nih, “Cucaah ka u le ka nau hna, fek tein dir u law zeihmanh nih in ṭhial kho hna hlah seh. Bawipa rian teimak tein nan ṭuannak ah cun i manh lo ngaiin um zungzal ko u, Bawipa rian nan ṭuanmi cu alak a si bal lo ti kha nan hngalh,” I Corinthians 15:58. Nun caan tawi teah Pathian ca i kan tuan hi a sunglawi bik ko. James Merritt nih Khrihfa kan nun ah thil pathum i zuam dingmi a chim.

1. Pathian caah saltha si ding: Pathian nih thil lianngan ngaipi tuah ding in a kan ruahchan lo. Zumhthlak saltha si ding tu a kan duh piak deuh. Amah nih thil lianngan cu a tuah khawh ko. Bia panga: Pathian nih hman an duh; Pathian nih a Khrihfabu caah an herh; Khrihfabu hi na tuannak ding hmun a si; Pathian nih tuan khawhnak ding ah thil ti khawhnak an pekmi a um; cun Amah ca i na nun na pek tikah pahrang an chap chin lengmang lai. Pathian a Khrihfabu caah thil lianpi tuah a herh lo. Na si khawh tawk tein naa pekmi kha Bawipa nih a duhmi a si. Tu kum ah kan tuah khawh tawk te cio tuah kan i timhmi kha a duh bikmi a si.

2. Pathian nih a kan pekmi kan chawva kengtu tha si ding: II Corinthians 8:7-8 ah kan hmuh bantukin Mithiang Paul nih peknak kong a chim. Dawtnak tel loin pek khawh a si. Sinain dawtnak a um hnu ahcun pek lo khawh a si lo a ti. Pathian a daw takmi nihcun pek a kan fialmi cu kan pek sian hrimhrim ding a si. Pathian a dawmi, a Khrihfabu a dawmi nihcun pek lo khawh a si lo tinak a si.

3. Siahgnakchia tha si i zuam ding: Vawlei fimthiamnak ca cu kan cawng kan thiam ko lai. Khrihfa cu Bible Ca a cawng peng i a thiam chin lengmang ding kan si. Bible Ca cu a herh ruangah tialmi a si. Kan rel ahcun kan nunlam kan i fiang chinchin i midang sin zongah chim ding kan ngei (Joshua 1:8; Psalm 119:11).

Categories: Artical

Leave a Reply